Gusto Ka Bang Motilaw ug Bulak sa Kalabasa?

TINAMPO SA MAGSUSULAT SA PAGMATA! SA MEXICO

SA DIHANG mamulak ang kalabasa, ang tanaman sa utanon mahisamag tanaman sa bulak. Ang nindot nga dalag nga bulak​—nga may elegante, simple nga porma​—dili mangalimyon, apan makapukaw kini sa among gana sa pagkaon. Sa ato pa, aktuwal ba nga ginakaon sa mga tawo ang bulak? Oo. Sa pagkatinuod, sumala sa magasin nga Cuadernos de Nutrición, ikaingon nga ang Mexico mao ang nasod nga adunay kinadaghanag potahe nga sinambogan ug bulak.

Ang mga bulak sa kalabasa dugay nang ginakaon dinhi. Sa tanang matang sa kalabasa, ang bulak sa zucchini mao ang kasagarang ginakaon. Apan mag-amping kami sa pagkutlo lang ug laki nga mga bulak kon gusto usab namo nga modako ang bunga sa tanom. Amo lang tan-awon ang pungango niini sa pag-ila sa laki ug baye. Kon dunay giming nga kalabasa sa pungango, ilhanan kana nga baye ang bulak ug dili namo kana kutloon.

Tungod sa dili-isog nga lasa sa bulak sa kalabasa, maayo kining isagol sa lainlaing mga potahe. Kasagaran, among gisahon ang ahos ug sibuyas bombay ug tingali saktan kana ug diyutayng atsal. Kon kining tanan maayo na nga pagkasagol ug ang ahos sihag na, among ilunod ang hinugasan ug inad-ad nga mga bulak nga gikuhaan ug mga pungango. Unya ang sinagol takpan ug pabukalan sulod sa pipila ka minutos. Ang zucchini nga hiniwa nga kuwadrado, linghod nga mga lugas sa mais, diyutayng mantekilya, ug humot nga mga yerba mahimong idugang usab uban sa mga bulak. Among ibutang ang sinagol diha sa hilaw nga tortilla ug pil-on kini. Dayon, among lutoon ang tortilla sa lapad nga lutoan, nga mahimong usa ka lamian nga quesadilla nga bulak sa kalabasa.

Ang among quesadilla dili lang lamian kondili sustansiyado pa tungod kay ang bulak sa kalabasa adunay diyutayng protina, kalsiyum, iron, thiamine, niacin, ascorbic acid, ug retinol.

Magluto usab kami ug lamian nga sabaw uban niining bulaka. Sundon lang namo ang pamaagi sa ibabaw, dugangan kinig sabaw sa manok, ug idalit samtang init. Mahimo namo kining buliborag keso ug pinirito nga hiniwang mga tortilla.

Daghan pang ubang potahe ang maluto uban niining mapuslanong bulak. Busa nganong dili maglutog potahe nga sinagolan ug mga bulak sa kalabasa? Seguradong magustohan gayod nimo kini!