Gikan sa Among mga Magbabasa

Mga Anak Sa dihang nadawat nako ang serye nga “Mga Anak​—Kon Unsay Ilang Gikinahanglan Gikan sa mga Ginikanan,” gibasa dayon nako kini. (Disyembre 22, 2003) Ingong inahan sa lima ka anak, natandog gayod ang akong kasingkasing nianang mga artikuloha. Maayo untag makabasa niini ang tanang inahan.

C. M., Pransiya

Ang mga artikulo nga inyong gipatik miabot gayod sa hustong panahon alang nako. Sa dihang nahibaloan nako ug sa akong bana nga hapit na ming makabaton ug anak, nagpatik kamo ug impormasyon alang sa mabdos nga mga babaye. (Enero 8, 2003) Karon nga nahimo na kaming malipayong mga ginikanan sa tulo-ka-bulan nga anak lalaki, nagpatik kamo ug mapuslanong mga sugyot sa pagmatuto sa mga masuso. Alang sa bag-ong inahan, kining mga artikuloha mapuslanon kaayo.

D. K., Polandia

Sugilanon sa Kinabuhi Pasalamatan ko kamo sa tanang artikulo, apan nalingaw gayod ako sa mga sugilanon sa kinabuhi. Ang sugilanon ni Eileen Brumbaugh, “Ang Pamesti ug Panghindik Maoy Nakapugong Kanako sa Pagdawat sa Kamatuoran,” nakapalihok sa akong kasingkasing. (Disyembre 22, 2003) Tim-os gayod ang iyang tinguha nga makaplagan ang matuod nga relihiyon!

L. M., Rusya

Ako interesado gayod sa sugilanon ni Eileen Brumbaugh tungod kay dinhi sa among dapit dakodako ang populasyon sa mga pamilyang Amish ug Mennonite. Kaniadto nagtuo ako nga walay kapuslanan ang pagpakig-estorya kanila bahin sa Bibliya tungod kay morag kombinsido na kaayo sila sa ilang tinuohan. Gikan sa iyang kasinatian akong nasabtan nga pinaagi sa pagpakitag personal nga pagtagad ug sinserong interes, kita makatabang sa tanang matang sa mga tawo nga makadangat sa tukmang kahibalo bahin sa Diyos.

M. H., Tinipong Bansa

Ako usab nakigbisog sa panghunahuna nga ang mek-ap ug mga alahas maoy “kalibotanon” gayod. Ang dili-salingkapaw nga gugma taliwala sa mga Saksi ni Jehova, maingon man ang ilang pagtahod sa Balaang Kasulatan, maoy nakatabang kanako sa pagtan-aw saylo pa sa panggawas nga panagway.

A. C., Tinipong Bansa

Mga Tambal nga Hilba Nalingaw ko sa pagbasa sa artikulong “Mga Tambal nga Hilba​—Kini ba Makatabang Kanimo?” (Disyembre 22, 2003) Usa ako ka lisensiyadong nars, ug naggamit ako ug nagkalainlaing kinaiyanhong mga tambal para sa akong mga lutahan. Nakita nakong makaayo gayod kana sa akong kahimtang. Apan, wala ninyo hisgoti nga ang ubang mga hilba makapahinabog grabeng pagdugo panahon sa operasyon. Ang kamatuoran nga ang pipila ka hilba kinahanglang dili na gamiton sa dili pa ang operasyon maoy usa ka hinungdanong butang nga tagdon sa mga Saksi ni Jehova.

J. H., Tinipong Bansa

Ang “Pagmata!” nagtubag: Among gipasalamatan kining hinungdanong pahinumdom. Una pa sa operasyon, hinungdanong pahibaloon sa pasyente ang iyang doktor bahin sa tanang tambal nga iyang gitomar​—lakip na ang mga hilba. Hinungdanon kaayo kini alang niadtong nagtuman sa sugo sa Bibliya sa ‘pag-ayad gikan sa dugo.’​—Buhat 15:29.

Pagpakigpulong sa Publiko Nalingaw gayod ako sa pagbasa sa artikulong “Mga Batan-on Nangutana . . . Sa Unsang Paagi Molampos Ako Ingong Mamumulong sa Publiko?” (Disyembre 22, 2003) Nagtrabaho ako diha sa natad sa pagpanulat sulod sa napulo ka tuig, apan kulbaan gihapon ako sa dihang mopakigpulong atubangan sa daghang tawo. Bisan pa sa tanang pagbansay nga akong naagian sa eskuylahan ug sa kompaniya, wala gayoy ikatandi sa talagsaong instruksiyon nga akong nadawat ingong estudyante sa Teokratikanhong Tunghaan sa Ministeryo, nga gipahigayon diha sa mga Kingdom Hall sa mga Saksi ni Jehova. Kining maong pagbansay wala lamang makatabang kanako sa pagpauswag sa akong balay-ug-balay nga ministeryo kondili nakatabang usab sa pagpalampos sa akong sekular nga trabaho.

L. B., Tinipong Bansa