Gikan sa Among mga Magbabasa

Uso Buot kong magpasalamat sa serye nga “Naulipon Ka ba sa Uso?” (Septiyembre 8, 2003) Ingong tin-edyer, gibati nakong napit-osan sa kalibotan sa pagpalit sa kinaulahiang mga uso ug sa pagmentinar sa “hingpit” nga korte sa lawas. Apan kining mga artikuloha nakatabang kanako sa pagbag-o sa akong mga batasan sa pagpamalit ug sa pagbesti nga mas makasaranganon.

M. B., Tinipong Bansa

Diyes anyos na ako, ug gihangyo sa akong magtutudlo ang among klase sa pagdalag mga materyal nga among gidukiduki bahin sa uso. Nagdala akog kopya sa artikulong “Ang Dili-Maayong Bahin sa Pisikal nga Kaanyag.” Ang among magtutudlo mihimog mga kopya alang sa tibuok klase!

G., Belgium

Ingong 19-anyos nga dalaga, dili nako malikayan nga maapektohan sa gikaingon nga “hingpit” nga babaye. Ang akong lawas dili sama sa usa ka modelo, ug tungod niini kanunay ko nga mobating dili madanihon. Gusto ko kanunay nga magdiyeta​—bisan kanang hilabihan ka estrikto nga mga diyeta. Wala madugay human nga miampo ako alang sa tabang kon unsaon pagbuntog niining pagbatia, nadawat nako kining magasina ug maingon man ang tubag sa akong pag-ampo. Daghan kaayong salamat.

S., Alemanya

Ang mga artikulo nakatabang kanako sa pagkakita nga walay kapuslanan ang akong tinguha sa pagsunod kanunay sa uso. Ako 14 anyos, ug dinhi sa Italya, lisod kaayong moadto sa tunghaan kon dili ka magsul-ob ug mga sinina nga may tatak sa iladong tigdisenyo​—seguradong ubos ang pagtan-aw sa uban kanimo! Akong nakat-onan sa inyong mga artikulo nga ang hinungdanong butang mao ang pagkahimong dato sa espirituwal sa panan-aw sa Diyos.

F. G., Italya

Mga Orkid Mahinamon nakong gibasa ang artikulong “Ang Matahom nga mga Orkid.” (Septiyembre 8, 2003) Nakahatag kini kanako ug mga sugyot bahin sa pagtanom ug mga orkid diha sa balay ug nagtudlo kanako sa mga ngalan ug gigikanan sa pipila niini. Gitagana sa Pagmata! ang impormasyon nga ako gayong gikinahanglan.

L.E.C., Bangladesh

Hinlong mga Ngipon Gusto ko kaayong mosulat kaninyo bahin sa artikulong “Tukog nga Makahinlog Ngipon.” (Septiyembre 8, 2003) Dugay na akong nahibulong kon giunsa sa mga tawo paghinlo sa ilang mga ngipon sa wala pa maimbento ang toothpaste. Busa naikag kaayo ako sa artikulo!

D. G., Tinipong Bansa

Wala gayod nako maangayi ang pag-usap ug mga tukog sa kahoy. Apan nasayop ako. Mopatim-aw nga ang maong pag-usap makaayo diay, ug ako mag-usap na niana karon aron maampingan ang akong mga ngipon.

A. A., Chad

Taho Bahin sa Holocaust Ang artikulo nga “Ang Iyang Report Nakahatag ug Dakong Impresyon” naghisgot bahin sa mga Hudiyo nga nagsul-ob ug mga uniporme nga may Star of David didto sa mga kampo konsentrasyon. (Septiyembre 8, 2003) Apan, sumala sa akong nahibaloan sa Ravensbrück nga kampo konsentrasyon, ang mga Hudiyo wala magsul-ob ug uniporme nga may Star of David apan usa ka dalag nga trianggulo.

J. R., Habagatang Aprika

Ang “Pagmata!” nagtubag: Sa pagkatinuod, walay Star of David nga gitaod sa mga uniporme sa mga Hudiyo sa kadaghanang mga kampo. Apan, may ebidensiya nga gitaod kini sa mga uniporme sa ubang mga kampo.

Pagdaogdaog Dili ako usa sa mga Saksi ni Jehova. Apan, ang serye nga “Pagdaogdaog​—Unsay Imong Mahimo Niini?” (Agosto 22, 2003) miabot sa tukma gayod nga panahon. Nagkagrabe ang mga pag-atake sa mga isigkaestudyante sa tunghaan sa akong anak nga babaye. Sama sa inyong gisugyot, ako siyang giestoryahan ug gihatagag pagpaluyo ug tabang. Salamat sa inyong gipakitang kahingawa sa mga tawo.

T. M., Ukraine