Unsay Kahulogan sa Pagkahimong Ulo sa Pamilya?
Ang Hunahuna sa Bibliya
Unsay Kahulogan sa Pagkahimong Ulo sa Pamilya?
SUMALA sa Bibliya, “ang ulo sa usa ka babaye mao ang lalaki.” (1 Corinto 11:3; Efeso 5:23) Apan daghang nag-angkon nga nagtahod sa Bibliya nagtuo nga kining maong prinsipyo nga ang bana mao ang ulo maoy kinaraan na ug peligroso pa. “Ang doktrina nga ang mga babaye angayng ‘magpasakop nga kinasingkasing’ [sa ilang mga bana], kon ipadapat sa sobrang paagi, mahimong motultol sa pag-abuso, sa pisikal ug sa emosyonal nga paagi,” miingon ang usa ka magtiayon. Ikasubo, ang pag-abuso sa pagkaulo kaylap na kaayo. “Ang pagkulata sa asawa,” matod pa sa usa ka awtor, “giisip na nga bahin sa kinaiyanhong kahikayan diha sa daghang nasod—usa ka katungod sa kalalakin-an nga gidayeg diha sa mga awit, panultihon ug mga seremonyas sa kasal.”
Ang uban nag-ingon nga ang prinsipyo sa Bibliya sa pagkaulo mao ang nakaingon sa maong mga kapintasan. Ang pagtulon-an ba sa Bibliya bahin sa pagkaulo nagpakaulaw sa mga babaye ug nag-aghat sa paghimog kapintasan diha sa panimalay? Unsa ba gayoy kahulogan sa pagkahimong ulo sa pamilya? a
Ang Pagkaulo Dili Pagpanglupig
Ang Biblikanhong pagkaulo maoy usa ka mahigugmaong kahikayan ug wala gayod magkahulogan ug pagpanglupig. Ang pagsalikway sa tinudlo-sa-Diyos nga awtoridad mao ang hinungdan sa subsob nga pintas nga paggahom sa mga lalaki ibabaw sa mga babaye. (Genesis 3:16) Sukad pa sa tanaman sa Eden, ang mga lalaki kanunayng nag-abuso sa ilang gahom, mapintasong nagpahimulos sa uban, nga naglakip sa mga babaye ug mga bata.
Apan, dili gayod kana bahin sa katuyoan sa Diyos. Gidumtan ni Jehova kadtong nag-abuso sa ilang awtoridad. Iyang gihukman ang Israelinhong mga lalaki nga ‘nagluib’ sa ilang mga asawa. (Malaquias 2:13-16) Dugang pa, ang Diyos nag-ingon nga “si bisan kinsa nga nahigugma sa kapintasan ginadumtan gayod sa Iyang kalag.” (Salmo 11:5) Busa ang mga dagmalan sa asawa ug ang uban pang mga abusado dili gayod makagamit sa Bibliya sa pagpakamatarong sa ilang mapintas nga mga buhat.
Unsay Nalangkit sa Hustong Pagkaulo?
Ang pagkaulo maoy paninugdang kahikayan nga gigamit sa Diyos aron mahuptan ang kahusay sa tibuok uniberso. Gawas sa Diyos, ang tanan may tulubagon sa uban. Ang mga lalaki magpasakop kang Kristo, ang mga anak magpasakop sa ilang mga ginikanan, ug ang tanang Kristohanon magpasakop sa mga kagamhanan. Bisan si Jesus magpasakop sa Diyos.—Roma 13:1; 1 Corinto 11:3; 15:28; Efeso 6:1.
Ang pagpasakop sa pamunoan gikinahanglan aron mahimong hapsay, lig-on ang katilingban. Sa samang paagi, ang pagpasakop ngadto sa ulo sa pamilya hinungdanon sa pagtukod ug malig-on, malipayon, malinawon nga pamilya. Ang kawalay-bana o amahan diha sa pamilya dili makausab niining kamatuorana. Sa mga pamilya nga ingon niana ang kahimtang, ang inahan mao ang moabaga sa pagkaulo. Kon wala ang amahan ug inahan, ang kinamagulangang anak o laing paryente mahimong maoy mopas-an sa papel sa pagkaulo sa panimalay. Sa tanang kahimtang, ang mga membro sa pamilya makabenepisyo kon ilang ipakita ang nahiangayng pagtahod sa usa nga giawtorisahan sa pagpanguna.
Busa, ang yawi dili mao ang pagsalikway sa prinsipyo sa pagkaulo kondili, ang pagkakat-on sa pagpasundayag ug hustong panglantaw sa pagkaulo. Si apostol Pablo nag-awhag sa Kristohanong mga bana nga mahimong ulo sa ilang panimalay “ingon nga si Kristo usab maoy ulo sa kongregasyon.” (Efeso 5:21-23) Busa, gipunting ni Pablo ang paagi sa pagdumala ni Kristo sa kongregasyon ingong hingpit nga sukdanan sa pagkaulo. Unsa ang panig-ingnan nga gihatag ni Kristo?
Bisan tuod ingong Mesiyas ug umaabot nga Hari, si Jesus adunay awtoridad gikan sa Diyos mismo ug mas intelihente ug mas eksperyensiyado sa kinabuhi kay sa iyang mga tinun-an, siya mahigugmaon, malumo, ug mabination. Siya dili gayod mapig-oton, tig-a ug kasingkasing, o sobra ka pugoso. Siya wala magharihari ug magsigeg pahinumdom sa tanan nga siya ang Anak sa Diyos. Si Jesus mapaubsanon. Tungod niana, ang ‘iyang yugo masayon ug ang iyang luwan magaan.’ (Mateo 11:28-30) Busa, siya daling duolon ug makataronganon. Gani, si Pablo miingon nga gihigugma pag-ayo ni Jesus ang kongregasyon nga iyang ‘gitugyan ang iyang kaugalingon alang niini.’—Efeso 5:25.
Sa Unsang Paagi Masundog sa Usa ang Pagkaulo ni Jesus?
Sa unsang paagi masundog sa mga ulo sa pamilya ang mga hiyas ni Kristo? Ang usa ka responsableng ulo magpakitag kahingawa sa pisikal ug espirituwal nga kaayohan sa iyang pamilya. Isakripisyo niya ang iyang kaugalingon pinaagi sa paghatag ug nahiangayng panahon ug pagtagad sa ilang indibiduwal ug katibuk-an nga mga panginahanglan. Unahon niya ang kaayohan sa iyang kapikas ug sa iyang mga anak. b (1 Corinto 10:24; Filipos 2:4) Pinaagi sa pagpadapat sa mga prinsipyo ug mga pagtulon-an sa Bibliya diha sa iyang adlaw-adlaw nga pagkinabuhi, maangkon sa bana ang pagtahod ug pagpaluyo sa iyang asawa ug mga anak. Ilalom sa iyang mahigugmaong pagkaulo, magmalamposon ang ilang tiningob nga mga paningkamot sa pagsagubang sa bisan unsang mga problema. Busa, pinaagi sa pagpasundayag sa iyang pagkaulo sa Kasulatanhong paagi, ang bana nagatukod ug usa ka malipayong pamilya, usa nga nagalihok alang sa kahimayaan ug kadayeganan sa Diyos.
Ang usa ka maalamong ulo mapainubsanon usab. Kon gikinahanglan, siya andam nga mangayog pasaylo, bisan pag malisdan siya sa pag-angkon sa iyang sayop. Ang Bibliya nag-ingon nga dunay kaluwasan “diha sa panon sa mga magtatambag.” (Proverbio 24:6) Oo, ang pagkamapainubsanon motukmod usab sa usa ka ulo sa pamilya sa pagpamati ug pagtimbangtimbang sa opinyon sa iyang asawa ug mga anak kon nahiangay. Pinaagi sa pagsundog kang Jesus, mapaneguro sa usa ka Kristohanong ulo nga ang iyang pagkaulo dili lamang magdalag kalipay ug kasegurohan sa iyang pamilya kondili magpasidungog ug maghimaya usab sa Tagmugna sa mga pamilya, si Jehova nga Diyos.—Efeso 3:14, 15.
[Mga footnote]
a Bisan tuod kining artikuloha sa panguna naghisgot sa papel sa bana ug amahan diha sa pamilya, ang nag-inusarang mga inahan ug ang mga ilo nga kinahanglang mag-atiman sa ilang mga igsoon mahimong makabenepisyo usab gikan sa mga prinsipyo nga gihatag ngadto sa mga ulo sa pamilya.
b Ang librong Ang Sekreto sa Kalipay sa Pamilya, nga gipatik sa mga Saksi ni Jehova, naghatag ug praktikal nga mga sugyot kon unsaon pag-atiman ang pamilya sa mahigugmaong paagi.
[Hulagway sa panid 26]
Ang usa ka makataronganong bana magtagad sa mga hunahuna sa iyang asawa ug mga anak