Tabang ug Panalipod Alang sa mga Batan-on

MAKAPAGUOL gayod kon ang usa ka bata nga wala pa kaayoy buot mamabdos nga walay bana. Bisan pa niana, ang pagmabdos sa mga tin-edyer kaylap, ug kini nakaapektar sa tanan sa pipila ka paagi. Ang trahedya sa pagmabdos sa mga tin-edyer maoy usa lamang ka pamatuod nga husto ang sugo sa Diyos: “Kalagiw gikan sa pakighilawas.”​—1 Corinto 6:18.

Bisan pa niana, usahay, ang usa ka batan-ong babaye nga gitudloan sa mga prinsipyo sa Diyos mopili sa dili pagsunod o pagsalikway sa iyang nahibaloan. Siya makahimog seksuwal nga imoralidad ug mamabdos. Unsay angayng himoon sa matuod nga mga Kristohanon? Sa dihang ipakita sa nakasala nga batan-on nga siya naghinulsol, ang iyang mga ginikanan ug ang ubang mga membro sa Kristohanong kongregasyon angayng maghatag kaniya ug mahigugmaong tabang ug pagpaluyo.

Tagda pag-usab si Nicole. Ang iyang mga ginikanan nagmatuto kaniya aron mahimong usa sa mga  Saksi ni Jehova. Busa naguol gayod sila sa dihang siya namabdos nga walay bana. Bisan pa niana, si Nicole nahinumdom, “Ang akong kaubang mga Kristohanon moduaw kanako sa balay ug maningkamot sa pagdasig kanako sa pagtuon sa Bibliya ug sa pagpabilin nga suod kang Jehova.”

Ang mga Saksi ni Jehova supak gayod sa sayop nga seksuwal nga panggawi. Apan ilang giila nga pinaagi sa pagpadapat sa mga prinsipyo sa Bibliya, ang mga nakasala posibleng “mag-usab.” (Roma 12:2) Sila lig-ong nagtuo nga pasayloon sa Diyos ang mga nakasala nga naghinulsol. (Efeso 1:7) Gidawat usab nila nga bisan pag anak sa gawas ang bata, walay sala ang bata. Busa, imbes ikaulaw ang maong bata, ang mga membro sa Kristohanong kongregasyon magpakita kaniya ug samang malumong pagmahal, pagkamabination, ug kalulot nga ilang ipakita sa ubang bata diha sa ilang taliwala.​—Colosas 3:12.

Dihay usa ka inahan nga walay bana nga nagsugod sa pagtuon sa Bibliya uban sa mga Saksi ni Jehova. Gipadapat dayon niya ang mensahe sa Bibliya ug naghimog dagkong mga kausaban sa iyang kinabuhi. Siya naghisgot bahin sa mga Saksi: “Silang tanan nagpakitag tininuod nga interes kanako ug sa akong mga anak. Sila mihatag ug pagkaon ug besti sa dihang gikinahanglan maingon man pinansiyal nga tabang. Sa dihang kuwalipikado na ako sa pagsangyaw uban sa mga Saksi ni Jehova, silay magbantay sa bata samtang mosangyaw ako. Gihimo nila ang tanan sa pagtabang kanako nga maugmad ang tinuod nga gugma kang Jehova.”

Paglikay

Apan, mas maayo gayod kon tabangan ang mga batan-on sa paglikay niini nga mga problema sa sinugdan pa lang. Busa ang mga Saksi ni Jehova naningkamot sa paghatag sa ilang mga anak ug mainiton ug mahigugmaon nga atmospera diha sa pamilya. Imbes nga hadlokon lang ang ilang mga anak nga mataptan ug AIDS o kaha mamabdos, ang mga Saksi ni Jehova maningkamot sa pagtudlo sa mga batan-on sa tinuod nga gugma alang kang Jehova nga Diyos ug sa iyang mga balaod. (Salmo 119:97) Sila nagtuo nga ang mga bata kinahanglang hatagan ug tukmang impormasyon bahin sa sekso. Labaw sa tanan, sila nagtuo nga sukad sa pagkamasuso, ang mga bata kinahanglang tudloan sa moral nga mga prinsipyo nga gitala diha sa Bibliya. (2 Timoteo 3:15) Ang pormal nga mga instruksiyon ginatudlo diha sa lokal nga mga Kingdom Hall sa mga Saksi ni Jehova. Bisan pa niana, ang mga ginikanang Saksi gidasig usab sa pagtuon sa Bibliya sa personal nga paagi uban sa ilang mga anak. Ang mga basahon, sama sa librong Mga Pangutanang Gisukna sa mga Batan-on​—Mga Tubag nga Mosaler, gipatik aron matabangan ang mga ginikanan sa paghatag sa ilang mga anak ug moral nga giya. a

Ang pagsunod sa estriktong moral nga mga sukdanan sa Bibliya nagkasumpaki sa imoral nga mga paggawi nga kaylap sa kalibotan karon. Apan usa kini ka paagi sa pagkinabuhi nga kon sundon, makapanalipod sa minilyon ka batan-ong mga babaye batok sa mabug-at nga problema nga resulta sa pagmabdos sa mga tin-edyer.

[Footnote]

[Hulagway sa panid 12]

Ang matuod nga mga Kristohanon magpakitag kalulot ug konsiderasyon sa dalaga nga mga inahan