Gikan sa Among mga Magbabasa

Komunikasyon Natukmod ako sa pagsulat bahin sa seryeng “Komunikasyon​—Hinungdanon sa Kinabuhi.” (Septiyembre 22, 2003) Kini naghubit sa kon unsay sagad nga nahitabo sa kalalangan​—ang mga linalang nagtinabangay sa usag usa. Bisan ang mga tanom nagpasidaan sa usag usa nga dunay manunukob! Maayo unta kon ang mga tawo makakat-on usab sa pagpakitag kahingawa sa usag usa.

C. C., Tinipong Bansa

Nalingaw gyod ko sa inyong paghubit kon giunsa sa mga mananap sa pagpakigkomunikar sa usag usa. Makahinapos gayod kita nga dunay Diyos nga maoy tuboran niining tanang kahibulongan nga mga butang.

R. Z., Alemanya

Dili nako ikasulti ang kalipay nga akong gibati samtang nagbasa niadtong mga artikuloha. Pagkadako sa atong pribilehiyo nga makapakigkomunikar sa Diyos pinaagi sa pag-ampo!

A. W., Habagatang Aprika

Naguol gayod ako niining buntaga sa dihang gisugdan nako pagbasa ang artikulo. Apan ang impormasyon kon sa unsang paagi ang mga insekto nakigkomunikar sa usag usa nakapahimuot kanako. Mipaingon ko sa akong trabahoan nga malipayon.

L. L., Pransiya

Mga Patik Daghan kaayong salamat sa artikulong “Mga Batan-on Nangutana . . . Angay ba Akong Magpapatik sa Akong Panit?” (Septiyembre 22, 2003) Nagtuo gyod ko nga madanihon ang mga patik sa panit ug gusto kong magpapilit ug temporaryo nga patik. Apan, ang pamulong nga dili nato gustong butangag mga marka ang atong lawas nga dili makapasidungog sa Diyos “bisag temporaryo ra” nakapaamgo kanako kon unsa ka seryoso ang maong butang. Sa dihang akong napalandong nga ang pagpapatik mahimong makapandol sa uban ug makapahunahuna sa uban nga ako rebelyoso, nakahukom ko nga dili kana himoon.

A. K., Japan

Ganahan unta kaayo kong magpapatik sa akong panit. Apan kining artikuloha nakatabang nako sa pagkaamgo nga mahimong basolan ko kini sa ulahi. Gihisgotan usab ninyo ang mga kapeligrohan sa panglawas, nga wala nako mahatagig pagtagad. Salamat sa maong makapakombinsir nga artikulo.

D. T., Pransiya

Mga Piñata Maikagon nakong gibasa ang artikulong “Ang Piñata​—Usa ka Karaang Tradisyon.” (Septiyembre 22, 2003) Human kini mabasa, duna koy mga pangutana. Ang kalangkitan sa bakak nga relihiyon dokumentado kaayo. Apan ang artikulo morag nagpaila nga basta dili mahasol ang tanlag sa usa, kini dalawaton ra. Komosta na man ang pagsaulog sa adlawng natawhan ug mga piyesta opisyal sama sa Pasko?

S. W., Tinipong Bansa

Ang “Pagmata!” nagtubag: Ang mga Kristohanon maglikay sa bisan unsang kasaulogan o mga kostumbre nga padayong may kalangkitan sa bakak nga relihiyosong mga pagtulon-an o mga kalihokan nga supak sa mga prinsipyo sa Bibliya. Pananglitan, ang Bibliya tin-awng naglantaw sa pagsaulog sa adlawng natawhan nga dili dalawaton. (Genesis 40:20; Mateo 14:6-10) Apan, kon klaro kaayo nga ang usa ka kostumbre walay kalambigitan karon sa bakak nga relihiyon ug walay nasupak nga mga prinsipyo sa Bibliya, ang matag Kristohanon angayng mohimog personal nga desisyon kon iya bang sundon ang maong kostumbre.

Sugilanon sa Usa ka Siyentipiko Daghang salamat sa nindot kaayong artikulo nga “Ang Siyensiya Maoy Akong Relihiyon Kanhi.” (Septiyembre 22, 2003) Wala mahadlok si Kenneth Tanaka sa pag-atubang sa kamatuoran. Mapainubsanon usab niyang gidawat nga ang iyang gituohan sulod sa daghang katuigan maoy sayop. Nabatonan niya ang hustong tinamdan.

S. A., Rusya

Nag-antos ko sa depresyon, nga nakigbisog sa pagbati nga gustong mamatay. Dayon akong nabasa ang pangutana diha sa artikulo bahin kang Kenneth Tanaka, “Kon ang pagkawalay-paglungtad mao ra diay ang dulnganan, unsa pa may kapuslanan sa paglungtad?” Kini nakatandog sa akong kasingkasing. Morag giingnan ko sa Diyos nga “Padayon sa pagkinabuhi!”

C. I., Japan