Gikan sa Among mga Magbabasa

Matikdi: Daghang magbabasa ang nagpadalag sulat bahin sa serye nga “Pagsabot sa mga Mood Disorder,” nga makita sa among gula sa Enero 8, 2004. Ang mosunod nga mga sulat maoy pipila lamang sa daghang sulat nga among nadawat.

Daghan na akog nabasang mga artikulo sa inyong mga magasin nga nakatandog kanako, apan kining artikuloha ang labawng nakatandog kanako. Samtang nagbasa ako bahin sa atong mga igsoong lalaki ug babaye nga nag-antos niining sakita, naluoy gayod ako kanila. Kon nakasulti man akog bisan unsa nga nakapasilo kanila, hinaot nga ila akong pasayloon. Palihog padayona ang pagpatik ug mga artikulong sama niini. Kini makatabang kanatong tanan nga mahimong mas mahigugmaon ug masinabtanon.

S. W., Tinipong Bansa

Gibati nako nga daw natapos na ang akong kinabuhi sa dihang gidayagnos ako nga dunay bipolar disorder. Mihilak ako pag-ayo, apan nangamuyo usab ako kang Jehova. Karong semanaha nadawat nako ang tubag sa akong mga pag-ampo​—ang Pagmata! bahin sa mga mood disorder. Gibati nako nga daw personal nga gipahayag ni Jehova ang iyang mainitong pagmahal kanako. Tungod niining mga artikuloha, aduna na akoy kusog sa pagpadayon sa unahan.

R. T., Canada

Ang among 12-anyos nga anak lalaki gidayagnos nga may bipolar disorder tulo ka tuig kanhi. Kanunay niyang bation nga walay usa nga nakasabot sa iyang mga problema ug nga si Jehova wala magtagad kaniya. Sa dihang among gipakita kaniya kining mga artikuloha, iya dayon kining gibasa. Nanglugmaw ang mga luha sa iyang mga mata sa dihang siya miingon: “Ma, aduna diay nakasabot kanako. Ug si Jehova nakasabot kanako.” Malipayong gidawat sa iyang doktor ang magasin, ug nagkaestorya mig maayo bahin sa Bibliya.

L. P., Tinipong Bansa

Kinasingkasing nakong gihangyo si Jehova nga aduna untay basahon nga mapatik bahin sa bipolar disorder. Karon, duha ka bulan sa ulahi, nadawat nako ang Enero 8, 2004, nga gula sa Pagmata! Tungod sa inyong praktikal nga mga sugyot, napauswag nako ang akong pag-alagad kang Jehova.

M. S., Mexico

Gigamit nako ang impormasyon niining seryeha alang sa usa ka proyekto sa kolehiyo. Ang pangulo sa departamento alang sa programa maylabot sa linaing mga panginahanglan nangayog kopya sa maong magasin aron sa pagtudlo sa mga kawani niini bahin sa bipolar disorder. Padayona ang inyong maayo kaayong buluhaton. Daghan ang makabenepisyo niana.

K. R., Tinipong Bansa

Tin-aw ninyong napasiugda ang kahinungdanon nga dili lainon pagsabot ang usa ka tawo nga adunay balatian nga sama niana. Kining mga artikuloha makatabang kanamong mga ansiyano sa kongregasyon sa pagsabot sa mga kahimtang sa mga igsoon nga nakigbisog niining maong mga balatian ug sa pagtabang kanila.

R. P., Italya

Ang akong magulang nga babaye nag-antos sa grabeng depresyon. Sa dihang gibasa nako kining mga artikuloha, nakahilak ako tungod kay akong naamgohan nga nagpasagad lang diay ako ug sulti bahin sa iyang lisod nga kahimtang. Nasayran na nako karon nga dili ko angayng mohunong sa pagtabang sa akong igsoon kondili mapailobong mosabot kaniya.

D. P., Tinipong Bansa

Nasinatian nako ang tanan nakong nabasa niining seryeha. Nakahilak ako ug medyo migaan ang akong pagbati nga sad-an. Gihatagan nakog kopya ang akong doktor, kinsa nagdasig kanako sa paghupot sa akong pagtuo.

A. L., Pransiya

Ako nag-edad ug 13 anyos. Daghang beses nga gusto na nakong mamatay. Nakatabang gayod kanako ang Pagmata! aron magpabiling buhi. Nasayran ko karon nga si Jehova may pagtagad gayod ug nga siya mamati kanato!

M. S., Tinipong Bansa

Kanunay nakong giisip ang depresyon ingong sobrang pagkamahunahunaon sa kaugalingon, usa ka butang nga mahimo rang pukgoon dihadiha sa usa ka tawo. Apan, human mabasa kining mga artikuloha, akong naamgohan nga kon dili nako sabton ang mga pagbati sa ubang tawo, ako diay hinuon ang mahunahunaon sa kaugalingon.

R. N., Tinipong Bansa

 Salamat niining maayong pagkasulat nga serye. Kini naghatag ug maayong pasukaranan alang sa pagpanambal. Sa pagkakaron ako nagtuon sa sikolohikal nga pagpanambag, ug ipadapat nako ang akong nakat-onan niining artikuloha nganha sa akong mga kliyente.

P. Y., Tinipong Bansa

Sulod sa kapin sa napulo ka tuig, nakigbisog ako sa depresyon. Kining mga artikuloha naghisgot sa mga kaayohan sa pagbaton ug usa ka talaadlawan, ug gusto nakong sulayan kana. Irekord sa usa ka Kristohanong higala diha sa teyp ang mga tigom alang kanako kon dili ko makatambong, ug dako kini nga tabang.

M. S., Japan

Nag-antos ako niini nga mga simtoma sulod na sa napulo ka tuig. Makadaghan nakong gibasa ang mga artikulo ug gitun-an kini pag-ayo uban sa akong bana. Nakatabang kini kanamo nga magkaestoryahay bahin sa akong nag-usab-usab nga buot ug sa pagtagad ug maayo sa usag usa.

I. H., Hungaria

Gisaway ako sa kaugalingon nakong pamilya hangtod sa punto nga buot na nakong maghikog. Apan kining seryeha naghatag kanakog paglaom, nga nahibalo nga si Jehova nakasabot kanako. Karon nagtambongan na usab ako sa Kristohanong mga tigom ug nakig-ambit diha sa ministeryo.

M. B., Tinipong Bansa

Nahupayan ako sa kamatuoran nga wala diay ako mag-inusara sa akong mga pag-antos. Dunay mapuslanong mga sugyot ang maong serye, ug paningkamotan nakong mapadapat kini kutob sa mahimo. Palihog padayona ang pagpatik ug ingon niini nga mga artikulo, nga makatabang sa daghang tawo.

V. L., Rusya

Ako nag-edad ug 68 anyos ug may klinikal nga depresyon sulod na sa mga napulo ka tuig. Ang “mga magbalantay” sa kongregasyon nanginahanglan usab ug pag-amoma, ug ang pipila kanamo makaagom usab ug grabeng depresyon. Ang pagbasa kon sa unsang paagi gidumala sa uban ang mga mood disorder nakatandog pag-ayo kanako.

B. A., Tinipong Bansa

Ang impormasyon nga anaa niining seryeha nagtukmod kanako sa pagpatambal. Nakatabang usab kini sa akong asawa nga mas makasagubang sa akong depresyon. Kanunay akong nakadayeg sa pagkanunot sa panahon ug pagkatukma sa inyong mga artikulo.

C. B., Alemanya

Tulo ka bulan sa wala pa nako mabasa kining seryeha, gidayagnos ako nga may depresyon. Ang una nakong reaksiyon sa maong balita susama gayod sa inyong gihubit diha sa serye​—kakurat ug ang pagkadisgusto nga isulti kana sa uban. Tungod sa inyong mga artikulo, gibati nako nga aduna diay nakasabot kanako ug wala na ako mobating nag-inusara.

A. G., Austria

Sukad sa akong pagkabata, ang akong amahan nag-antos na sa bipolar disorder. Sa dihang mosugmat ang iyang sakit, mag-antos gayod ang pamilya. Bisan tuod nahibalo ako nga aduna siyay sakit, gikasilagan ko siya. Apan sa dihang nabasa nako kining seryeha, nasabtan nako sa unang higayon kon unsay giantos sa akong amahan. Nagsige kog hilak samtang nagbasa niana. Sa sunod higayon nga mopauli ko sa amoa, gusto kong makigsulti kaniya. Sulayan nako ang pagdawat kaniya nga kinasingkasing.

S. S., Japan

Ang anak nga babaye sa akong higala dunay mga problema sa pangisip, ug akong giingnan siya nga kon magtuon ug mag-ampo lang siya ug dugang, moarang-arang ang iyang pagbati. Nakita nako sa impormasyon diha sa panid 10 niining seryeha nga sayop diay ako. Ang pag-ampo ug pagtuon makatabang, apan kini dili makatambal sa mga sakit. Salamat sa paghatag kanako ug bag-ong impormasyon.

B. D., Tinipong Bansa

Daghang higayon nga ako mihilak sa dihang dunay moingon kanako nga kon kita mga Kristohanon, dili na kita makaagom ug depresyon. Apan kining seryeha nakatabang kanako, ug nahupay ako sa pagkahibalo nga wala ako mag-inusara niining problemaha.

P. B., Inglaterra