Gikan sa Among mga Magbabasa

Aseite Buot lang nako nga magpasalamat alang sa Nobyembre 8, 2003 nga serye, “Aseite​—May Panahon Bang Mahurot Kini?” Wala gayod ako masayod sa makalilisang nga estadistika bahin sa pag-agas sa aseite nga inyong gihisgotan. Dili ikatingala nga nadaot ang yuta tungod niining mga butang nga ginahimo sa mga tawo! Tungod niini ako mahinamon nga nagpaabot sa panahon nga hinloan ni Jehova ang yuta sa bug-os ug himoon kini nga usa ka paraiso!

T. T., Tinipong Bansa

Nindot kaayo ug dili mapihigon ang pagkasulat sa mga artikulo. Bisag duna koy taas nga edukasyon sa pisiko sa process engineering, wala gayod ako makadungog sukad bahin sa abiogenic nga teoriya sa sinugdanan sa petrolyo. Ang kasagarang itudlo mao lang ang biogenic nga teoriya, nga ang aseite naggikan sa nadugta nga biolohikanhong materyales.

E. B., Pransiya

Nag-eskuyla ako sa usa ka teknikal nga kolehiyo ug naglisod sa pagpangitag mga teksbok nga dunay mga tsart nga nagpatin-aw sa mga mekanismo sa makina. Busa nakadayeg ako sa tsart nga nagpakita kon giunsa paggama ang aseite. Nakatabang kini aron sayon nga masabtan ang artikulo.

M. I., Japan

Unta nanukiduki kamo pag-ayo alang sa inyong serye. Wala ninyo gisulti nga ang unang komersiyal nga atabay sa aseite sa Amerika del Norte gikalot ni James Miller Williams sa Ontario, Canada​—usa ka tuig una pa gikalot ni Edwin Drake ang atabay sa Titusville, Pennsylvania, T.B.A.

G. Y., Canada

Ang “Pagmata!” nagtubag: Gidebatehan pag-ayo kining puntoha. Ang usa ka geologo sa petrolyo nga dunay gisulat bahin sa kasaysayan sa aseite miingon sa “Pagmata!” nga gilantugian pag-ayo ang lokasyon sa unang atabay sa aseite. Busa ang “The Canadian Encyclopedia” nagsumaryo niana niining paagiha: “Si Williams ug si E. L. Drake sa Pennsylvania parehas nga giingong maoy nagkalot sa unang atabay sa aseite sa Amerika del Norte.”

Geograpiya Ang among pamilya mahiligon sa mga artikulo bahin sa geograpiya. Busa, nahingangha kami sa artikulong “Ang Dakong Amazon​—Hinungdanon Kaayo sa Minilyon.” (Nobyembre 8, 2003) Bisan pag among gitun-an ang Amazon sa eskuylahan, wala mi nakaamgo nga “sa 30 segundos lamang, kini makatagbaw sa kauhaw sa mga tawo sa usa ka adlaw”! Nalipay kami nga “makaadto” sa nahilit nga kayutaan pinaagi niining mga artikuloha.

V. G., Slovakia

Salamat sa nindot nga artikulong “Prague​—Duawa ang Mutya sa Among Kasaysayan.” (Nobyembre 8, 2003) Makalingaw kaayo ang pagbasa bahin niining makasaysayanhong siyudad​—gibati nako nga morag atua gayod ako didto! Salamat usab sa matahom nga mga hulagway.

L. Z., Rusya

Sa tunghaan, gipasulat kami bahin sa usa ka siyudad sa paagi nga makadani sa magbabasa sa pag-adto didto. Gibase nako ang akong sinulat sa artikulo bahin sa Prague ug nakadawat ug kinatas-ang grado sa klase. Salamat!

O. C., Pransiya

Dili-Magtutuong mga Paryente Salamat sa artikulong “Ang Hunahuna sa Bibliya: Kon ang mga Minahal sa Kinabuhi Dili Sama Kanimo ug Pagtuo.” (Nobyembre 8, 2003) Ako lang ang Kristohanon sa among pamilya nga may unom ka anak, busa nakigbisog ako sulod sa daghang tuig kon sa unsang paagi mahimong balanse sa pagsagubang niining kahimtanga. Makapalamdag gayod ang mga teksto niining artikuloha!

R. G., Tinipong Bansa

Bag-o pa lang ako nga nagsugod sa pagtuon sa Bibliya. Apan ako naningkamot sa pagpaambit sa bisan unsa nga akong natun-an ngadto sa akong mga minahal nga dili-magtutuo. Sanglit 16 anyos pa lang ako, wala ako tugoti sa akong pamilya sa pagpabawtismo, apan ako nagalaom nga magpabawtismo sa umaabot. Kini nga artikulo makatabang kanako kon sa unsang paagi makiglabot sa akong pamilya.

J. G., Tinipong Bansa