Mga Batan-on Nangutana . . .

Unsay Daotan sa Pagpakigsekso Una Magminyo?

“Usahay maghunahuna ko kon daotan ba gayod ang pagpakigsekso una magminyo, ilabina sa dihang lain kog bation tungod sa akong pagkaulay gihapon.”​—Jordon. a

“Gibati nako ang kapit-os nga mosulay sa pagpakigsekso. Nagtuo ko nga kitang tanan dunay kinaiyanhong kiling niana,” matod pa ni Kelly. “Bisan asa ka moadto,” siya mipadayon, “ang tanan hilig sa sekso!”

MOUYON ka ba sa gibati ni Jordon ug Kelly? Kon buot hunahunaon, ang naandang mga kostumbre ug mga prinsipyo nga kaniadto wala magdasig sa pagpakigsekso una magminyo halos nahanaw na. (Hebreohanon 13:4) Ang surbi diha sa usa ka nasod sa Asia nagbutyag nga ang kadaghanan sa mga lalaki nga nag-edad ug 15 ngadto sa 24 anyos mibati nga ang pagpakigsekso una magminyo wala lamang dawata kondili gidahom kanila. Dili ikatingala nga sa tibuok kalibotan kadaghanan sa mga batan-on nakasulay na sa pagpakigsekso sa wala pa sila mag-edad ug 19 anyos.

Unya dunay mga batan-on nga modumili sa pagpakigsekso apan makigbahin nianang gitawag ug mga kapuli sa pagpakigsekso, sama sa pag-ugay-ugay sa kinatawo sa usag usa (nga usahay gitawag ug dungan nga masturbasyon). Ang usa ka makapakurat nga taho sa The New York Times nagbutyag nga ang “pagpakigsekso pinaagi sa baba mao nay naandan nga unang pagtilaw sa seksuwal nga buhat, nga kaylap nga giisip sa daghang batan-on ingong dili-kaayo suod, ug dili-kaayo peligroso, kon itandi sa pagpakigsekso . . . [ug] ingong usa ka paagi sa paglikay sa pagsabak ug sa pagpreserbar sa ilang pagkaulay.”

Unsa ba gayoy angayng panglantaw sa usa ka Kristohanon sa pagpakigsekso una magminyo? Ug komosta man ang mahitungod sa giingong mga kapuli sa pagpakigsekso? Dalawaton ba kini sa Diyos? Luwas ba kini? Ug tinuod ba gayong mapreserbar niini ang pagkaulay sa usa?

Kon Unsay Nalakip sa Pakighilawas

Ang kasaligang tubag niining mga pangutanaha maggikan lamang sa atong Maglalalang​—si Jehova nga Diyos. Ug diha sa iyang Pulong kita giingnan niya nga ‘mokalagiw sa pakighilawas.’ (1 Corinto 6:18) Unsa ba gayoy kahulogan niana? Ang Gregong pulong nga gihubad nga “pakighilawas” wala lamang magtumong sa pagpakigsekso kondili naglakip sa nagkalainlaing malaw-ay nga mga buhat sa sekso. Busa kon ang duha ka dili-minyong tawo makigsekso pinaagi sa baba o mag-ugay-ugay sa kinatawo sa matag usa, sila nakighilawas.

Apan maisip pa ba gihapon silang mga ulay​—sa ato pa, sa mga mata sa Diyos? Diha sa Bibliya ang pulong “ulay” gigamit ingong simbolo sa moral nga kaputli. (2 Corinto 11:2-6) Apan gigamit usab kini sa pisikal nga diwa. Ang Bibliya naghisgot bahin sa usa ka batan-ong babaye nga ginganlag Rebeca. Kini nag-ingon nga siya maoy “usa ka ulay, ug wala pay lalaki nga nakadulog kaniya.” (Genesis 24:16) Makaiikag, diha sa orihinal nga Hebreohanon, ang pulong alang sa “pagpakigdulog” dayag nga naglakip sa ubang mga buhat gawas sa normal nga pagdulog sa lalaki ug babaye. (Genesis 19:5) Busa, sumala sa Bibliya, kon ang usa ka batan-on malangkit sa bisan  unsang matang sa pakighilawas, siya dili na maisip nga ulay.

Ang Bibliya nagtambag sa mga Kristohanon sa pagkalagiw dili lang sa pakighilawas kondili sa tanang matang sa mahugaw nga panggawi nga motultol ngadto niana. b (Colosas 3:5) Biaybiayon ka tingali sa uban tungod sa maong baroganan. “‘Wala lang ka masayod kon unsay imong nasayloan!’ mao ang kanunay nakong madungog sa dihang nag-eskuyla ko sa hayskul,” matod pa sa usa ka Kristohanong batan-on nga ginganlag Kelly. Apan, ang pagpakigsekso una magminyo wala gayoy kalainan sa “umalaging kalipay sa pagpakasala.” (Hebreohanon 11:25) Kini makapahinabo ug dumalayong pisikal, emosyonal, ug espirituwal nga kadaot.

Seryosong mga Kapeligrohan

Ang Bibliya nagtug-an kanato nga si Haring Solomon kas-a nakakita ug usa ka batan-ong lalaki nga gihaylo sa pagpakigsekso una magminyo. Gitandi ni Solomon ang maong batan-ong lalaki ngadto sa “usa ka torong baka nga nagapadulong sa pagkaihaw.” Ang usa ka torong baka nga hapit nang ihawon morag walay kalibotan kon unsay hapit nang mahitabo niini. Ang mga batan-on nga makigsekso una magminyo sagad molihok sa samang paagi​—daw sila wala kaayo o wala gayod magpakabana nga dunay seryosong mga sangpotanan sa ilang mga lihok! Si Solomon miingon bahin sa maong batan-ong lalaki: “Wala siya mahibalo nga nalangkit niini ang iyang kalag.” (Proverbio 7:​22, 23) Oo, ang imong “kalag”​—ang imong kinabuhi​—mao ang nameligro.

Pananglitan, matag tuig milyonmilyong batan-on ang natakdan sa sakit nga mapasa sa pagpakigsekso. “Sa dihang nahibaloan nako nga duna koy herpes, gusto kong molayas,” matod pa ni Lydia. Siya mimulo, “Kini maoy usa ka masakit nga balatian nga dili gayod maayo.” Kapin sa katunga sa tanang bag-ong mga impeksiyon sa HIV sa tibuok kalibotan (6,000 kada adlaw) nahitabo niadtong nag-edad ug tali sa 15 ug 24 anyos.

Ang mga babaye mao ang ilabinang daling maapektohan sa daghang problema nga nalangkit sa pagpakigsekso una magminyo. Gani, ang hulga sa mga sakit nga mapasa sa pagpakigsekso (nga naglakip sa HIV) mas taas diha sa mga babaye kon itandi sa mga lalaki. Kon ang usa ka batan-ong babaye momabdos, siya labi pang nagpameligro sa iyang kaugalingon ug sa iyang gimabdos. Ngano man? Tungod kay ang lawas sa usa ka batan-ong babaye mahimong wala pa maugmad ngadto sa punto nga makaarang sa pagpanganak sa luwas nga paagi.

Bisan pag ang usa ka tin-edyer nga inahan makalingkawas sa grabeng mga epekto diha sa panglawas, kinahanglang atubangon gihapon niya ang  seryosong mga kaakohan nga dala sa pagkaginikanan. Nakaplagan sa daghang batan-ong babaye nga ang pagsuportar sa ilang kaugalingon ug sa bag-ong natawo nga bata mas lisod diay kay sa ilang gihunahuna.

Gawas pa, adunay espirituwal ug emosyonal nga mga epekto. Ang sala ni Haring David labot sa sekso nagpameligro sa iyang panaghigalaay uban sa Diyos ug hapit gayong mitultol ngadto sa iyang espirituwal nga kadaot. (Salmo 51) Ug bisan tuod si David naulian sa espirituwal, siya nag-antos sa mga epekto sa iyang sala sa tibuok niyang kinabuhi.

Ang mga batan-on karong adlawa mahimong mag-antos sa samang paagi. Pananglitan, sa dihang siya 17 anyos pa lang, si Cherie nakigsekso sa usa ka batan-ong lalaki. Nagtuo siya nga gihigugma siya sa maong lalaki. Mga katuigan sa ulahi, gibasolan gihapon niya ang iyang nabuhat. Siya mimulo: “Wala kaayo nako pabilhi ang mga kamatuoran sa Bibliya ug nag-antos ako sa mga sangpotanan. Ako nawad-an sa pabor ni Jehova, ug makapaguol kaayo kana.” Ang usa ka batan-on nga ginganlag Trish miangkon usab: “Ang pagpakigsekso una magminyo mao ang kinadak-ang sayop sa akong kinabuhi. Kon mahibalik lang unta ang akong kaputli.” Oo, ang emosyonal nga kadaot molungtad ug daghang katuigan, nga magpahinabog kapit-os ug kasakit.

Pagkat-on sa Pagpugong-sa-Kaugalingon

Ang batan-on nga si Shanda nagpatunghag hinungdanong pangutana, “Nganong hatagan man sa Diyos ang mga batan-on ug tinguha nga makigsekso, nga nahibalo man unta siya nga dili nila angayng gamiton kana hangtod maminyo na sila?” Tinuod nga ang tinguha sa sekso mas kusganon panahon “sa pagbuswak sa pagkabatan-on.” (1 Corinto 7:36) Gani, ang mga tin-edyer mahimong makasinati ug kalit nga pagkapukaw sa seksuwal nga gana bisag walay dayag nga hinungdan. Apan dili kini daotan. Kini maoy normal nga bahin sa pag-ugmad sa sistema sa pagsanay. c

Tinuod usab nga katuyoan ni Jehova nga ang seksuwal nga relasyon makahatag ug kalipay. Kini nahiuyon sa iyang orihinal nga katuyoan alang sa mga tawo sa pagpuno sa yuta. (Genesis 1:28) Bisan pa niana, dili gayod katuyoan sa Diyos nga atong gamiton ang atong mga gahom sa pagsanay sa dili-hustong paagi. “Ang matag usa kaninyo kinahanglang mahibalo kon unsaon paghupot sa iyang kaugalingong sudlanan diha sa kabalaan ug kadungganan,” nag-ingon ang Bibliya. (1 Tesalonica 4:4) Sa diwa, ang pagtagbaw sa matag seksuwal nga gana mahimong sama ka binuang sa pagpanumbag ug tawo sa matag higayon nga masuko ka.

Ang seksuwal nga mga relasyon maoy gasa gikan sa Diyos, usa ka gasa nga mahimong kalipayan sa hustong panahon​—kon minyo ka na. Unsay bation sa Diyos sa dihang mosulay kita sa pagpakigsekso gawas sa kaminyoon? Aw, handurawa nga nakapalit kag gasa alang sa usa ka higala. Sa wala pa nimo ikahatag kana sa maong higala, iya kanang gikawat! Dili ka ba masuko? Nan, hunahunaa kon unsay bation sa Diyos sa dihang ang usa ka tawo makigsekso una magminyo, nga mag-abuso sa gasa nga gihatag sa Diyos.

Unsay angay nimong himoon labot sa imong seksuwal nga mga pagbati? Sa yanong pagkasulti, tun-i ang pagkontrolar niana. Pahinumdomi ang imong kaugalingon nga “walay bisan unsang maayo nga ihikaw ni Jehova gikan niadtong nagalakaw nga dili salawayon.” (Salmo 84:11) “Sa dihang maghunahuna ko nga ang pagpakigsekso una magminyo dili kaayo daotan,” matod pa sa usa ka batan-on nga ginganlag Gordon, “akong palandongon ang daotang espirituwal nga mga sangpotanan ug akong maamgohan nga walay sala nga takos ibugti sa akong relasyon uban kang Jehova.” Ang pagpasundayag ug pagpugong-sa-kaugalingon dili tingali sayon. Apan, sama sa gipahinumdom kanato sa batan-ong si Adrian, “kini makahatag kanimo ug hinlo nga tanlag ug usa ka maayong relasyon uban kang Jehova, may kagawasan sa pagsentro sa pagtagad nganha sa mas hinungdanong mga butang, nga dili mobating sad-an o magbasol sa nangaging mga binuhatan.”​—Salmo 16:11.

Dunay daghang maayong katarongan nga imong ‘ayran ang tanang matang sa pakighilawas.’ (1 Tesalonica 4:3) Tinuod, dili gayod kini sayon. Ang umaabot nga artikulo maghisgot sa praktikal nga mga paagi diin imong ‘mahuptang putli ang imong kaugalingon.’​—1 Timoteo 5:22.

[Mga footnote]

[Blurb sa panid 13]

Kon ang usa ka batan-on nakahimo sa bisan unsang matang sa pakighilawas, maisip pa ba siya nga ulay sa mga mata sa Diyos?

[Hulagway sa panid 13]

Ang pakigsekso una magminyo makadaot sa tanlag sa usa ka mahinadlokon-sa-Diyos nga batan-on

[Hulagway sa panid 14]

Kadtong makigsekso una magminyo peligrong matakdan ug sakit nga mapasa sa pagpakigsekso