Pagpaniid sa Kalibotan

Mga Spa Alang sa mga Bata

Ang mga sentro alang sa pisikal nga kahimsog nga nagtanyag ug mga spa treatment sa gagmayng mga bata nagkadaghan sa Alemanya ug sa uban pang mga lugar, nagtaho ang Frankfurter Allgemeine Sonntagszeitung. Bisan ang mga bata nga kuwatro anyos pa ang edad makadawat ug mga masahe ginamit ang init-init nga lana ug uban pang mga terapiya, gawas pa sa pagtagbaw sa kapritso sa lawas. Nagtuo ang ubang mga eksperto nga ang tuyo niini mao ang kuwarta dili ang panglawas sa mga bata. Aron makasapi, matod pa ni Peter Wippermann, direktor sa Hamburg Office of Trends, “ang mga bata gipugos nga mahimong hamtong.” Sumala kang Dr. Christoph Kampmann, pangulo sa institusyon sa kabataan sa Mainz University, ang usa nga gikabalak-an mao nga “kini maghimo sa mga bata nga sobra ka independente nga magtuo nga sila dato, nga maghunahuna lamang sa ilang kaugalingon.” Imbes moadto sa spa aron matambalan ang naandang mga sakitsakit sa bata, “ang mga bata angayng magsakasaka sa mga kahoy ug magduladula,” matod pa sa taho. “Kini makasanta gayod sa mga problema sa postura, makapagana sa kaon, ug makapahinanok sa kinatulgan.”

 Pagpanguma nga Nagkinahanglan ug Daghang Tubig

“Ang Australia mao ang labing uga nga gipuy-ang kontinente, apan kami ang kinadaghanag gigamit nga tubig kada tawo sa tibuok kalibotan,” nag-ingon ang mantalaang Australian. Matag adlaw, ang Australia mogamit sa aberids nga 900 litros nga tubig kada tawo, kon itandi sa 600 litros kada tawo sa Amerika del Norte. “Tres-kuwartos sa tubig nga gigamit sa Australia gigamit sa pagpatubig sa pananom,” matod pa sa taho. Aron makapatungha ug usa ka kilong trigo gikinahanglan ang 1010 ka litrong tubig. Aron ang usa ka bakahan makapatungha ug usa ka litrong gatas, ang mga sibsibanan sa baka kinahanglang makasuhop ug mga 600 ka litrong tubig. Nagkinahanglan usab ug kapin sa 18,000 ka litro aron makapatungha ug usa ka kilong mantekilya ug 50,000 ka litro aron makapatungha ug usa ka kilong beefsteak. Ang paggamag panapton maoy industriya nga nagkinahanglan usab ug daghang tubig. Aron makapatungha ug usa ka kilong gapas, gikinahanglan ang 5,300 ka litrong tubig, ug kapin sa 171,000 ka litrong tubig ang gikinahanglan sa paggamag usa ka kilong delana. Gibanabana nga 685,000 ka litrong tubig ang gigamit sa paggamag usa lang ka delanang amerkana.

Mas Init nga Panahon ug ang Populasyon sa Ihalas nga mga Mananap

“Nagkadaghan ang mga lawalawa sa Australia, lakip na ang makamatay nga mga redback, samtang ang mga siyentipiko nagduda nga ang pag-init sa yuta maoy nakatugaw sa populasyon sa ihalas nga mga mananap,” nagtaho ang The Weekend Australian. Sumala kang Dr. Robert Raven sa Queensland Museum, ang mga lawalawa nga sagad mosanay ug kas-a lang sa usa ka tuig gidahom nga mosanay ug katulo o kaupat niining tuiga. “Ang mga lawalawa nga gagmay pa unta niining panahona sa tuig nanagko na,” matod pa niya. “Naobserbahan usab namo nga nadoble ang gitas-on sa kinabuhi sa pipila ka lawalawa.” Nagtuo usab ang mga tigpanukiduki nga ang mas init nga panahon nakaapektar sa mga langgam. Ang mantalaan nag-ingon: “Ang mga langgam sama sa mga tikarol sa lasang, nga kasagarang mosanay ug kas-a sa usa ka tuig, mosanay na ug kaduha sa usa ka tuig.” Ang mga langgam usab “sayo nga mosanay ug sayo nga mamalik gikan sa pagpalabay sa tingtugnaw didto sa Uropa, nga nagpasabot nga mahimong nagakahitabo ang mga kausaban sa tibuok yuta.”

Dugang Pang mga Bulan ang Nadiskobrehan

Tungod sa nag-uswag nga teknolohiya, midoble ang gidaghanon sa mga bulan nga nakita diha sa atong solar nga sistema sulod lang sa unom ka tuig, sumala sa ¿Cómo ves? nga magasin bahin sa siyensiya sa National Autonomous University sa Mexico. Pagkatapos sa 2003, 136 ka bulan ang nakita nga nagbiyo sa pito sa mga planeta​—ang Mercury ug Venus lang ang morag walay bulan​—ug ang mga astronomo nagdahom nga makakita pag dugang. Ang kinadaghanag bulan mao ang Jupiter (61), gisundan sa Saturn (31), Uranus (27), Neptune (13), ug Mars (2). Ang Pluto ug Yuta adunay tagsa ka bulan.

Ang Kalapoy Lagmit Simtoma sa Atake sa Kasingkasing

Sumala sa usa ka pagtuon, “ang talagsaong kalapoy ug pagkadili-makatulog lagmit maoy sayo nga mga simtoma sa atake sa kasingkasing diha sa mga babaye,” nagtaho ang internasyonal nga edisyon sa The Miami Herald. Bisan tuod 30 porsiyento lang sa mga babaye diha sa pagtuon ang nagtaho ug pagsakit sa dughan ingong unang simtoma, 71 porsiyento ang mibatig talagsaong kalapoy kapin sa usa ka bulan sa wala pa atakeha sa kasingkasing. “Ang kalapoy dili ikapatin-aw ug talagsaon,” matod pa ni Propesora Jean McSweeney sa University of Arkansas for Medical Sciences, nga midugang nga “sa pipila ka babaye, grabe kaayo kini nga dili nila mahuman paghipos ang higdaanan kon dili una mopahulay. . . . Ang sakit sa kasingkasing mao ang Num. 1 nga mamumuno sa mga babaye.” Siya miingon, “Kon atong makombinsir ang mga babaye sa pag-ila sa mga simtoma nga sayo pa, matambalan nato sila ug masanta o maangan-angan ang atake sa kasingkasing.”

Panalipod Batok sa Baha Alang sa Venice

Ang Venice, Italya, nga natukod diha sa mga 120 ka isla sa Dagat Adriatiko, kanunayng mabahaan. Human sa dugayng mga pagtuon ug mga debate, giaprobahan na sa gobyerno sa Italya ang paghimog usa ka sistema sa malisoliso nga mga ali latas sa tulo ka bokana sa lanaw. Ang maong mga ali adunay 79 ka kahon nga puthaw, nga ang matag usa maoy 30 metros ang gihabogon, 20 metros ang gilapdon, ug singko metros ang gibag-on. Sa normal nga mga kahimtang, ang mga kahon pun-on ug tubig aron motundag kini sa salog sa dagat, nga dili makabalda sa nabigasyon ug sa pagtaob ug paghunas. Apan sa dihang taliabot na ang baha, bombahan ug hangin ang mga kahon. Kay gaan na, kini mosaka samag mga tulay nga mabitadbitad hangtod nga ang mga kahon molutaw. Kon magkatapad, ang mga kahon mahimong usa ka taas nga ali nga makapugong sa pagsulod sa tubig. Kining maong sistema gidahom nga magamit inigka-2011.

Mga Balita Bahin sa Pagpanabako

• “Nakaplagan sa mga tigpanukiduki nga ang pagdili sa pagpanabako diha sa mga bar, restawran ug uban pang anaa-sa-sulod nga mga negosyo didto sa Helena, Mont[ana], adunay kalabotan sa 60% nga pag-us-os sa gidaghanon sa mga naospital tungod sa mga atake sa kasingkasing sulod sa unom ka bulan diin gipatuman ang maong pagdili,” nagtaho ang The Wall Street Journal. Human baliha sa lokal nga korte ang desisyon sa pagdili sa pagpanabako, ang gidaghanon sa mga atake sa kasingkasing mibalik sa kanhing gidaghanon. “Kini maoy usa ka lig-ong pamatuod nga kinahanglang likayan ang mga kapeligrohan nga makahanggab ug aso nga gibuga sa nanabako,” matod pa sa kardiologo nga si Sidney Smith.

• “Ang mga gobyerno sa Estado, nga maoy higpit nga mga kaaway kanhi sa industriya sa tabako, aduna nay lahi nga baroganan: Sila andam nang moluwas sa kinadak-ang tiggamag tabako sa nasod,” nag-ingon ang Journal. Unsay katarongan? Ang usa ka huwes mimando nga ang kompaniya kinahanglang mobayad ug $12-bilyones dolyares aron makaapelar sa korte. Kini makapabangkarota sa maong kompaniya, ug dili na kini makabayad ug bilyonbilyong dolyares nga danyos sa nag-unang kaso. Ang mga gobyerno sa Estado “nagsalig na pag-ayo sa salapi, nga maoy nakatabang sa daghang estado nga makalingkawas sa kalisdanan sa panalapi,” matod pa sa artikulo. Kini maoy “nagtukmod sa mga estado sa pagpaluyo sa laing kiliran.” Duha ka semana sa ulahi gibali sa huwes ang iyang desisyon ug gitugotan ang maong kompaniya sa pagbayad ug gamaygamay nga kantidad.