Ang Popular Kaayo nga Sibuyas Bombay

Tinampo sa magsusulat sa Pagmata! sa Mexico

Kompleto kaha ang kosina kon wala ang ordinaryong sibuyas bombay? Kining daghag-gamit nga utanon mahimong isambog sa halos bisan unsa​—mga sabaw, ensalada, pangunang potahe, tambal. Makapahilak pa gani kini kanato.

Ang ordinaryong sibuyas bombay nindot usab ug mga bulak sama sa mga kamatang niini nga golden onion, bride’s onion, ug sa mga ahos nga nindot ug bulak. Apan, ang kasagarang gigamit diha sa halos matag kosina sa tibuok kalibotan mao ang unod nga moturok ilalom sa yuta.

Kini nga utanon maoy usa sa mga tanom nga dugay nang gitikad sa tawo. Ang kaylap nga paggamit niini makita diha sa rekord sa Bibliya, nga nag-ingon nga niadtong mga tuig 1513 W.K.P., ang mga tawo sa Israel nangandoy ug mga sibuyas bombay nga ilang gikaon sa naulipon pa sila sa Ehipto.​—Numeros 11:5.

Apan nganong ang mga tawo sa lainlaing dapit ganahan man kaayo ug sibuyas bombay? Kini maoy tungod gayod sa substansiyang asupre, nga maoy nakahatag sa linaing kahumot ug kahalang niini. Ug ang sulfenic acid niini mao ang substansiya nga makapahilak kanimo.

Dili Lang Lami nga Kaonon

Ang sibuyas bombay mapuslanon alang sa panglawas sa tawo. Kini adunay mga sustansiya, sama sa kalsiyum, phosphorous, ug ascorbic acid, o bitamina C. Apan, ang sibuyas bombay ilabinang gipabilhan sa tibuok kasaysayan sa tawo tungod kay magamit kini ingong tambal. Bisan karon gigamit kini nga tambal sa daghang sakit, sama sa sip-on, nanghubag nga larynx, atherosclerosis, sakit sa kasingkasing, diabetes, ug hubak. Gituohan nga ang sibuyas bombay maayo usab nga pangontra sa kagaw, kolesterol, pagpanghubag, pag-apol sa dugo, ug kanser.

Ang sibuyas bombay lainlain ug mga kolor​—puti, dalag, brawon, berde, pula, ug morado. Mahimo nimo kining kaonon nga hilaw, linuto, de-lata, inatsara, pinauga, pinulbos, dinugmok, o hiniwang-kuwadrado. Dili ba usa gayod ka mapuslanong utanon ang sibuyas bombay​—bisag makapahilak kini kanimo?