Paghatod sa Kamatuoran sa Bibliya Ngadto sa mga Pygmy

TINAMPO SA MAGSUSULAT SA PAGMATA! SA CAMEROON

Ang mga Saksi ni Jehova naningkamot sa paghatod sa mensahe sa Gingharian sa Diyos ngadto sa “tanang matang sa mga tawo” sa kapin sa 230 ka kayutaan sa tibuok kalibotan. (1 Timoteo 2:4; Mateo 24:14) Apil niini ang mga Pygmy sa Aprika, ang gagmayng mga tawo nga may aberids nga gitas-on nga 1.2 ngadto sa 1.4 metros. Sila kasagarang nagpuyo diha sa bagang kalasangan sa Republika sa Sentral Aprika, sa rehiyon sa Congo, ug sa habagatan-sidlakang Cameroon.

Ang unang natala nga panagkita tali sa mga Pygmy ug mga dumuduaw nahitabo sa dihang si Paraon Neferirkare sa Ehipto nagpadala ug ekspedisyon aron pangitaon ang tuboran sa Nile River. Diha sa kalasangan sa nahilit nga bahin sa Aprika, ang ekspedisyon mireport nga nakahimamat ug gagmayng mga tawo. Sa ulahi, ang Gregong magsusulat nga si Homer ug ang pilosopo nga si Aristotle naghisgot bahin sa mga Pygmy. Ang mga taga-Uropa nakahimamat niining mga tawhana niadtong ika-16 ug ika-17 nga mga siglo.

Sa modernong mga panahon, ang mga Saksi ni Jehova nagsangyaw diha sa kalasangan sa Aprika. Bisan pag ang mga Pygmy namati sa mensahe sa Gingharian, ang paghaling sa ilang interes wala kaayoy maayong resulta. Tungod kini sa paagi sa kinabuhi sa mga Pygmy​—nga magbalhinbalhin sa lainlaing mga dapit matag pipila ka bulan.

Ang mga Pygmy maoy makigdaiton, maulawon nga mga tawo, nga may gibanabanang gidaghanon didto sa Aprika nga 150,000 ngadto sa 300,000. Ang mga gobyerno, internasyonal nga mga organisasyon, ug relihiyosong mga pundok nagtukod ug mga tunghaan nga alang gayod kanila, lakip sa gagmayng mga balay nga mohaom sa ilang estilo sa kinabuhi. Ugaling lang, ang pagkombinsir kanila nga mopuyo sa usa lang ka lugar wala kaayo molampos.

Ang usa ka talagsaong eksepsiyon sa Cameroon mao si Janvier Mbaki, ang unang Pygmy nga nahimong Saksi dinhi. Iyang gidawat ang mensahe sa Bibliya human mabasa ang daghag-hulagway nga libro nga Ikaw Mabuhing Walay Kataposan sa Paraiso sa Yuta, maingon man ang uban pang mga publikasyon. a Sa tuig 2002, si Janvier gibawtismohan, ug siya nag-alagad na karon ingong payunir, nga maoy pagtawag sa bug-os-panahong mga magwawali sa mga Saksi ni Jehova. Siya usa usab ka ministeryal nga alagad sa Kristohanong kongregasyon diha sa Mbang, usa ka gamayng lungsod sa habagatan-sidlakang bahin sa nasod. Panahon ray mag-igo kon daghan pa bang mga Pygmy sa Cameroon ang modesidir sa pagsimba kang Jehova, ang bugtong matuod nga Diyos, kinsa nahigugma sa “tanang matang sa mga tawo.”

[Footnote]

[Hulagway sa panid 24]

Si Janvier Mbaki​—ang unang Pygmy sa Cameroon nga nahimong Saksi​—​nakigbahin diha sa ministeryo