Walay-Dulaan nga Kindergarten

TINAMPO SA MAGSUSULAT SA PAGMATA! SA ALEMANYA

Usa ka buntag niana sa dihang ang mga bata nanulod sa kindergarten, ilang nakaplagan nga gawas sa mga muwebles, hawan kaayo ang tanang lawak. Nangita silag mga monyeka, mga dula, o dulaan nga mga mananap. Walay mga libro o dulaan nga mga bloke. Wala ganiy papel ug gunting. Ang tanang dulaan gikuha ug dili ibalik sulod sa tulo ka bulan. Unsay nahitabo?

Kini maoy matang sa kindergarten nga nagkadaghan sa Alemanya, Austria, ug Switzerland nga miapil sa talagsaon ug bag-o nga proyekto nga gitawag ug Walay-Dulaan nga Kindergarten. Bisag katingalahan pamation, ang tumong niining maong proyekto, nga girekomendar gayod sa mga eksperto sa panglawas sa Uropanhong Unyon, mao ang pagsanta sa pagkagiyan. Sa di pa dugayng katuigan ang mga tigpanukiduki nakaamgo nga menos ang purohan nga magiyan ang mga tawo kon sila makaugmad ug katakos sa pagpakighugoyhugoy sa sayong bahin sa kinabuhi. Kini naglakip, matod pa sa taho sa mantalaan, “sa katakos sa pagpakigsulti ug pagpakighimamat sa laing tawo, pagdumala sa mga panagbangi, pagdawat sa tulubagon sa kaugalingong mga lihok, paghimog kaugalingong mga tumong, pag-ila sa mga problema, pagpangayog tabang, ug pagpangitag solusyon.” Sumala sa mga tigpasiugda niining maong programa, ang maong mga katakos kinahanglang maugmad nga sayo pa kutob sa maarangan, ug ang mga yugto nga walay dulaan makatabang sa pagkab-ot niining maong tumong, nga magdasig ug pagkamamugnaon ug pagsalig-sa-kaugalingon.

Ang tulo-ka-bulan nga walay dulaan giplano pag-ayo ug gihisgotan uban sa mga ginikanan ug mga anak. Sa sinugdan, ang pipila ka mga bata wala masayod kon unsay buhaton kon walay mga dulaan. “Adunay mga kindergarten diin ang mga bata badlongon kaayo sulod sa unang upat ka semana,” ug ang mga tigplano wala na masayod kon unsaon pagsagubang ang situwasyon, matod pa sa taho. Apan ang mga bata nakakat-on ra sa pagpasibo ug sa pagkahimong mamugnaon. Kay wala nay mga dulaan, ang mga bata mas mag-estoryahanay, magplano, ug magdula nga magkauban, sa ingon napauswag ang ilang katakos sa pagpakighugoyhugoy ug pagsulti. Ang uban nga magdula lang kaniadto imbes makig-estorya sa ubang mga bata sa pagkakaron nakighigala na. Ang mga ginikanan nakamatikod usab ug positibong mga kausaban. Ang mga bata dili na kaayo badlongon samtang magdula ug mas mamugnaon kay kaniadto, matod nila.