Ang Matang sa Amahan nga Gikinahanglan sa mga Anak

ANG mga anak nagkinahanglag amahan nga nahigugma kanila, nga andam sa pagpaluyo kanila, ug nagbuhat sa tanang maarangan sa pagtabang kanila nga motubo nga responsable, kasaligang mga hamtong. Apan wala hatagi ug igong pag-ila ang kamatuoran nga ang mga anak nagkinahanglan niining matanga sa amahan.

Tinuod nga ang mga bata gipanganak sa mga inahan, ug ang usa ka mahigugmaong inahan adunay usa ka hinungdanong kaakohan. Apan sa paghisgot nga ang amahan adunay sama ka bililhong kaakohan, ang The Wilson Quarterly nag-ingon: “Ang inanay nga pagkadaot sa matang sa pagkaamahan maoy usa ka dakong hinungdan sa kadaghanang makapabalaka nga mga problema nga naghampak sa Amerikanhong katilingban”​—ug, ikadugang nato, kini naghampak usab sa ubang bahin sa kalibotan.

Ang Brazilianhon nga mantalaang Jornal da Tarde nagtaho bahin sa usa ka pagtuon nga nakahinapos nga daghang problema sa pamatasan sa mga batan-on​—sama sa pagkapalaaway, pagkabadlongon, pagkabugo sa klase, ug pagkaway-pagtagad​—kasagarang maoy “resulta sa pamilya nga walay amahan.” Ug ang Italyanhong basahon nga Gli imperfetti genitori (Ang Dili-Hingpit nga mga Ginikanan), ni Marcello Bernardi, nagpasiugda nga aron sila managko nga malamposon, ang mga bata nagkinahanglan gayod ug duha ka ginikanan.

Pamilyahanong Kinabuhi Mahimong Moarang-arang

Bisan pag ang mapinasagdanong amahan maoy nakatampo sa mga problema sa pamilya o sa kasagaran maoy responsable niana, wala kana magpasabot nga dili na kini matul-id ug ang pamilyahanong kinabuhi dili na moarang-arang. Sa unsang paagi? Unsay angayng himoon sa amahan?

Dayag, ang mga bata nagkinahanglan ug kahikayan diha sa panimalay, ang pagbati nga dunay usa nga maningamot sa pag-atiman kanila. Kon ang maong panginahanglan dili ikahatag, sama sa kasagarang kahimtang karon, ang kinabuhi sa mga bata madaot pag-ayo. Apan, duna pay paglaom niining kahimtanga, bisan pag anaa ang amahan o wala. Ang “usa ka amahan sa mga bata nga ilo-sa-amahan,” ang Bibliya nag-ingon sa Salmo 68:​5, mao “ang Diyos nga anaa sa iyang balaang puloy-anan.” a

Kon Unsaon Pagbaton ang Tabang

Ang kahimtang nga gihubit ni Lidia, ang batang babaye nga taga-Polandia nga gihisgotan sa miaging artikulo, nagpakita nga ang tabang sa Diyos gikinahanglan gayod aron magmalamposon ug nga kini mabatonan. Unsay kahimtang sa kinabuhi sa iyang pamilya kaniadto? Sa unsang paagi ang pamilya nakadawat sa tabang sa Diyos?

Si Franciszek, nga amahan ni Lidia, miadmitir nga sa gagmay pa ang iyang mga anak, gipasagdan lang niya ang iyang pamilya, sama sa gitaho ni Lidia. Siya miingon: “Wala ako magtagad kon unsay gibuhat sa among mga anak. Wala ako magmabination kanila, ug kami dili suod.” Busa wala siyay  kalibotan nga sa nag-14 anyos na si Lidia, siya ug ang batan-on niyang anak nga lalaki ug babaye nag-apil-apil na diay sa gubot nga mga parti, nanigarilyo, nag-inom ug makahubog nga mga ilimnon, ug nalangkit sa mga away.

Sa kataposan, nakaamgo si Franciszek nga ang iyang mga anak nasugamak na diay sa kasamok, ug siya nasuko pag-ayo ug midesidir sa pagtul-id niadto. “Nangaliyupo ako sa tabang sa Diyos,” siya miingon. Makapahibulong, wala madugay human niadto ang mga Saksi ni Jehova miduaw kaniya diha sa balay, ug silang magtiayon miuyon nga magtuon sa Bibliya. Ngadtongadto, gipadapat sa mga ginikanan ang mga pagtulon-an sa Bibliya sa ilang kinabuhi. Unsay epekto diha sa ilang mga anak?

Si Franciszek misaysay: “Ilang namatikdan nga miundang na ako sa pag-inom ug nahimong mas maayong amahan. Gusto nila nga mailhan pa gayod ang mga Saksi ni Jehova. Nagtuon usab sila sa Bibliya ug gibiyaan ang daotang mga kauban.” Ang anak nga lalaki, si Rafał, nagsugilon bahin sa iyang amahan: “Nahigugma na ako kaniya ingong usa ka higala.” Siya midugang: “Kalit lang nga nawad-an akog gana sa pagpakig-uban sa mga gang sa kalye. Puliki na kami sa espirituwal nga mga kalihokan.”

Sa pagkakaron si Franciszek usa na ka ansiyano sa kongregasyon sa mga Saksi ni Jehova, ug nalangkit gihapon siya sa iyang pamilya ug sa espirituwal nga pag-uswag sa matag usa. Ang iyang asawa ug si Lidia mga payunir na usab, bug-os-panahong mga magwawali sa maayong balita. Si Rafał ug ang iyang manghod nga babaye, si Sylwia, bug-os kalag nga nagtuon sa Bibliya, nagkomento sa Kristohanong mga tigom, ug nagpaambit sa ilang pagtuo ngadto sa uban.

Iyang Gibuhat ang Iyang Gitudlo

Matikdi usab ang nahitabo kang Luis, ang amahan ni Macarena. Hinumdomi nga siya kadtong 21 anyos nga batang babaye sa Espanya nga gikutlo sa pang-abling artikulo. Ang pagkinabuhi ni Luis sinundog ra usab niya sa iyang alkoholikong amahan. Sama sa giingon ni Macarena, magkuyog usahay ang iyang amahan ug mga barkada sulod sa daghang adlaw sa usa ka higayon. Dugang pa, gitratar niya ang iyang asawa sama sa usa ka ulipon inay usa ka pinalanggang kapikas. Hapit nang mabungkag ang ilang kaminyoon, ug si Macarena ug ang iyang mga manghod naguol pag-ayo.

Apan, miabot ang higayon nga si Luis miuyon sa pagtuon sa Bibliya uban sa mga Saksi ni Jehova. Siya misaysay: “Misugod ako paggugol ug panahon uban sa akong asawa ug mga anak. Mag-estoryahanay mi, magdungan sa pagpangaon ug pagtuon sa Bibliya. Magtinabangay usab kami sa pagbuhatbuhat sa panimalay ug paglulinghayaw.” Si Macarena miingon: “Gibati na nako ang presensiya sa usa ka matang sa amahan nga nagpakitag tim-os nga kaikag sa iyang pamilya.”

Makaiikag, gidasig ni Luis ang iyang pamilya sa pag-alagad sa Diyos ug gibuhat usab niya ang iyang gitudlo. Gibiyaan niya ang “usa ka malamboong negosyo,” saysay pa ni Macarena, “kay mikaon kadtog dakong panahon ug gusto niyang gahinag dugang panahon ang mga panginahanglan sa pamilya.” Talagsaon ang epekto niadto. “Ang iyang panig-ingnan nagtudlo kanako kon unsaon paghupot ang usa ka yanong mata ug pag-una sa espirituwal nga mga butang,” matod pa ni Macarena. Nagpayunir na siya karon, ug ang iyang inahan ug mga manghod nahimong aktibong mga membro sa Kristohanong kongregasyon.

Ang Desisyon sa Ehekutibo sa Kompaniya sa Tren

Dayag, ang matang sa amahan nga gikinahanglan sa mga anak mao ang amahan nga magdesisyon alang sa kaayohan sa mga anak. Ang tin-edyer nga anak nga lalaki ni Takeshi Tamura, ang Hapones nga ehekutibo nga gihisgotan sa nag-unang artikulo, nalangkit sa daotang mga kaubanan ug morag hapit nang masugamak sa kadaot. Nahitabo kadto sa 1986, ang tuig nga si Takeshi midesisyon sa pagbiya sa iyang taas nga katungdanan sa Japanese National Railways. Unsay gibati karon ni Takeshi bahin sa iyang desisyon, human ang kapin sa 18 ka tuig sa ulahi?

“Lagmit kadto mao ang labing maayong desisyon nga akong nahimo sukad,” siya miingon di pa dugay. “Ang paggugol ug dugang panahon uban sa akong anak nga lalaki ug ang pagbuhatbuhat nga magkauban, lakip na ang pagtuon sa Bibliya uban kaniya, dako ug epekto. Nagkahigalaay kami, ug giputol niya ang iyang daotang pagpakig-uban ug di-maayong pamatasan.”

Ang asawa ni Takeshi nahimong Saksi ni Jehova nga unag pipila ka tuig, ug ang iyang sulundang panggawi maoy nagpalihok sa iyang bana sa pagsusi sa Bibliya ug pagkalangkit pa gayod uban sa iyang pamilya. Ngadtongadto si Takeshi, ang iyang anak nga lalaki ug babaye tanan na-Saksi. Sa pagkakaron, si Takeshi ug ang iyang anak nga lalaki nag-alagad na ingong mga ansiyano sa ilang tagsa ka kongregasyon, ug ang iyang asawa ug anak nga babaye nagpayunir.

 Ang mga Amahan Nagkinahanglag Tabang

Daghang amahan, bisan pag nakaamgo nga sila nagpasagad sa ilang mga anak, wala mahibalo kon unsay buhaton kanila. Ang Espanyol nga mantalaang La Vanguardia adunay ulong balita “42 Porsiyento sa [Espanyol] nga mga Ginikanan Miadmitir nga Sila Dili Makamaong Momatuto sa Ilang Tin-edyer nga mga Anak.” Apan ingon usab niana ang ikaingon bahin sa mga amahan sa mga bata nga wala pa mag-13 anyos ug sa mga batang gagmay. Sukwahi sa panghunahuna sa daghan, kining gagmay nga mga bata nagkinahanglan usab sa presensiya ug pagtagad sa usa ka mapaluyohong amahan.

Unsa pay atong makat-onan kon unsaon pagkahimong usa ka maayong amahan? Kinsa ang labing maayong mga panig-ingnan alang sa mga amahan, ug unsay atong makat-onan gikan kanila? Ang among paniklop nga artikulo maoy motuki niining mga pangutanaha.

[Fotnote]

[Mga hulagway sa panid 7]

Mga amahan nga nagtagana sa panginahanglan sa ilang mga anak

Si Franciszek ug ang iyang pamilya

Si Luis ug ang iyang pamilya

Si Takeshi ug ang iyang pamilya