Mga Batan-on nga Maisogong Nagpahayag sa Ilang Pagtuo

DAGHAN ang mga batan-on taliwala sa mga Saksi ni Jehova. Sila nahigugma sa Diyos ug naningkamot sa pagkinabuhi uyon sa iyang mga prinsipyo nga gipadayag diha sa Bibliya. Kining mga batan-ona nalipay sa ilang nabatonang pagtuo, ug sila dili magpanuko sa pagsulti niana sa uban diha sa tunghaan. Tagda ang pipila ka mga pananglitan.

◼ Sa dihang siya nagtungha pa sa ikaunom nga grado, si Holly ug ang iyang mga klasmet gihatagag asaynment sa pagsulat bahin sa ulohan nga “Unsaon nimo pagsulbad ang suliran bahin sa terorismo nga dili mogamit ug kabangisan?” Gipahimuslan ni Holly ang maong higayon sa pagsulat bahin sa iyang binase-sa-Bibliya nga paglaom sa umaabot. Gipatin-aw niya nga latas sa kasaysayan “ang tawo nagmando sa tawo alang sa iyang kadaotan.” (Ecclesiastes 8:9) Dayon iyang gipunting ang pagtagad ngadto sa bugtong tinuod nga paglaom sa katawhan​—ang Gingharian sa Diyos. “Sanglit si Jesus man ang tinudlong Hari niana nga Gingharian,” siya misulat, “ang tanang problema, lakip ang terorismo, pagawagtangon.” Gibatbat ni Holly kon unsay himoon ni Jesus nga dili mahimo sa tawhanong mga magmamando. “Samtang dinhi sa yuta,” siya misulat, “gipakita ni Jesus kon unsa unya siyang matanga sa magmamando. Mahigugmaon siya, ug may kahingawa sa mga tawo. Gipakita niya ang iyang gahom pinaagi sa pag-ayo sa mga sakit ug pagbanhaw sa mga patay. Walay tawhanong kagamhanan ang makabuhi pag-usab sa mga patay. Apan pagahimoon kana sa Gingharian sa Diyos.” Gitapos ni Holly ang iyang sinulat pinaagi sa pag-ingong “Ang Diyos ray makasulbad sa suliran sa terorismo, dili ang mga tawo.”

Ubos sa iyang sinulat, ang magtutudlo misulat: “Waw! Makapahinuklog kaayo ang imong gisulat, Holly. Ug maayo kaayo kana nga pagkahunahuna.” Nakadayeg usab ang magtutudlo sa gitagana ni Holly nga mga teksto sa Bibliya agig reperensiya. Nakahatag kana kang Holly ug higayon sa pagpakigsulti sa iyang magtutudlo bahin sa Teokratikanhong Tunghaan sa Ministeryo, usa ka senemanang programa sa pagbansay sa pagpakigpulong ug pagpanudlo nga gipahigayon sa mga Saksi ni Jehova. Malipayong gidawat sa iyang magtutudlo  ang usa ka kopya sa libro nga gigamit sa Tunghaan sa Ministeryo.

◼ Si Jessica nagpahayag usab sa iyang pagtuo pinaagi sa iyang mga sinulat sa tunghaan. “Nakahimo na akog tulo ka sinulat maylabot sa akong pagtuo,” matod niya. “Ang usa maoy bahin sa mga Saksi ni Jehova ug sa relihiyosong mga katungod. Gidispley kadto sa magtutudlo diha sa librarya aron mabasa niadtong buot nga mobasa niana. Ning bag-o pa, may gisulat ako bahin sa akong bawtismo ug kon unsa ka hinungdanon kanako ang maong adlaw. Nabasa kana sa akong mga klasmet sanglit gipasa man namo sa usag usa ang among mga sinulat. Usa sa akong klasmet nga babaye miingon: ‘Nindot ang imong gisulat. Mapuslanon ang pagkahibalo sa mga obligasyon nga nalangkit sa pagkahimong usa sa mga Saksi ni Jehova. Kongrats sa imong bawtismo!’ Ang laing klasmet nga babaye miingon: ‘Nindot ang imong giasoy! Nalipay ko nga lig-on kaayo kag pagtuo!’ Usa ka klasmet nga lalaki yanong misulat: ‘Timbang kag panghunahuna. Kongrats.’”

◼ Sa dihang si Melissa nag-edad ug 11 anyos, aduna siyay talagsaong kahigayonan sa pagpahayag sa iyang pagtuo. “Ang nars sa tunghaan mitambong sa akong klase sa siyensiya aron sa paghisgot bahin sa sistema sa imyunidad. Nahisgotan ang bahin sa pag-abono ug dugo. Human sa klase, giingnan nako ang akong magtutudlo sa siyensiya bahin sa usa sa atong mga video labot sa dugo. Gidala nako kana sa tunghaan pagkasunod adlaw, ug gidala kana sa akong magtutudlo sa iyang balay ug gitan-aw kana uban sa iyang pamilya. Pagkasunod adlaw gidala niya ang video sa tunghaan ug gipasalida kana sa duha niya ka klase, lakip sa akoa. Dayon gidayeg niya ang mga Saksi ni Jehova, nga giingnan ang mga estudyante nga kon dili pa tungod sa mga Saksi, dili unta mabatonan ang mga kapuli sa pag-abono. Sa dihang giuli na niya kanako ang video, siya nangutana, ‘Asa kaha ko makakuha ug kopya alang sa librarya sa tunghaan?’ Gihatagan nako siya ug usa ka kopya. Nalipay kaayo siya niana, ug maingon man usab ako!”

Si Holly, Jessica, ug Melissa maoy pipila sa daghang batan-ong mga Saksi ni Jehova nga nagsunod sa pahimangno sa Bibliya sa paghinumdom sa ilang Maglalalang. (Ecclesiastes 12:1) Ikaw ba nagahimo usab niana? Kon mao, makasalig ka nga imong gilipay ang kasingkasing ni Jehova.​—Proverbio 27:11; Hebreohanon 6:10.

Sa dihang ipahayag ninyong mga batan-on ang inyong pagtuo ngadto sa mga isigkaestudyante ug mga magtutudlo, naghatag kamo ug dako kaayong pamatuod bahin kang Jehova nga Diyos ug sa iyang mga katuyoan. Mopalig-on usab kana sa inyong pagtuo, ug motabang kaninyo nga lantawon ang inyong pribilehiyo ingong mga alagad sa Diyos uban ang nahiangay nga garbo. (Jeremias 9:24) Ang pagsangyaw diha sa tunghaan magsilbi usab nga panalipod. Mao kiniy giingon ni Jessica labot niana: “Ang usa ka bentaha sa akong pagsangyaw mao nga ang mga estudyante dili mamugos kanako sa paghimog mga butang nga supak sa giingon sa Bibliya.”

[Mga hulagway sa panid 12]

Holly

[Mga hulagway sa panid 12, 13]

Jessica

[Mga hulagway sa panid 13]

Melissa