“Dili Namo Gustong Saulogon ang Kalagkalag!”

TINAMPO SA MAGSUSULAT SA PAGMATA! SA BELGIUM

Mao kana ang desisyon sa usa ka klase didto sa Tienen, Belgium. Nganong nakadesisyon man ang mga estudyante ug ingon niana? Sa Belgium, medyo bag-o pa lang gisugdan ang pagsaulog sa Kalagkalag. Sa pagkatinuod, niadtong Oktubre 31, 2002 ang unang higayon nga ang maong selebrasyon gisaulog niining maong tunghaan. Busa sa wala pa moabot kanang adlawa, ang magtutudlo nag-asayn sa tanang bata ug usa ka proyekto maylabot sa Kalagkalag. “Labing maayo kon kini mas ngil-ad ug mas katingad-an!” midugang siya.

Usa sa mga bata sa maong klase mao ang 10-anyos nga si Matthias. Nahinumdom siya sa iyang nabasahan bahin sa natagong mga kapeligrohan sa popular nga mga selebrasyon sama sa Kalagkalag diha sa Oktubre 8, 2001, nga gula sa Pagmata! Iyang naamgohan nga ang Kalagkalag nalangkit sa mga butang nga dili makapahimuot sa Diyos. Busa alang niining maong proyekto, si Matthias nagsulat ug taho nga gipasukad nianang mga artikuloha. Human mabasa pag-ayo ang maong impormasyon, ang magtutudlo ni Matthias nakahinapos nga ang Kalagkalag dili kay dili makadaot ingon sa gihunahuna sa kadaghanan. Dayon gihangyo niya si Matthias sa paghimog presentasyon ngadto sa klase bahin nianang ulohana.

Sa dihang gisugdan ni Matthias ang iyang presentasyon, ang ubang mga estudyante morag wala maminaw. Apan, samtang nagpadayon siya, silang tanan namati pag-ayo sa iyang pagsaysay. Pagkahuman ni Matthias, gipangutana sa magtutudlo ang klase kon gusto pa ba nilang magsaulog ug Kalagkalag. Nagkahiusa ang klase sa pagtubag: “Dili!” Usa ka estudyante mipatugbaw: “Makahahadlok kana!” Ang lain miingon: “Wala ko makaamgo nga ang Kalagkalag wala gayod diay magtahod sa mga tawong nangamatay.”

Para kang Matthias, nga kaniadto medyo maulawon, kining maong eksperyensiya nagdasig gayod kaniya sa pagsunod sa iyang pinasukad-sa-Bibliya nga mga pagtuo bisan pa sa pagpit-os. Naangkon usab niya ang dakong pagtahod ingong usa sa mga Saksi ni Jehova, gikan sa iyang magtutudlo ug sa iyang mga klasmet.