“Ang Konseho sa Siyudad Dili Angay Molihok Sama Kang Manong”
“Ang Konseho sa Siyudad Dili Angay Molihok Sama Kang Manong”
TINAMPO SA MAGSUSULAT SA PAGMATA! SA CANADA
ANG Canadian Charter of Rights and Freedoms manalipod sa mga kagawasan sa tanang molupyo sa Canada. Ang kagawasan sa pagpanulti, prensa, ug pagsimba giestablisar ug gilig-on diha sa konstitusyon ug mahimong ipatuman pinaagi sa mga korte.
Busa, sa dihang ang lungsod sa Blainville, usa ka komunidad sa amihanan-kasadpan sa Montreal, nag-amendar sa ilang ordinansa aron sa pagdili sa pagpamalaybalay nga may relihiyosong katuyoan kon walay permiso, kadto nakapukaw sa pagtagad sa mga Saksi ni Jehova. Ang giduso nga amenda direktang makaapektar sa ilang balaybalay nga ministeryo. (Buhat 20:20, 21) Apan nganong gipresentar man ang maong amenda sa balaod? Ang mga opisyales sa lungsod nag-ingon nga daghan kono ang nagreklamo bahin sa pagpamalaybalay sa mga Saksi ni Jehova. Apan, sumala sa mga rekord sa departamento sa kapolisan, sa miaging lima ka tuig, walay nadawat nga reklamo bahin sa kalihokan sa mga Saksi ni Jehova!
Bisan pa niana, ang maong amenda nahimong balaod niadtong 1996. Human niana, ang mga abogado alang sa mga Saksi ni Jehova sa Blainville nagpahibalo sa lungsod nga tungod sa konstitusyonal nga garantiya sa relihiyosong kagawasan, ilegal gayod nga ang lungsod mogamit sa balaod aron sa pagdili sa mga kalihokan sa mga Saksi ni Jehova. Wala tagda sa mga opisyales sa lungsod ang maong pahibalo ug nag-isyu hinuon ug 17 ka summon. Ang mga abogado sa mga Saksi ni Jehova mitubag pinaagi sa pagpayl ug asunto aron pugngan ang lungsod sa Blainville sa pagpig-ot sa relihiyosong kagawasan ug kagawasan sa pagpahayag—mga katungod sa tanang lungsoranon sa Canada.
Ang kaso gihusay sa Superior Court sa Quebec atubangan sa Halangdong Huwes nga si Jean Crépeau niadtong Oktubre 3 ug 4, 2000. Human sa husay, ang huwes nagdesisyon pabor sa mga Saksi ni Jehova. Giila ni Huwes Crépeau “nga ang mga nagpetisyon nagsunod sa mga tunob sa unang Kristohanong kongregasyon sa pagpamalaybalay sa ilang mga silingan nga nagdasig sa mga tawo sa pagmentinar sa taas nga sukdanan sa moralidad ug espirituwalidad . . . . Ang pagpamalaybalay maoy usa ka Kristohanong serbisyo diha sa komunidad. Ang mga Saksi ni Jehova nagaduaw sa mga lungsoranon sa Blainville sa aberids, kas-a sa kada upat ka bulan aron sa pagdapit kanila sa pagbayloay ug mga ideya bahin sa mga ulohan nga makapadasig ug makapaikag sa tanan.” Sa iyang desisyon si Huwes Crépeau nag-ingon: “[Ang Korte] nagdeklarar nga ang mga Saksi ni Jehova nahigawas sa obligasyon sa pagkuhag permiso aron sa pagtuman sa ilang ministeryo.”
Giapelar sa lungsod sa Blainville ang desisyon ni Huwes Crépeau ngadto sa Korte sa Apelasyon sa Quebec. Ang apelasyon gihusay niadtong Hunyo 17, 2003, ug ang desisyon gipakanaog niadtong Agosto 27, 2003, nga nagtuboy sa desisyon sa huwes nga unang naghusay. Nga nagtumong sa Canadian Charter of Rights and Freedoms, nga manalipod sa kagawasan sa relihiyon ug naglakip sa katungod sa pagpahayag sa relihiyosong mga tinuohan pinaagi sa pagtudlo ug pagpakaylap niini, ang Korte nagdesisyon nga nag-ingon: “Ang gikuwestiyon nga ordinansa nagpig-ot pag-ayo sa kagawasan sa relihiyon sa mga Saksi ni Jehova ug sa kagawasan sa panghunahuna, tinuohan, opinyon ug pagpahayag sa mga lungsoranon sa Blainville . . . Ang ebidensiya nagpakita nga ang mga molupyo sa Blainville wala magreklamo bahin sa kono dili-angay nga pagpangolekta sa mga Saksi ni Jehova kondili sa daghang mamaligyaay ug tigsuroy nga mga negosyante. Walay dinalian ug tinuod nga panginahanglan sa pagkontrolar sa balaybalay nga pagpangambas alang sa relihiyosong mga katuyoan. Dugang pa, ang giaprobahan nga mga ordinansa dili maayong pagkabalay ug gisagop nga dinalidali nga walay pasiunang konsultasyon, ug dili makataronganon ug pagpasobra kon bahin sa mga epekto niini sa gipahayag nga tumong nga mao ang pagpanalipod sa pribasiya sa mga lungsoranon. . . . Sa usa ka gawasnon ug demokratikanhong katilingban, ang konseho sa siyudad dili angay molihok sama kang Manong o Big Brother nga mao na hinuoy mangunay sa pagdesidir kon kinsa sa mga molupyo ang mahimong magpasaka ug bisita diha sa ilang balay inigkagabii o sa hinapos sa semana. Ang huwes nga naghusay husto sa iyang pagdeklarar nga ang gikuwestiyon nga ordinansa dili mapadapat sa mga Saksi ni Jehova.” a
Ang mga Saksi ni Jehova nalipay nga ang mga korte sa Quebec nagpadapat sa Charter of Rights niining kasoha sa pagpanalipod sa relihiyosong kagawasan sa tanang lungsoranon sa Quebec gikan sa kortog-panghunahuna nga pagdaogdaog.
[Footnote]
a Ang Manong o “Big Brother” nagtumong sa nobela ni George Orwell nga Nineteen Eighty-four diin ang sugilambong nga diktatoryal nga estado maoy nagkontrolar sa mga lungsoranon niini pinaagi sa lider sa partido niini nga kono presente bisan diin, si Big Brother, nga nahibalo sa tanang gisulti ug gihimo diha sa estado.
[Hulagway sa panid 24]
(Alang sa aktuwal nga pagkahan-ay, tan-awa ang publikasyon)
CANADA
Blainville
Montreal
T.B.A.
[Hulagway sa panid 24]
Ang Canadian Charter of Rights and Freedoms manalipod sa mga kagawasan sa tanang lungsoranon sa Canada
[Mga hulagway sa panid 25]
Ang mga Saksi libre nang makapakigbahin karon sa publikong ministeryo sa Blainville. Pasukip: Nagtigom sa ilang Kingdom Hall