Mga Kaayohang Makuha sa Pagbasa Ngadto sa mga Bata

TINAMPO SA MAGSUSULAT SA PAGMATA! SA POLANDIA

Ang mga nag-organisar sa tinuig nga kampanya nga “Tibuok Polandia Nagabasa Ngadto sa mga Bata” nag-ingon: “Ang pagbasa mao ang yawi alang sa kahibalo ug katakos sa pangutok. . . . Kini makabukas sa pultahan sa dakong pondo sa tawhanong hunahuna ug kahibalo.” Kon kini tinuod, nganong gilantaw sa daghang hamtong ug sa mga bata ang pagbasa ingong usa lamang ka obligasyon nga kinahanglang himoon?

Ang mga nag-organisar niining maong kampanya nag-ingon: “Ang batasan sa pagbasa ug pagkagustog mga libro kinahanglang ugmaron sa bata pa.” Ang mga ginikanan ilang giingnan: “Kon buot ninyo nga mahimong maalamon ug malamposon ang inyong anak sa tunghaan ug sa kinabuhi, basahi sila sa makusog adlaw-adlaw sulod sa 20 minutos.”

Ang mga ginikanan gidasig usab nga dili ilangan-langan ang pagbasa ngadto sa ilang mga anak kondili “sugdan dayon kini kutob sa maarangan.” Kanus-a? “Basahan nato ang usa ka masuso, kugoson siya, tan-awon siya nga mahigugmaon, ug pukawon ang iyang interes pinaagi sa atong tingog,” ang mga ginikanan giagda. “Niining paagiha ang malungtaron nga relasyon sa mga ginikanan ug anak sa pagbasa nga may pagsalig, kalipay, ug panagsuoray maugmad. Dugang pa, kini makapakusog sa pag-ugmad sa iyang kaisipan.”

Gipasiugda sa mga nag-organisar sa kampanya nga “ang pagbasa ngadto sa mga bata mas importante na kaayo karon,” ug ilang gihisgotan ang ubang mga kaayohan. Ang pagbasag makusog makatudlo sa mga bata sa paghunahuna, “makatabang kanila sa pagsabot sa ubang mga tawo, sa kalibotan, ug sa ilang kaugalingon, . . . makapukaw sa interes, makaugmad sa imahinasyon, makadasig sa pag-ugmad sa emosyon, makaugmad sa pagkamahunahunaon ug empatiya, makatudlo ug moral nga mga prinsipyo, . . . makapalig-on sa pagtamod sa kaugalingon.” Sa walay duhaduha, kini “ang pangontra batok sa dili-maayong mga impluwensiya . . . nga makadaot sa hunahuna ug kasingkasing sa mga bata,” mihinapos ang mga lider niini nga kampanya.

Aron mahimong epektibo gayod ang pagbasa, ang mga publikasyon nga nagdasig sa mga batan-on sa pagpakigsuod sa ilang langitnong Maglalalang kinahanglang gamiton. Ang Bibliya mao ang labing maayong libro sa pagtabang kanato nga masuod sa Diyos. Ang Bibliya nag-ingon nga “sukad pa sa pagkamasuso,” ang batan-ong si Timoteo gitudloan na sa “balaang mga sinulat.” (2 Timoteo 3:15) Diha sa programa sa pagbasag kusog ngadto sa mga bata, mahimong ilakip sa mga ginikanan ang pinasukad-sa-Bibliya nga mga libro sama sa Akong Basahon sa mga Estorya sa Bibliya ug Pagkakat-on Gikan sa Dakong Magtutudlo, nga gituyo pagsulat alang sa mga bata ug gipatik sa mga Saksi ni Jehova.