Gikan sa Among mga Magbabasa

Kalikopan Nagustohan gayod nako ang serye nga “Maluwas ba Nato ang Atong Kalikopan?” (Nobyembre 22, 2003) Gipangandoy nako ang panahon sa dihang hinloan na ni Jehova ang iyang matahom nga yuta ug ibalik kini sa orihinal nga katahom niini. Nakapaguol kanako ang pagkakita sa kadaot nga nahimo sa tawo sa atong gipuy-an nga yuta!

D. L., Britanya

Ako nag-edad ug 15 anyos, ug dili ra nako basahon kaniadto ang ubang mga gula sa Pagmata! Apan human mabasa kining seryeha, karon gusto na nakong basahon kini nga regular! Ang mga artikulo daghag gitudlo kanako bahin sa makalingaw nga mga butang sa atong planeta. Akong gigamit kining impormasyona sa eskuylahan ug nakadawat ako ug taas nga grado.

S. V., Ukraine

Multiple Sclerosis Palihog dawata ang akong kinasingkasing nga pasalamat sa artikulo nga “Pagkinabuhi nga Dunay Multiple Sclerosis.” (Nobyembre 22, 2003) Duolan nag usa ka tuig sukad nga ako nadayagnos nga aduna nianang sakita. Dili na nako magamit ang akong mga bukton, tiil, ug wala nga mata. Kaniadto, kanunay kong maghunahuna ug negatibong mga butang. Apan sama sa gisugyot sa inyong artikulo, gipaningkamotan nakong mahuptan ang katakos sa pagpasiaw ug maghunahuna kanunay sa positibong mga butang. Salamat sa makapadasig nga artikulo.

M. A., Japan

Giantos nako kining sakita sulod na sa 14 ka tuig. Apan kini dili ilado sa Japan. Busa sa dihang akong nahibaloan nga kining artikuloha gipatik, akong giingnan ang akong bana ug mga higala sa kongregasyon. Karon ang akong mga higala mas mahangawaon ug matinabangon na kanako.

N. S., Japan

Kining artikuloha tukma kaayong naghubit sa sakit ug sa paggrabe ug mga sangpotanan niini! Ang mga pangutana nga anaa sa akong hunahuna sulod sa daghang tuig sa kataposan natubag na. Daghan sa akong labing suod nga mga higala nag-ingon kanako nga wala sila masayod kon unsay kahimtang sa dunay MS.

M. W., Alemanya

Ako usa ka nag-inusarang inahan sa tulo ka anak. Nabasa nako kining artikuloha samtang didto ko sa ospital sa dihang giatake ko sa MS sa ikaupat nga higayon. Kining artikuloha nakatandog gayod kanako. Bisan tuod katingad-an kini, ang pagkaaduna niining walay-pagkaayo nga sakit nakapalig-on gayod sa akong relasyon uban kang Jehova ug sa akong pagsalig kaniya.

M. H., Alemanya

Kining artikuloha makatabang kanato nga naapektohan sa MS. Bisan tuod naglingkod na lang ko karon sa wheelchair, nakigbahin ako sa bug-os-panahong buluhaton sa pagsangyaw, nga sa panguna diha lang sa balay pinaagig telepono. Tungod kay paralisado na ako, ang usa ka Kristohanong sister maoy nagsulat niining sulata alang kanako.

M. G., Pransiya

Ang akong MS nadayagnos mga 21 ka tuig na ang miagi. Ako nag-alagad ingong usa ka Kristohanong ansiyano, apan ang mga igsoon mahigugmaong nagpagaan sa akong buluhaton aron dili mograbe ang akong sakit. Pagkaanindot nga panahon unya sa dihang, sumala sa giingon sa Isaias 33:​24, “walay pumoluyo nga moingon: ‘Ako masakiton’”!

E. C., Tinipong Bansa

Katalagman sa Mississippi Nakurat ako sa artikulong “Sa Dihang ang Suba Miagos nga Paatras.” (Nobyembre 22, 2003) Kini nagtug-an kanako kon unsa ka gamhanan ang kinaiyahan ug kon unsa ka walay mahimo ang tawo sa dihang masugamak sa katalagman. Ang inyong artikulo nakapalig-on sa akong determinasyon sa pagsalig sa Bibliya.

M. J., Mauritania

Bisan tuod ang mga katalagman nga gihisgotan nahitabo halos 200 ka tuig na kanhi, mibati ko nga morag kini gihubit sa usa nga nakasaksi. Samtang nagbasa sa artikulo, gibati nako nga morag atua ko didto, nga nangurog tungod sa kakusog sa baha. Mahinamon nakong gibasa ang matag parapo.

V. R., Rusya