Gilalang nga May Katakos sa Pagkat-on sa Walay Kataposan

“Nasulod sa matag ulo ang katingalahang tinubdan sa enerhiya, usa ka dasok, hanas nga organo kansang katakos daw padayong nagauswag hangtod nga kini daw walay kinutoban sa dihang labaw pa ang atong nakat-onan bahin niini.”​—TONY BUZAN UG TERENCE DIXON, MGA MAGSUSULAT BAHIN SA SIYENSIYA.

UNSA ka daghan ang makat-onan sa utok? Kanang pangutanaha padayong nakalingaw ug nakapalibog sa mga tigdukiduki. Diha sa The Brain Book, si Peter Russell nagsulat: “Kon mas daghan ang makat-onan bahin sa utok sa tawo, makaplagan ang mas dakong kapasidad ug natagong katakos niini nga labaw pa kaayo kay sa gihunahuna sa nangagi.”

Pananglitan, kon bahin sa memorya ang atong utok adunay labihan ka dakong katakos. “Ang memorya dili samag sudlanan nga inanayng mapuno,” matod ni Russell, “kini mas samag usa ka kahoy nga nagpatubo ug mga kaw-it nga gibitayan sa mga memorya. Ang tanan nga imong mahinumdoman maoy laing hugpong sa mga kaw-it nga mahimong bitayan ug mas daghang bag-ong memorya. Busa ang katakos sa memorya nagapadayon sa pagtubo. Kon mas daghan ang imong nahibaloan, mas modako ang katakos sa hunahuna sa paghupot ug impormasyon.” Kini magdala kanato  balik sa atong pangutana ganina, Nganong ang utok sa tawo adunay labihan ka dako, wala magamit nga katakos?

Ang teoriya sa ebolusyon walay ikahatag nga makataronganong tubag. Tungod kay ang teoriya sa ebolusyon nagdepende pag-ayo sa ideya bahin sa paglahutay sa labing takos, ang ebolusyon makapalibog lang sa masinabtanong mga tawo kon unsay nagpahinabo sa utok sa tawo sa pag-ugmad sa labihan ka dakong katakos niini. Agig ilustrasyon, nganong buhaton man ang labihan ka dakong trak kon ang imong ikarga maoy usa lang ka pala sa balas?

Hinuon, ang Bibliya naghatag sa makapatagbaw, yano apan makataronganong katin-awan. Una, nagsugilon kini kanato nga ang atong unang mga ginikanan​—si Adan ug Eva​—gibuhat diha sa dagway sa Diyos, nga makapabanaag sa kahibulongang mga hiyas sa Diyos. Ikaduha, nagpatin-aw kini nga sila gidisenyo nga mabuhi ug busa makakat-on sa walay kataposan. (Genesis 1:27; 2:​16, 17) Gipabanaag sa utok sa tawo ang maong katuyoan sa Diyos, bisan pag sa pagkakaron kini dili hingpit tungod sa pagsulod sa sala diha sa tawhanong pamilya.​—Roma 5:12.

Apan matuman ang unang katuyoan sa Diyos nga ang yuta mapunog hingpit, mahadlokon-sa-Diyos nga mga tawo nga magpuyo sa Paraiso. Sa pagkatinuod, gihatag ni Jehova ang iyang bugtong nga Anak, si Jesu-Kristo, ingong halad lukat alang kanato aron kita makaangkon ug kinabuhing walay kataposan.​—Mateo 20:28; Juan 3:16.

Ang Labing Maayong Pagkaon Alang sa Hunahuna

Gihatag usab ni Jehova ang iyang inspiradong Pulong, ang Balaang Bibliya. (2 Timoteo 3:16; 2 Pedro 1:21) Tungod kay kining bililhong basahon produkto man sa balaang espiritu, dili pagpasobra ang pag-ingon nga kini naundan sa labing maayong pagkaon sa hunahuna ug espirituwal nga pagkaon alang sa katawhan. (Salmo 19:7-10) Sa pagkatinuod, si Jesus mismo miingon: “Ang tawo mabuhi, dili sa tinapay lamang, kondili sa matag pulong nga magagula sa baba ni Jehova.”​—Mateo 4:4.

Busa kon bata ka man o tigulang, nganong dili mogahin ug diyutayng panahon kada adlaw aron basahon ang bililhong ‘mga pulong’ sa Diyos? Kadtong nagabuhat niana ug nagapadapat kon unsay ilang nakat-onan makabaton ug kaayohan karon ug sa umaabot. Oo, makatagamtam sila sa palaaboton nga mabuhi ug makakat-on sa walay kataposan, sumala gayod sa unang katuyoan sa Diyos. Pagkatalagsaon nga paglaom!​—Ecclesiastes 3:11; Juan 17:3.

[Hulagway sa panid 11]

Sa pagpadayag sa unang katuyoan sa Diyos, ang utok sa tawo gidisenyo aron makakat-on sa walay kataposan

[Mga hulagway sa panid 12]

Ang Bibliya naundan sa labing maayong pagkaon alang sa imong hunahuna