“Jehova, Nakaplagan Mo Ako!”

Sumala sa giasoy ni Nelly Lenz

“Mga Saksi ni Jehova ba mo?” gipangutana nako ang duha ka lalaki nga mianha sa among balay. “Oo,” sila mitubag. Ako miingon, “Ako pod!” Trese anyos pa ako niadto ug wala magtambongan sa mga tigom sa Kingdom Hall. Ang akong mga ginikanan dili mga Saksi ni Jehova. Nan, nganong nagpaila man ko ingong usa ka Saksi ni Jehova?

KON dili pa tungod sa mga Saksi ni Jehova, wala unta ako matawo. Ang akong inahan nagsabak kanako sa nagpuyo pa siya sa Montreal, Quebec, sa Canada. Siya 17 anyos lang niadtong panahona. Gipugos siyag maayo sa iyang pamilya sa pagpakuha sa iyang gisabak. Siya misugot.

Nananghid si Mama nga dili motrabaho aron magpaaborsiyon. Ang amo ni Mama, nga usa sa mga Saksi ni Jehova, morag nahibalo kon nganong dili siya motrabaho. Lakbit nga gisultihan niya si Mama kon unsa ka bililhon ang gasa sa kinabuhi. (Salmo 139:13-16) Sa pagpaingon niya sa klinika, gipalandong pag-ayo ni Mama ang gisulti sa iyang amo. Nakahukom siya nga dili magpaaborsiyon. Human ako nahimugso niadtong 1964, gidala ako ni Mama sa sagopanan.

Akong Unang Pagkadungog sa Kamatuoran sa Bibliya

Sa dihang nag-edad ako ug mga duha ka tuig, gikuha ako sa akong inahan ug sa iyang bag-ong bana sa sagopanan. Samtang nagpuyo sa Sainte-Marguerite-du-Lac-Masson, sila nagsugod sa pagtuon sa Bibliya uban sa mga Saksi ni Jehova ug mitambong sa mga tigom sa kongregasyon. Apan, wala madugay mibalhin kami sa Boisbriand, ug ang akong mga ginikanan mihunong sa pagtuon.

Paglabay sa pipila ka tuig, gipadayon nila ang ilang pagtuon. Molingkod ako uban kanila aron sa pagpamati bahin sa paglaom sa Bibliya nga paraisong yuta. (Lucas 23:43) Nakakat-on ako sa paghigugma pag-ayo kang Jehova.

Apan, usa ka adlaw niana, giingnan ako ni Mama nga mihunong na sila pagtuon uban sa mga Saksi ug nga dili na kami moadto sa Kingdom Hall. Sa primero, nalipay ako. Kay otso-anyos pa man, bation nako usahay nga dugay kaayong mahuman ang mga tigom. Apan, nianang gabhiona, buot kong makigsulti kang Jehova diha sa pag-ampo, ug nabalaka ako nga basin dili siya mamati kanako.

Pagkasunod Dominggo sa hapon, nakita nako ang among mga silingan nga mga Saksi ni Jehova nga nanglakaw paingon sa ilang tigom sa Kingdom Hall. Misugod ako paghilak ug nangutana sa Diyos, “Nganong makaadto man sa mga tigom ang ilang mga anak samtang ako dili?” Bisan pa niana, ang mga pulong sa Salmo 33:18 mapamatud-an ra unya nga tinuod: “Tan-awa! Ang mata ni Jehova gipunting kanilang nangahadlok kaniya, kanilang nagahulat sa iyang mahigugmaong-kalulot.”

Pagtambong Pag-usab sa Kingdom Hall

Paglabay sa tulo ka semana, giadto nako ang among silingan ug giingnan ang inahan, si Lilianne, nga buot kong motambong sa mga tigom. Si Lilianne miingon nga dili kana mahimo, kay ang akong inahan dili gustong makiglabot sa mga Saksi ni Jehova. Apan, miinsistir ako. Busa, gihatod ako niya sa among balay ug gihangyo si Mama kon mahimo ba akong mouban kanila. Sa akong kakurat, misugot si Mama. Siya miingon nga ang mga tigom makatudlo kanako ug maayong mga prinsipyo. Busa, mitambong ako sa tigom matag Dominggo.

Sulod sa mga tulo ka tuig, nakatambong ako sa mga tigom sa kongregasyon. Apan sa nag-edad ako  ug 11 anyos, nagdiborsiyo ang akong mga ginikanan, ug ang akong inahan ug ako mibalhin ug puyo. Sa makausa pa, wala na akoy kontak sa mga Saksi ni Jehova.

Wala-Damhang Panagtagbo

Usa ka adlaw, naglingkod ako sa hagdanan atubangan sa among balay sa dihang duha ka Saksi​—si Eddie Besson ug Don Fisher​—miduol kanako ug nangutana kon anaa ba sa balay ang akong mga ginikanan. Sa dihang miingon ako nga wala, ang mga lalaki nanglakaw. Apan gigukod nako sila, ug nagkaestoryahay kami ingon sa giasoy sa sinugdan.

Siyempre, ang duha ka lalaki nakurat sa dihang gipaila nako ang akong kaugalingon ingong usa ka Saksi ni Jehova. Gisaysay nako ang akong kahimtang ug gihangyo sila sa pagbalik nianang gabhiona. Sa dihang giingnan nako si Mama nga moduaw ang mga Saksi, naglagot kaayo siya ug miingon nga dili niya sila pasudlon sa among balay. Gani, nagplano siya sa paglakaw sa dili pa sila moabot. Naghilak ako nga naghangyo kang Mama sa dili pagbiya sa balay. Sa dihang nangandam na siya sa paglakaw, mibagting ang timbre sa pultahan, ug didto si Eddie Besson. Handurawa ang akong kalipay sa dihang gidawat ni Mama ang pagtuon sa Bibliya!

Sa kataposan, makatambong na ako pag-usab sa mga tigom sa kongregasyon! Apan, wala pay usa ka tuig sa ulahi, mihunong na usab pagtuon ang akong inahan. Niining higayona, gidid-an niya ako sa pagpakigkontak sa mga Saksi ug gilabay ang tanang publikasyon sa mga Saksi ni Jehova nga iyang makit-an. Apan natagoan nako ang Bibliya, songbok, duha ka tomo sa Ang Bantayanang Torre, duha ka Tinuig nga Basahon sa mga Saksi ni Jehova, ug usa ka libro nga nag-ulohag Ang Kamatuoran nga Motultol sa Kinabuhing Dayon. a Sa kataposang higayon sa akong pagtuon, gipangutana nako si Eddie Besson kon unsay akong buhaton, sanglit gihigugma nako pag-ayo si Jehova. Gidasig niya ako sa pagtuon nga kinaugalingon ug sa pag-ampo kanunay. Iya akong gipasaligan nga si Jehova mag-atiman kanako. Mga 14 anyos lang ako niadto.

Nagdumala sa Akong Kaugalingong “mga Tigom”

Sukad niadto, moadto ko sa akong kuwarto matag Dominggo ug maghanduraw nga ako atua sa tigom. Awiton nako ang awit nga “Tutoki ang Ganti!” sa pagsugod ug pagkahuman sa tigom kay mao ra kana ang akong mahinumdoman nga awit sa Gingharian. Hangtod karon, makahilak ako sa dihang awiton nako kini. Tun-an usab nako ang usa ka artikulo sa Bantayanang Torre diha sa nabatonan nako nga mga tomo. Taposon nako ang akong “tigom” uban sa pag-ampo. Busa bisan tuod wala na ako makapakig-uban sa mga Saksi, mibati ako nga suod kang Jehova.

Sa nag-edad ako ug 17 anyos, mibalhin kami ni Mama sa Montreal. Malisod kadto nga mga panahon, sanglit walay gugma ang among panimalay.

Nakaplagan!

Usa ka adlaw, si Mama midawat sa libro nga Ikaw Mabuhing Walay Kataposan sa Paraiso sa Yuta gikan sa mga Saksi ni Jehova. Pag-abot nako sa balay, nakita nako kini ibabaw sa lamesa ug gisusi nako kini. Sa dihang nakita nako nga naggamit kini sa ngalan sa Diyos, si Jehova, mihilak ako ug miampo sa hilom, “Jehova, nakaplagan mo ako!”

Kinahanglang kontakon nako ang akong Kristohanong mga igsoon. Apan unsaon? Giingnan ako ni Mama nga ang usa namo ka silingan morag usa sa mga Saksi ni Jehova. Busa sa akong pagpaingon sa trabaho, mihapit ako sa balay sa among silingan ug mipislit sa ilang timbre. Usa ka lalaki​—nga napukaw gikan sa katulog​—miabli sa pultahan. Nakurat gayod siya sa dihang miingon ako nga Saksi ni Jehova ako ug nga buot na akong magpabawtismo! Iyang gipakigsabotan ang igsoong babaye nga ginganlag Josée Miron nga maoy magtuon kanako sa Bibliya. Apan sa makausa pa, misupak si Mama sa akong pagtuon ug Bibliya. Giingnan ko niya nga kinahanglang maghulat una ako hangtod nga mag-18 anyos ayha pa ako mahimong Saksi.

Isalikway Ko ba si Jehova Aron Matagamtam ang Pamilyahanong Kinabuhi?

Namatikdan sa akong amo nga ang akong kahimtang sa panimalay nagkagrabe. Kanunay niya akong dapiton sa pagpakig-uban kaniya ug sa iyang asawa sa mga hinapos sa semana. Sanglit gusto ako ug mga kabayo, mag-uban kami kanunay nga mangabayo. Gibati nako nga daw mga ginikanan nako sila.

Usa ka adlaw niana, giingnan ako sa akong amo nga pinangga kaayo ako nila ug nga buot nila nga mopuyo ako uban kanila. Gitanyagan ako niya ug usa ka butang nga dugay na nakong gipangandoy​—usa ka mahigugmaon nga pamilya.  Apan adunay kondisyon​—kinahanglang mohunong ako sa pagpakig-uban sa mga Saksi ni Jehova. Gihatagan ako nila ug usa ka semana sa paghunahuna sa ilang tanyag, apan wala gani ako magkinahanglan ug usa ka adlaw. Gitubag dayon nako sila. Si Jehova wala gayod mobiya kanako, ug dili ako makabiya kaniya.

Akong Pag-alagad sa Diyos

Tungod sa kalisod nga akong naagoman sa balay, mibalhin akog puyo uban sa akong ama-ama. Gidasig niya ako sa pagpadayon sa pagtuon, ug sa Disyembre 17, 1983, sa edad nga 19, ako nabawtismohan. Nalipay kaayo ako sa pagkakita kang Eddie Besson sa adlaw sa akong bawtismo. Karon wala na gayoy pagduhaduha diha sa iyang hunahuna nga ako usa ka Saksi ni Jehova!

Hinunoa, ang batasan sa akong ama-ama nausab human nga ako nabawtismohan. Sa dihang makita niya ako nga mag-ampo, mosulti siyag sobra ka kusog ug bun-on pa gani niya ako ug mga butang! Miinsistir usab siya nga mokuha ako ug dugang edukasyon nga lagmit makabalda sa akong tumong sa pagkahimong payunir, o usa ka bug-os-panahong magwawali. Ngadtongadto, gipapahawa niya ako sa balay. Gihatagan niya ako ug tseke nga $100 ug giingnan ako nga sa dihang pabayloan nako kana, masuta nako nga si Jehova wala magtagad kanako.

Nahimo akong payunir sa Septiyembre 1, 1986, ug ania pa gihapon kanako ang tseke​—nga wala pabayloi​—hangtod karon! Lisod usahay ang pagpayunir sa kabaryohan kon walay sakyanan. Apan mapaluyohon ug matinabangon kaayo ang mga igsoon sa among kongregasyon.

Sa paglabay sa panahon, nahimamat nako ang usa ka buotang Kristohanon nga ginganlag Ruben Lenz. Nagpakasal kami sa 1989. Si Ruben nag-alagad karon ingong ansiyano sa Milton, Ontario, sa Canada, diin kami nagpuyo sukad sa 2002. Ang among kaminyoon maoy usa sa dagkong mga panalangin nga gihatag ni Jehova kanako. Nagpadayon ako sa bug-os-panahong pag-alagad hangtod nga natawo ang among kamagulangang anak, si Erika, sa 1993. Kapin lag diyutay sa tulo ka tuig sa ulahi, natawo ang among anak nga lalaki nga si Mika. Human nga nagmingaw sa taas nga panahon, dagayang gipanalanginan ako ni Jehova nga Diyos ug usa ka pamilya nga nahigugma pag-ayo kaniya sama kanako.

Bisan tuod nga dihay mga higayon nga nabulag ako gikan sa katawhan ni Jehova sa panahon nga nagdako ako, wala ako mohunong sa pagsandig sa akong paglaom diha sa Diyos ug sa paghawid sa akong paglaom nga kinabuhing walay kataposan sa Paraiso. (Juan 3:36) Mapasalamaton kaayo ako nga “nakaplagan” ako ni Jehova!

[Footnote]

[Hulagway sa panid 15]

Nagsakay sa kabayo sa akong amo

[Hulagway sa panid 15]

Si Nelly Lenz uban sa iyang bana, si Ruben, ug mga anak nga si Erika ug Mika