“Unsaon Nimo Pagbasa Niining Tanang Basahon?”

Niadtong Hulyo 2001 usa ka tawo nga taga-Khabarovsk sa Halayong Sidlakan sa Rusya ang nakakitag payl sa 34 ka kopya sa Pagmata! sa usa ka librarya sa siyudad. Gihulaman niya kadto, apan pag-abot sa gitakdang petsa sa pag-uli niadto pagka-Agosto, dili pa niya kadto buot nga iuli. Busa mihangyo siya nga lugwayan ang panahon sa pag-uli niadto hangtod sa Septiyembre. Giganahan gayod siya sa mga magasin mao nga gihulaman na usab niya kadto pagka-Nobyembre, lakip sa lain pang unom ka gula.

Una pa niini, ang maong tawo dili gayod mobasa ug relihiyosong mga publikasyon. Nganong misugod man siya sa pagbasag Pagmata!? “Tungod kay kadaghanan sa mga artikulo niining magasina naghisgot sa mga suliran sa katilingban nga makapaikag ug nag-apektar sa tanan,” siya misulat.

“Kasagaran, adunay mga artikulo bahin sa modernong mga siyudad ug mga nasod nga buhi kaayo ang pagkahubit, lakip na ang impormasyon bahin sa kultura sa mga tawo didto,” matod pa sa maong tawo. Nalingaw usab siya sa mga artikulo bahin sa mga tawo nga nagmalamposon sa kinabuhi, nagpabiling lig-on sa ilang pagtuo, ug nagtabang sa uban sa pagsagubang sa mga kasakitan ug mga katalagman. Unsay iyang ikaingon bahin sa magasin? “Ikaingon gayod nga ang Pagmata! maoy kombinasyon sa Time, Popular Science, ug National Geographic nga mga magasin!”

Ang maong tawo mihangyo ug daandaang mga gula sa Ruso nga Pagmata! sukad sa tuig 1995 hangtod sa presente. Gawas sa Pagmata!, mihangyo usab siyag lainlaing mga libro ug mga brosyur nga gipatik sa mga Saksi ni Jehova. “Basin mangutana mo,” siya misulat, “‘Unsaon nimo pagbasa niining tanang basahon?’” Gitubag niya ang iyang kaugalingong pangutana pinaagi sa pag-ingon nga aduna siyay panahon sa pagbasag mapuslanong mga basahon, sanglit dili man siya mogugol ug daghang panahon sa pagtan-awg telebisyon o sa pagsuhid sa Internet.

Ang Pagmata! nagtaganag daghang impormasyon bahin sa mga hitabo sa kalibotan karon ug nagpatin-aw sa solusyon sa mga problema sa atong panahon. Nganong dili nimo hangyoon ang mga Saksi ni Jehova nga dad-an ka ug bag-ong gula sa Pagmata! kada bulan?

[Hulagway sa panid 31]

Mga Anak​—Kon Unsay Ilang Gikinahanglan Gikan sa mga Ginikanan

[Hulagway sa panid 31]

Pagsabot sa mga Mood Disorder

[Hulagway sa panid 31]

Nahibalo Ka ba sa Ngalan sa Diyos?

[Hulagway sa panid 31]

Ang Hulga sa Gubat Nukleyar​—Unsa ka Tinuod?

[Hulagway sa panid 31]

Paglaom​—Asa Nimo Makaplagan Kini?

[Picture Credit Line sa panid 31]

Nuclear explosion: U.S. Department of Energy photograph