Ang mga Kalipay ug mga Kalisdanan sa Pagkabatan-on

ANG pagkabatan-on puwedeng mahimo nga usa ka malipayon kaayong panahon sa kinabuhi. Sa pagkatinuod, alang sa daghang batan-on kini malipayon. Ug daghang hamtong ang mangandoy sa katuigan sa ilang pagkatin-edyer.

Sa samang higayon, kinahanglang ilhon nato nga kita nagkinabuhi sa “makuyaw nga mga panahong lisod sagubangon.” (2 Timoteo 3:1) Kini nakahatag ug dugang kapit-os sa mga batan-on, kapit-os nga lahi nianang giatubang sa nag-unang mga kaliwatan. Tingali mao kiniy hinungdan kon nganong si Sabrina Solin Weill, ehekutibong editor sa usa ka magasin alang sa mga tin-edyer, nagpakasama sa kasinatian sa pagkabatan-on sa “paglatay sa pisi nga walay safety net sa ubos.” Sa pagkatinuod, kining magubot nga yugto sa kinabuhi mahimong matugob sa pagbati sa kabakikaw, kabalaka, ug kalibog. “Sa panahon sa ilang kinabuhi tali sa pagkabata ug pagkahamtong,” misulat si Weill, “ang mga tin-edyer kinahanglang mosagubang sa kinangil-arang bahin nianang duha ka yugto.”

Kon ikaw usa ka batan-on, sa unsang paagi ikaw makasagubang sa mga suliran nga imong giatubang? Kon ikaw ginikanan sa usa ka batan-on, unsay makatabang kanimo sa paghinumdom kon sama sa unsa kining magubot nga katuigan ug busa mas makasabot sa nasinatian sa imong anak? Niining seryeha giawhag namo ang mga batan-on ug mga hamtong sa pagsusi pag-ayo sa ulohan bahin sa pagkabatan-on. Ang paghimo niana motabang sa mga batan-on dili lamang sa paglahutay kondili sa paglampos usab.