“Hinumdomi ang Imong Maglalalang”

“Hinumdomi ang imong Maglalalang samtang bata ka pa! Sa umaabot nga mga tuig, ikaw mabug-atan unya sa mga kalisdanan ug moingon, ‘Wala na ko malipay sa kinabuhi.’”​—Ecclesiastes 12:​1, “Contemporary English Version.”

ANG teksto nga gihisgotan sa ibabaw makapahinuklog. Kas-a ka lang moagi sa pagkabatan-on. Sa ulahi, imong handomon ang katuigan sa imong pagkabatan-on, kaha uban ang malipayong katagbawan o ang masakit nga pagbasol. Hain man unya niana ang imong situwasyon? Sa unsang paagi magiyahan nimo ang sangpotanan?

“Hinumdomi ang imong Maglalalang,” nag-awhag ang Bibliya, sumala sa gikutlo sa ibabaw. Sa unsang paagi mahimo nimo kana? Pinaagi sa pagsunod sa mga balaod ug mga prinsipyo sa Diyos, nga gihatag diha sa iyang Pulong, ang Bibliya. Wala kini magpasabot nga mahimo kang panatiko kaayo, nga hikawan nimo ang imong kaugalingon sa tanang kalipay. Sa kasukwahi, ang paghinumdom sa imong Maglalalang moresulta sa pagkabaton nimo ug kinadak-ang kalipay nga posible. Sa unsang paagi maposible kana?

Sa pag-ilustrar, handurawa nga gihatagan ka ug awto ug lisensiya sa pagmaneho. Ang makapahinam nga bag-ong kagawasan anaa sa imong atubangan, nga makahatag kanimog dakong kalipay. Hunahunaa lang ang mga dapit nga imong maadtoan! Apan, ang imong bag-ong nadawat nga kagawasan naglangkit ug bug-at nga responsibilidad. Samtang nagmaneho, kinahanglang sundon nimo ang mga balaod sa trapiko ug hatagag pagtagad ang mga signal sa trapiko, limitasyon sa gikusgon sa dagan sa sakyanan, ug mga pasidaang timaan. Kini bang maong responsibilidad maghikaw kanimo sa imong kalipay sa pagmaneho? Dili gayod! Gani, kini nagsilbing proteksiyon. Dili ka gayod malipay kon maaksidente ka, dili ba?

Susama usab kana sa kagawasan nga gihatag kanimo sa imong Maglalalang, si Jehova nga Diyos. Samtang nagakahamtong ka, papilion ka niya kon unsaon nimo paggamit ang imong kinabuhi. (Deuteronomio 30:19; Proverbio 27:11) Pagkatalagsaong pribilehiyo kana! Apan ang maong kagawasan naglangkit ug dakong responsibilidad. Diha sa iyang Pulong, si Jehova naghatag ug ‘mga balaod sa trapiko’​—mga sukdanan nga gusto niyang sundon nimo. Makababag ba sa imong kalipay kining maong mga sukdanan? Dili gayod! Hinunoa, kini manalipod kanimo batok sa kaguol ug kasakit nga nag-apektar sa daghang batan-on karon.

Si Federico, nga karon kapin na sa 30 anyos,  nahibalo nga tinuod gayod kana. Sa batan-on pa, nakita niya ang iyang mga eskolmet nga nalangkit sa tanang matang sa kalihokan nga iyang nahibaloan nga angay niyang likayan. “Morag malipayon kaayo sila,” matod niya, “apan wala gyod ko maghunahuna nga sila tinuod nga malipayon.” Sa paghinumdom, si Federico nalipay nga adunay mga sukdanan sa Bibliya nga naggiya kaniya latas sa pagkabatan-on. “Tinuod, dihay mga problema nga akong gipakigbisogan, sama ni bisan kinsang batan-on,” matod niya. “Apan gipanalipdan gayod ako sa Bibliya. Ug subsob nga dihay isigka-Kristohanon nga andam motabang kanako. Ang pagsunod sa mga prinsipyo sa Bibliya nakahatag kanako ug mas dakong kalipay kay sa akong mahanduraw!”

Gusto ni Jehova nga Diyos nga magmalipayon ka​—tinuod nga malipayon. Kana dili taphaw nga kalipay nga nagtago lamang sa nagpahipi nga kaguol. Ang Bibliya nag-ingon: “Tagamtama ang imong pagkabatan-on. Magmalipayon samtang bata ka pa.” Apan ang mao gihapong bersikulo sa Bibliya naghatag ug pasidaan. “Hinumdomi,” kini nag-ingon, “nga pagahukman ka sa Diyos sa bisan unsa nga buhaton nimo.”​—Ecclesiastes 11:​9, Today’s English Version.

Hinumdomi ang imong Maglalalang pinaagi sa maalamong paggamit sa kagawasan nga iyang gihatag kanimo. Kon buhaton nimo kana, makaseguro ka nga ang imong Maglalalang mahinumdom kanimo ug siya mohatag kanimo sa kinadak-ang kalipay nga posibleng bation. Ang Bibliya nag-ingon: “Ang panalangin ni Jehova​—mao kana ang makapadato, ug dili niya kana dugangan ug kasakit.”​—Proverbio 10:22.

Aron matabangan ang mga batan-on sa pagsagubang sa mga pagsulay sa pagkabatan-on, ang mga Saksi ni Jehova nagpatik ug 320-panid nga publikasyon nga nag-ulohang Mga Pangutanang Gisukna sa mga Batan-on . . . Mga Tubag nga Mosaler. Sa pagkakaron, duolan sa 34 ka milyong kopya niining libroha ang gipatik diha sa 77 ka pinulongan. Makakuha ka ug kopya pinaagi sa pagkontak sa mga Saksi ni Jehova diha sa imong silinganan.

[Mga hulagway sa panid 8, 9]

Makatabang Kanimo sa Paglampos Ingong Batan-on

Paggahin ug panahon sa pagbasa sa Pulong sa Diyos

Paghago diha sa ministeryo

Likayi ang daotang panag-uban

Pakigsulti kanunay sa imong mga ginikanan

[Credit Line]

Brochure cover: Pictorial Archive (Near Eastern History) Est.