Gikan sa Among mga Magbabasa

Pagpanguma Nagsulat ako aron magpasalamat sa serye nga “Pagpanguma​—Nganong Anaa sa Krisis?” (Oktubre 8, 2003) Nagpuyo ako sa dapit nga daghag mag-uuma. Tungod sa dili maayong ekonomiya ug uban pang mga hinungdan, ang mga mag-uuma namaligya sa ilang yuta. Daghang balay ang mitungha puli sa mga umahan. Usahay maghunahuna ko kon may mahibilin pa kahang yuta alang sa panguma. Makapahupay ang pagkasayod nga si Jehova magtaganag permanenteng solusyon sa mga suliran sa pagpanguma.

V. A., Tinipong Bansa

Mga Mosaiko Salamat sa artikulo nga “Mga Mosaiko​—Mga Dibuho nga Gigamit ang mga Bato.” (Oktubre 8, 2003) Kadto may larawan sa usa ka mosaiko nga gidispley diha sa duol nga nasodnong parke. Nagpuyo ako duol sa maong parke sa kapin nag napulo ka tuig, ug wala ko pa gayod makita ang maong mga mosaiko. Busa miadto ako sa pagtan-aw niana ug nahingangha pag-ayo. Karon mas naapresyar na nako ang mosaiko nga arte.

E. D., Tinipong Bansa

Gusto gayod ko nga masayod ug dugang bahin sa mga mosaiko​—ilabina sukad nga miadto mi sa kombensiyon sa mga Saksi ni Jehova sa Rusya niadtong 1993. Sa St. Petersburg ug Moscow, nakadayeg mi sa daghan kaayong nindot nga mga mosaiko. Mapasalamaton kami sa mga tiggamag mosaiko nga naggugol ug daghang tuig sa maong mga buhat sa arte ug kaninyo alang sa matulon-anong artikulo.

B. Z., Alemanya

Di-Normal nga mga Estilo sa Kinabuhi Salamat sa artikulo nga “Ang Hunahuna sa Bibliya: Di-Normal nga mga Estilo sa Kinabuhi​—Mouyon ba ang Diyos Niini?” (Oktubre 8, 2003) Ako 17 anyos ug namatuto ingong usa ka Kristohanon. Apan, misugod ako sa pagbaton ug homoseksuwal nga pagbati sa dihang bata pa kaayo ako. Naglibog ko sa akong mga gibati, apan makapahupay ang pagkasayod nga si Jehova nakasabot sa kalisod nga akong gipakigbisogan. Alang niadtong nakigbugno sa maong mga pagbati, ako moingon, Ayawg hunong!

J. M., Tinipong Bansa

Ako gihasol pag-ayo sa malaw-ayng seksuwal nga mga pagbati sa tibuok nakong kinabuhi. Ang inyong artikulo naghisgot sa akong kahimtang. Ang pagkaladlad sa pornograpiya sa sayo kaayong panuigon ug ang pagkahimong biktima sa seksuwal nga pag-abuso nakahatag ug dili maayong epekto kanako. Salamat nga gitabangan ninyo ako sa pagsabot sa akong kaugalingon.

J. B. M., Tinipong Bansa

Kon maghisgot bahin sa mga kapilian sa sekso, maalamon nga konsiderahon ang epekto sa mga butang sama sa mga gene, hormone, paagi sa pagmatuto, ug daghan pang ubang hinungdan. Tinuod gayod nga kadtong nakigbugno sa homoseksuwal nga pagbati makabaton ug pagpaluyo sa Kristohanong kongregasyon.

D. L., Britanya

Ang “Pagmata!” nagtubag: Nahingawa kami niadtong nakigbugno batok sa ilang seksuwal nga pagbati. Ingon sa gipakita sa among artikulo, komplikado ang mga hinungdan sa maong suliran. Apan kon dili tuyoon sa usa ang pag-ugmad o pagbuhat sa maong imoral nga mga tinguha, siya magpabiling hinlo sa panan-aw ni Jehova. Magmasaligon nga si Jehova nga Diyos malipay kon ang mga indibiduwal maningkamot sa pagpabiling hinlo sa moral.​—Proverbio 27:11.

Mga Windmill Nalingaw ako sa artikulo nga “Mga Windmill​—Mga Pahinumdom sa Kanhiayng Panahon.” (Oktubre 8, 2003) Nakat-onan nako nga ang mga windmill wala lang gamita sa paggaling ug mga lugas aron himoong harina kondili sa daghan pang ubang mga katuyoan. Usa lang ako ka bayong nga nagdako sa uma, ug dili nako mapadayag sa bug-os ang akong pasalamat sa impormasyon nga inyong gipatik.

S. A., Rusya

Giapresyar ang Pagmata! Salamat sa inyong Oktubre 8, 2003 nga gula. Mao kini ang unang higayon nga nahurot nakog basa ang tibuok magasin. Apan nasabtan nako nga kinahanglang basahon nako ang tanang tagana ni Jehova kanato. Abi ninyo, nahingangha ako nga makaiikag man diay kaayo kini! Anugon kaayo nga dugay na kong nagadawat niining nindot nga magasin apan wala magbasa nianang tanan kaniadto!

R. K., Japan