Gikan sa Among mga Magbabasa

Mga Buhis Nanukiduki ako bahin sa mga buhis sa miaging pipila ka semana. Mitungha ang mga pangutanang sama sa, Kanus-a nagsugod ang pagpamuhis? Kini ang akong gipanukiduki sa dihang ang akong asawa nakadawat ug kopya sa Disyembre 8, 2003, nga isyu sa Pagmata! nga adunay mga artikulo nga nagpasiugda sa ulohan nga, “Taas ra ba Kaayo ang Imong Bayranan sa Buhis?” Sa akong katingala, gihisgotan niini ang pipila sa mga isyu nga akong gipanukiduki.

S. Y., Tajikistan

Mga Pag-abonog Dugo Usa ako ka doktor ug maingon man bug-os-panahong magwawali. Ug mapasalamaton kaayo ko nga inyong gipatik ang sugilanon ni Yasushi Aizawa nga, “Akong Gidawat ang Hunahuna sa Diyos Bahin sa Dugo.” (Disyembre 8, 2003) Pareho kaayo kami ug kasinatian sanglit kinahanglan ko usab nga tun-an ang pagbutang sa akong karera sa medisina diha sa ikaduhang dapit sa akong kinabuhi. Basin magkita ra kami ni Brader Aizawa sa bag-ong kalibotan sa Diyos, diin parehas na kaming walay trabaho ingong mga doktor. Dili na man unya kinahanglan ang mga doktor didto!

A. S., Ecuador

Niadtong Oktubre 2002, ang among kinamanghorang anak nga babaye nadayagnos nga may kanser. Lisod ang paagi sa pagtambal, nga naglakip sa duha ka operasyon, kemoterapiya, ug radyasyon. Niadtong panahona, gihimo gayod namo ang tanan aron masunod ang sugo sa Bibliya sa pagdumili sa dugo. Dili kini sayon, tungod kay sa Lithuania abonohan gayod ug dugo ang halos tanang kabataan nga gidapatan ug kemoterapiya. Ang artikulo nga “Akong Gidawat ang Hunahuna sa Diyos Bahin sa Dugo” nagpalig-on kanamo sa pagsunod kon unsay panglantaw ni Jehova. Ug karon medyo miarang-arang na ang kanser sa among anak.

M. ug S. D., Lithuania

Pag-indigay sa Magsoon Buot kong ipaabot ang akong dakong pasalamat sa artikulo nga “Mga Batan-on Nangutana . . . Sa Unsang Paagi Makagawas Ako sa Anino sa Akong Igsoon?” (Nobyembre 22, 2003) Nag-edad ako ug 16 anyos, ug para nako ang akong magulang nga babaye mao kanunay ang gihatagan ug pagtagad. Siyempre, nasayod ako nga si Jehova nagtagad kanako, apan mibati gihapon akog kamingaw. Gibatbat niining artikuloha kon unsay akong gibati. Ug tungod kay maluloton kaayo kini nga pagkasulat, nakahilak ako samtang nagbasa niana. Salamat sa inyong praktikal nga tambag. Nalukmay niini ang akong kasingkasing.

M. O., Japan

Usahay aduna akoy samang pagbati niadtong tanang batan-on nga gikutlo sa artikulo. Sukad sa akong mahinumdoman, ang akong magulang nga babaye mao kanunay ang gilantaw nga maayong panig-ingnan. Busa nasayod ako kon unsay bation sa dihang kanunay kang itandi sa laing membro sa pamilya. Ang inyong giingon bahin sa pagpangitag usa ka butang diin ang usa mahimong hanas nahisamag “mansanas nga bulawan diha sa linilok nga plata”​—mga pulong nga miabot sa hustong panahon.​—Proverbio 25:11.

S. T., Tinipong Bansa

Aduna akoy magulang nga babaye ug manghod nga lalaki. Silang duha mas maayo sa kadaghanang butang kay kanako. Busa gisunod nako ang inyong tambag, ug karon nagtuon ako ug Kinatsila ug kanunay nang mosangyaw sa kanataran. Nalingaw ako sa pagtuon​—ug ang mga tawo naghatag na usab ug pagtagad kanako.

H. B., Tinipong Bansa

Dulnganan sa Uniberso? Sa artikulo nga “Ang Siyensiya Maoy Akong Relihiyon Kanhi” (Septiyembre 22, 2003), si Kenneth Tanaka daw wala masayod sa gituohan sa mga siyentipiko nga ang uniberso magpadayon sa pagsangkad hangtod sa hangtod.

R. G., Tinipong Bansa

Ang “Pagmata!” nagtubag: Ang mga siyentipiko nga nagtuon sa kawanangan wala magkahiusa sa ilang mga panglantaw. Pananglitan, ang uban padayong nag-ingon nga ang pagsangkad anam-anam ra nga mohinay ug mohunong. Dayon anam-anam na usab kini nga mokuyos hangtod nga ang uniberso mabungkag ra sa iyang kaugalingon. Ang gipamulong ni Kenneth Tanaka nagtandog nianang duha ka teoriya apan wala magpadayag ug pag-uyon sa bisan hain niana. Ang katuyoan sa iyang gipamulong maoy aron ipasiugda ang iyang tinguha sa pagpangitag kahulogan sa kinabuhi tungod kay ang siyensiya dili makatubag sa tanang pangutana.