Pag-atubang sa mga Problema sa Tin-edyer nga mga Inahan

ATUBANGON sa mabdos nga mga tin-edyer ang palas-anon sa paghimog mga desisyon nga iya lang unta sa mga hamtong. “Mora kog 40 anyos na,” matod pa sa usa ka tin-edyer nga inahan. “Wala ako makapahimulos sa kinabuhi sa pagkabatan-on.” Sa pagkatinuod, sa higayon nga madiskobrehan sa usa ka dalagita nga siya mabdos, malumsan gayod siya sa kahadlok ug kabalaka.

Kon mabdos ka nga tin-edyer, tingali ingon usab niana ang imong gibati. Apan, wala kay mahimo kon magpadaog ka sa negatibong mga emosyon. “Siya nga nagapaniid sa hangin dili makapugas ug binhi,” nag-ingon ang Bibliya, “ug siya nga nagalantaw sa mga panganod dili makaani.” (Ecclesiastes 7:8; 11:4) Ang usa ka mag-uuma nga mohunong sa pagtrabaho tungod kay nabalaka siya sa panahon dili gayod makahimo sa kinahanglang buhaton. Busa ayaw padaog sa negatibong mga emosyon. Wala ka gihapoy mahimo kondili abagahon ang imong mga responsibilidad.​—Galacia 6:5.

Unsa may puwede nimong himoon? Tingali sulsolan ka sa uban nga magpaaborsiyon. Apan dili kini angayng himoon niadtong buot nga magpahimuot sa Diyos, kay klarong gisulti sa Bibliya nga ang aborsiyon supak sa balaod sa Diyos. (Exodo 20:13; 21:​22, 23; Salmo 139:14-16) Sa mga mata sa Diyos ang kinabuhi sa nagtubong bata sa tagoangkan​—apil nianang bata nga gisamkon sa usa ka babaye nga dili kasado​—bililhon.

Unsa kaha kon imong pakaslan ang amahan sa bata aron kamong duha ang magpadako kaniya? Tingali dili ka maulawan kon magpakasal ka sa amahan sa bata. Apan, bisan pag dawaton sa batan-ong amahan nga siya dunay moral nga responsibilidad sa pagtabang sa pagpadako sa bata, dili sa tanang higayon nga ang pagpakasal mao ang labing maayong desisyon. a Dili buot ingnon nga kay ang usa ka batan-ong lalaki makapamabdos, siya hamtong na sa emosyon ug hunahuna nga hinungdanon aron mahimong maayong bana ug amahan. Wala usab kini magkahulogan nga siya makasustento nag asawa ug anak. Dugang pa, kon ang batan-ong lalaki dili sama nimo ug relihiyon, ang pagpakasal kaniya maoy pagsupak sa tambag sa Bibliya nga magminyo “lamang diha sa Ginoo.” (1 Corinto 7:39) Gipakita sa mga kasinatian nga ang pagdalidali sa pagminyo nga wala sa panahon​—ug tingali wala magdugay nga pag-ubanay ingong bana ug asawa—​basin moresulta lang ug dugang nga kasakit ug pag-antos.

Maayo kaha kon ipasagop ang bata? Bisan ug mas maayo kini kay sa aborsiyon, angay nimong hunahunaon nga bisan pa sa dili maayong mga kahimtang, ikaw may kahigayonan sa pag-atiman ug pagmatuto sa imong anak.

Pag-atubang sa mga Problema

Tinuod, dili sayon ang pagmatuto ug bata nga walay bana. Apan, pinaagi sa pagpadapat sa mga prinsipyo sa Bibliya kutob sa imong maarangan ug pagsalig sa Diyos alang sa kusog ug giya, ikaw molampos sa pag-atubang sa daghang problema. Aniay pipila ka lakang nga makatabang kanimo sa pagsagubang niini.

● Ipasig-uli ang imong relasyon sa Diyos. Timan-i nga ang pagpakigsekso nga dili kasado maoy usa ka sala batok sa Diyos​—usa ka kalapasan batok sa iyang taas nga mga sukdanan sa moralidad. (Galacia 5:19-21; 1 Tesalonica 4:​3, 4) Busa, ang unang hinungdanong lakang mao ang paghinulsol ug pagpangayog pasaylo sa Diyos. (Salmo 32:5; 1 Juan 2:​1, 2) Tinuod, basin mobati ka nga dili takos sa iyang tabang. Apan, si Jehova nagsaad nga mopasaylo siya kanato kon kita maghinulsol, ug siya motabang niadtong maghinulsol sa ilang mga kasaypanan. (Isaias 55:​6, 7) Sa Isaias 1:​18, si Jehova miingon: “Bisan tuod ang inyong mga sala sanag-pula [bug-at, grabe], kini papution sama sa niyebe [bug-os nga nahinloan].” Ang Bibliya nagdasig usab sa mga nakasala sa pagdawat sa espirituwal nga  tabang nga ihatag sa tinudlo nga mga ansiyano sa kongregasyon.​—Santiago 5:​14, 15.

● Ayaw na pagpakigsekso kon dili kamo kasado. Nagpasabot kana nga taposon nimo ang imong relasyon sa amahan sa imong anak. Kon imong ipadayon kana nga relasyon nga dili kamo kasado, mapugos ka sa pagpadayon sa usa ka buhat nga dili makapahimuot sa Diyos. Ayaw gayod kalimti nga ang mga balaod sa Diyos, bisag estrikto, makapanalipod kanato. Si Nicole, nga gikutlo sa unang bahin niini nga serye, nahinumdom: “Akong naamgohan nga husto ang Diyos. Gusto niya nga makabaton kita ug kaayohan.”​—Isaias 48:​17, 18.

● Sultihi ang imong mga ginikanan. Natural lang nga mahadlok ka nga masuko kanimo ang imong mga ginikanan. Siyempre, maguol ug mabalaka sila kon masayran nila nga mabdos ka. Tingali basin ganig bation nila nga napakyas sila sa ilang pagmatuto kanimo ug basolon nila ang ilang kaugalingon tungod sa imong sayop nga nahimo. Apan, kon mahinadlokon gayod sa Diyos ang imong mga ginikanan, ang unos sa kahiubos ug kasakit lagmit nga molurang ra sa ulahi. Sila imong mga ginikanan, ug bisan pa sa imong kasaypanan, gihigugma ka nila. Kon ilang makita nga naghinulsol ka, seguradong mapalihok sila sa pagsundog sa amahan sa anak nga masukihon sa ilustrasyon ni Jesus ug mahigugmaong magpasaylo kanimo.​—Lucas 15:11-32.

● Ipasundayag nga mapasalamaton ka. Tinuod gayod nga usa ka dakong tabang ug pagpaluyo ang mga ginikanan, paryente, ug mga higala. Pananglitan, tingali ipadoktor ka sa imong mga ginikanan. Inigkahimugso sa imong bata, tingali tabangan ka nila nga makakat-on sa  simpleng mga paagi sa pag-atiman sa bata; basin pa ganig mopresentar sila nga mobantay sa imong bata. Kini ang gisulti ni Nicole bahin sa iyang inahan, “Ako ang may masuso, apan dako kaayo siyag natabang kanako.” Motabang usab tingali ang imong mga higala, nga lagmit mohatag ug besti ug ubang mapuslanong mga gamit sa bata. (Proverbio 17:17) Kon pakitaan kag kaayo, sunda ang tambag sa Bibliya ug ‘ipasundayag ang pagpasalamat.’ (Colosas 3:15) Kon pasalamatan nimo sila, dili sila makaingon nga gibalewala nimo ang ilang mahigugmaong tabang.

● Tun-i ang mga katakos sa pagkaginikanan. Siyempre, dili ka gusto nga magsalig na lang sa imong pamilya ug mga higala hangtod sa hangtod. Busa pagsugod sa pag-ugmad sa mga katakos nga motabang unya kanimo nga mahimong hanas sa pag-atiman sa imong anak ug sa pagdumala ug panimalay. Usa ka hagit ang pagkat-on sa pag-atiman sa usa ka masuso nga nagkinahanglan ug dako kaayong pagtagad. Daghan ka ug gikinahanglan nga tun-an bahin sa pagkaon, maayong panglawas, ug ubang mga detalye bahin sa pag-atiman sa bata. Makaiikag, ang Bibliya nag-awhag sa gulanggulang nga Kristohanong mga babaye sa pagdasig sa batan-ong mga babaye nga ‘magkugi sa mga buluhaton sa balay.’ (Tito 2:5) Segurado nga ang imong inahan​—ug tingali ang uban pang gulanggulang nga mga membro sa Kristohanong kongregasyon​—makahatag kanimo ug mapuslanong pagbansay labot niini.

● Magmaalamon sa paggasto sa kuwarta. Ang Bibliya nag-ingon nga “ang salapi usa ka panalipod.” (Ecclesiastes 7:12) Dako ang gasto kon dunay masuso.

Tingali sulayan una nimo nga pahimuslan ang bisan unsang tabang alang sa publiko nga puwede nimong mabatonan. Apan, kasagaran ang tin-edyer kinahanglan gihapon nga magsalig sa sustento sa iyang mga ginikanan. Kon kana ang imong kahimtang, mas maayo ug pagpakitag konsiderasyon kon imong menosan ang imong gastos kutob sa mahimo. Seguro gusto nimo ug bag-ong mga gamit sa imong bata, pero makadaginot ka kon mamalit ka ug mga ukay-ukay o segunda-manong mga gamit.

● Paningkamot nga makaeskuyla. “Ang mga maalamon mao kadtong nagatipig ug kahibalo,” matod pa sa Proverbio 10:14. Bisan tuod kini ikapadapat ilabina sa kahibalo sa Bibliya, ikapadapat usab kini sa sekular nga edukasyon. Kinahanglan imong ugmaron ang hinungdanong mga katakos aron makapanginabuhi ka.

Tinuod, lisod ang pag-eskuyla kon may bata ka nga giatiman. Apan, kon kulang ang imong edukasyon, ikaw ug ang imong anak dili na mahaw-as sa kakabos, magsalig na lang kanunay sa tabang  sa gobyerno, gamayg kita, dili maayog puy-anan, o kulang ug pagkaon. Busa kon mahimo nimo, padayon sa pag-eskuyla. Ang inahan ni Nicole miinsister nga taposon niya ang iyang pag-eskuyla, ug tungod niini, si Nicole nabansay sa ulahi sa pagsustento sa iyang kaugalingon ingong luyoluyo sa usa ka abogado.

Nganong dili nimo sulayan pagsusi kon unsang kurso ang puwede nimong kuhaon? Kon lisdan ka sa pagsulod sa klase, sulayi pagsusi kon puwede kang makaeskuyla sa balay. Pananglitan, ang mga kurso sa pagtuon pinaagig sulat tingalig praktikal sa imong kahimtang.

Posibleng Molampos Ka

Alang sa usa ka dalagita, dili sayon ang pagpadako ug anak kon walay bana. Apan posible nga molampos ka! Pinaagi sa pagpailob, determinasyon, ug sa tabang ni Jehova nga Diyos, ikaw posible nga mahimong usa ka mahigugmaon, may-katakos, batid nga ginikanan. Ug ang mga anak sa dalagang mga inahan mohingkod nga lig-on ug emosyon. Aw, lagmit makahatag pa kanimog kalipay nga makita ang imong anak nga mahimong masinundanon sa imong pag-umol ug pagbansay ug mahimong mahigugmaon sa Diyos.​—Efeso 6:4.

Gipahayag kana ni Nicole niining paagiha: “Sa tabang sa Diyos​—bisag lisod kaayo​—nalipay ako nga napadako ko ang akong anak nga babaye nga nahimong usa ka buotan, matinahoron, ug responsableng dalagita. Sa magtan-aw ako kaniya, mahinumdom ako sa mga gabii nga dili ako makatulog sa kabalaka apan sa laing bahin natugob usab ako sa kalipay.”

Apan, sa unsang paagi tagdon sa mga hamtong ang tin-edyer nga mga inahan ug ang ilang mga anak? Aduna bay paagi sa pagtabang sa mga batan-on aron malikayan nila ang kasakit nga naagoman sa mabdos nga mga tin-edyer?

[Footnote]

[Mga hulagway sa panid 8, 9]

Giatubang sa tin-edyer nga mga inahan ang daghang problema sa pagpadako sa ilang mga anak

[Hulagway sa panid 10]

Ang pagdalidali sa pagminyo nga wala sa panahon dili maoy tubag

[Hulagway sa panid 10]

Ang Kristohanong mga ansiyano makatabang sa nakasala nga mga batan-on sa pagpasig-uli sa ilang relasyon sa Diyos

[Hulagway sa panid 11]

Mas maayong taposon sa dalagang mga inahan ang ilang pag-eskuyla