Sa Dihang Naghinobra na ang Kabalaka Bahin sa Panagway

SA DIHANG ang kadaghanan kanato manalamin, makita nato ang mga parte sa lawas nga atong gibati nga mahimong moarang-arang. Busa atong hapsayon ang atong sinina o buhok o magmek-ap kitag diyutay ug dayon andam na kitang mohimo sa atong adlaw-adlaw nga kalihokan. Ang maong kabalaka bahin sa atong panagway maoy normal ug angayan. Apan ang ubang mga tawo sobrang nabalaka sa ilang mga panagway nga tungod niana mitungha ang kahimtang nga gitawag ug body dysmorphic disorder, o BDD.

Ang The Merck Manual of Diagnosis and Therapy naghubit sa BDD ingong “naghingaping kabalaka sa depekto diha sa panagway, nga nagpahinabo ug dakong kaguol o nakabalda sa pagpakighugoyhugoy, sa trabaho, o sa ubang hinungdanong mga kalihokan.” a Tungod kay ang nag-antos niini maghanduraw tingali ug usa ka depekto o nagpadako sa usa ka gamayng apan, ang ilang panglantaw sa kaugalingon gitawag usab ug hinanduraw nga kangil-ad.

Si Propesor J. Kevin Thompson sa University of South Florida, sa Tinipong Bansa, nag-ingon nga ang BDD lagmit talagsaon, “tingali nag-apektar tali sa 1.0-2.0% sa katibuk-ang populasyon ug 10-​15% sa mga pasyenteng magpatambal sa sikyatrista nga wala magpaadmit sa ospital.” Apan, siya midugang: “Ang ubang tigpanukiduki nagtuo nga nagkadaghan ang aduna niining maong kahimtang, tungod kay ang mga pamaagi sa pagdayagnos mas makatiktik na sa problema ug tungod kay ang mga tawo misamot ka mahunahunaon sa panagway.” Bisan tuod ang maong kahimtang makaapektar sa mga tawo sa tanang panuigon, kini subsob nga magsugod sa pagkatin-edyer. Kon bahin sa mga hamtong, morag parehong naapektahan ang mga lalaki ug babaye. Lahi kaayo kini sa mga abnormalidad sa pagkaon, nga mas komon diha sa mga babaye.

Ang makadaot nga pagsigeg hunahuna sa panagway nga kasagaran  diha sa mga tawo nga dunay BDD kasagarang mosangpot sa subsob kaayong pagpanalamin ug, sa pipila ka kaso, mosangpot pa gani sa pagpalayo gikan sa katilingban. Mas grabe pa, ang “kaguol ug pagkadili-makaobra nga nalangkit sa maong abnormalidad mahimong mosangpot sa balikbalik nga pagkaospital ug paghunahunang maghikog,” nag-ingon ang Merck Manual. Dili ikatingala nga ang ubang nag-antos niini gustong magpailalom sa cosmetic surgery. “Kasagaran dili nako kini irekomendar,” matod pa ni Dra. Katharine Phillips, kinsa nakasulat na ug libro bahin sa BDD. “Human maoperahi dili na mahimong mahibalik pa sa kanhing panagway,” siya miingon, “ug kadaghanang tawo nga dunay BDD kasagarang mobati nga dili malamposon ang operasyon.” b

Usahay, ang BDD mopadayag sa linghod pa nga panuigon. Ang George Street Journal c nagtaho bahin sa usa ka sayis-anyos nga batang lalaki “kinsa nagtuo nga ang iyang ngipon dalag, ang iyang tiyan ‘tambok,’ ug ang iyang buhok dili maayong tan-awon. Dili makita sa uban ang iyang ‘mga depekto.’ Manudlay siya ug duolan sa usa ka oras kada buntag, ug kon dili pa siya matagbaw iyang ituslob ang iyang ulo sa tubig ug manudlay na usab, nga kasagaran madelatar siya sa eskuylahan.” Usa ka adlaw niana, pag-abot niya sa klinika sa doktor, miluhod pa gani siya aron tan-awon ang iyang nawong diha sa sinaw nga lingkoranan.

Ayaw Tugoti nga ang Kalibotan Maoy Mogahom sa Imong Tinamdan

Diha sa mga magasin nga naghisgot bahin sa mga urog, mantalaan, ug mga panganunsiyo sa telebisyon nagbaha ang mga hulagway sa hingpit nga pigura. Ang pangatarongan sa mga tigpaanunsiyo simple lang: Ipresentar ang usa ka panagway ingong normal, ug ang mga tawo mogasto sa kuwarta nga ilang gihagoan aron mabatonan ang maong panagway. Pun-an pa sa diyutayng pagpit-os sa isigkaingon ug sa pipila tingali ka dili-mahunahunaong mga komento gikan sa pamilya o mga higala, dili ikatingala nga ang ubang mga tawo nakabaton ug dili-timbang nga panglantaw sa ilang panagway. d Siyempre, ang dili-timbang nga panglantaw mahimong lahi kaayo gikan sa obsessive psychiatric disorder.

Dili kinaiyanhon ug dili tinuod ang paghunahuna nga kon dili ka guwapa o guwapo, ang uban dili ganahan nimo. Kasagaran ang mga tawo dili mopili ug mga higala sumala sa panagway. Tinuod, ang panagway hinungdanon tingali sa sinugdan, apan ang kinaiya, moral nga mga sukdanan, ug mga prinsipyo mao ang tinuod nga magpalig-on sa panaghigalaay. Sa pipila ka paagi ang matag usa kanato susama sa usa ka libro—tingali nindot kinig hapin, apan kon ang unod niini makalaay, sa dili madugay ang nagbasa niana mohunong na pagbasa. Apan, bisag unsa pay hapin, kon makalingaw ang libro, padayonon gayod kana pagbasa. Busa nganong dili isentro ang pagtagad nganha sa imong mga hiyas? Mao kana ang gidasig kanimo sa Pulong sa Diyos, ang Bibliya, nga buhaton.​—Proverbio 11:22; Colosas 3:8; 1 Pedro 3:​3, 4.

Sa tinuoray lang ang atong panagway mausab samtang magkahamtong kita. Kon ang kinabuhi, panaghigalaay, ug kalipay nagdepende sa katahom sa pagkabatan-on, pagkamakapasubo sa atong umaabot! Apan, mahimong dili ingon niana ang atong kahimtang. Sa unsang paagi maposible kana?

Dumalayon nga Katahom

Ang Proverbio 16:31 nag-ingon: “Ang pagkaubanon maoy usa ka purongpurong sa katahom sa dihang makaplagan kini sa dalan sa pagkamatarong.” Sa mga mata ni Jehova nga Diyos​—ug sa mga mata sa tanan nga nakabaton sa iyang panglantaw​—dili momenos ang katahom sa mga tawo nga natigulang na sa pag-alagad sa Diyos. Sa pagkatinuod, tungod sa ilang rekord sa kasibot ug diyosnong debosyon, ilang mabatonan ang ilang purongpurong sa katahom inigkatigulang na. Ang maong bililhong mga indibiduwal takos sa atong gugma ug halalom nga pagtahod.​—Levitico 19:32.

Gawas pa, si Jehova, sa umaabot nga bag-ong kalibotan nga iyang gisaad, magwagtang sa mga epekto sa napanunod nga kasal-anan diha sa tanang maunongon kaniya, bata ug tigulang. Sa paglabay sa matag adlaw, ilang makita ug mabatyagan nga ang ilang lawas moarang-arang hangtod nga sa kataposan ilang makab-ot ang tayuktok sa pisikal nga kahingpitan. (Job 33:25; Pinadayag 21:​3, 4) Pagkakulbahinam nga palaaboton kana! Gusto ba nimong mahilakip kanila? Kon mao, panlimbasogi nga mahatagan ug dakong pagtagad ang katahom nga hinungdanon gayod, ug ayawg tugoti ang taphaw, ug subsob dili-mabination, nga panghunahuna sa kalibotan nga mogahom sa imong tinamdan. Sa pagbuhat nimo niana, ikaw mahimong mas malipayon ug mas madanihon nga tawo.​—Proverbio 31:30.

[Mga footnote]