Asa Nimo Makaplagan ang Sukdanan sa Maayong Pamatasan?

KITA nagpuyo sa usa ka kalibotan diin nagakausab ang mga sukdanan sa maayong pamatasan. Ang malimbongong mga buhat nga gisaway kaniadto kasagarang gidawat na karon. Ang mga kawatan ug mga mangingilad kanunayng gidayeg ug gipakabayani diha sa mga salida ug basahon. Tungod niini, daghang tawo ang nahisama nianang gihubit diha sa Bibliya: “Sa diha nga ikaw makakita ug kawatan, ikaw nahimuot pa kaniya.”​—Salmo 50:18.

Apan, ang mga mangingilad dili gayod angayng dayegon. Ang usa ka awtor miingon: “Ang nakapalahi sa mga mangingilad mao ang ilang natural nga abilidad, nga  kasagarang madiskobrehan sa linghod pa kaayong edad, sa pagmaniobra sa mga tawo sa ilang palibot. Dugang pa, sila dili mobati nga sad-an o nagbasol sa ilang pagmaniobra sa uban. Sa kasukwahi, kini naghatag kanila ug dakong katagbawan​—usa ka matang sa kalipay nga nagdasig kanila sa pagpadayon sa pagmaniobra sa uban aron makuha ang ilang gusto, bisag unsa pay daotang epekto niini ngadto sa biktima.”

Tinuod, ang mga tawo maluoy sa balo nga giilad ang iyang tinigom, apan wala kaayoy maluoy sa dihang dunay makadispalko ug kuwarta sa dagkong mga negosyo o dunay manikas sa kompaniya sa insyurans. Daghan ang mangatarongan nga wala ra kiniy kaso sanglit sapian man ang mga negosyante. Apan ang maong pagpanglimbong dili kay problema lang sa mga negosyante mismo; ang ilang alkanse ilang bawion gikan sa mga pumapalit. Sa Tinipong Bansa, pananglitan, ang ordinaryong pamilya mobayad ug kapin sa $1,000 matag tuig alang sa dugang bayranan sa insyurans aron mabawi ang alkanse gumikan sa panglimbong.

Dugang pa, daghang tawo ang nagpahimulos sa higayon sa pagpalit ug barato apan imitasyon lang sa ilado nga mga produkto, sama sa sinina, relo, pahumot, kosmetiko, ug mga bag. Lagmit nahibalo sila nga ang mga imitasyon maoy nakaingon nga ang mga negosyo maalkansi ug ginatos ka bilyong dolyar kada tuig, ug nagtuo sila nga dili sila maapektohan niini. Apan, sa kapulihay, ang mga pumapalit kinahanglang mobayad ug mas dako alang sa orihinal nga mga produkto ug mga serbisyo. Dugang pa, ang pagpalit ug mga imitasyon magpadato sa mga kriminal.

Ang usa ka awtor nga ang trabaho maoy pagsumpo sa panglimbong misulat: “Kombinsido ako nga ang pangunang rason kon nganong daghan kaayong panglimbong karon mao nga nagkinabuhi kita sa usa ka katilingban nga wala gayoy sukdanan sa maayong pamatasan. Dako kaayo ang pag-us-os sa sukdanan sa maayong pamatasan nga maoy nakapaugmad sa kultura sa panglimbong. . . . Nagkinabuhi kita sa usa ka katilingban nga wala magtudlo diha sa balay ug mga sukdanan sa maayong pamatasan. Nagkinabuhi kita sa usa ka katilingban nga wala magtudlo diha sa tunghaan ug mga sukdanan sa maayong pamatasan, kay basin akusahon unya ang mga magtutudlo nga namugos sa pagtudlo ug moralidad.”

Sa kasukwahi, ang mga Saksi ni Jehova nagtudlo gayod ug naningkamot sa pagkinabuhi subay sa moral nga mga sukdanan sa Pulong sa Diyos. Sila gigiyahan sa mga prinsipyo sama sa mosunod:

● “Higugmaon mo ang imong silingan sama sa imong kaugalingon.”​—Mateo 22:39.

● “Ayaw pagpanikas.”​—Marcos 10:19.

● “Ang kawatan kinahanglan nga dili na mangawat, hinuon maghago siya, nga magbuhat pinaagi sa iyang mga kamot sa maayong buluhaton, aron siya adunay ikahatag sa nanginahanglan.”​—Efeso 4:28.

● “Buot namong magmaminatud-on sa tanang butang.”​—Hebreohanon 13:18.

Bisan tuod ang mga Saksi dili andakan o nagpakamatarong sa kaugalingon, sila nagtuo nga kon ang tanan magpadapat niining mga prinsipyoha, ang kalibotan mahimong mas maayong dapit nga puy-an. Nagtuo usab sila sa saad sa Diyos nga moabot ra ang adlaw nga kini matuman.​—2 Pedro 3:13.

[Blurb sa panid 11]

Kon ang tanan magpadapat sa moral nga mga sukdanan sa Pulong sa Diyos, ang kalibotan mahimong mas maayong dapit nga puy-an

[Hulagway sa panid 10]

Ang matuod nga mga Kristohanon nagsunod sa mga prinsipyo sa Bibliya, sama sa “Higugmaon mo ang imong silingan sama sa imong kaugalingon”