Gikan sa Among mga Magbabasa

Ngalan sa Diyos Ang serye nga “Nahibalo Ka ba sa Ngalan sa Diyos?” (Enero 22, 2004) maoy usa sa labing maanindot, matukion nga paghisgot sa ngalan sa Diyos nga akong nakita sukad ako nahimong Kristohanon sa 1973. Ang maanindot nga hapin, disenyo, maingon man ang lohikal kaayo nga pagpahayag sa impormasyon, mao ang nagpahimo ning maong serye nga usa ka obra maestra. Maayong pagkabuhat!

D. L., Tinipong Bansa

Ako bag-o pang nag-alagad ingong bug-os-panahong ebanghelisador, ug ako mibating mas nasuod kang Jehova kay sukad masukad. Tungod niana, ang serye bahin sa ngalan sa Diyos nakapainteres gayod kanako. Ang kahon nga nag-ulohang “Ang Diyos Nahibalo sa Imong Ngalan” nagpakita nga bisan pag adunay daghang tawo niining yutaa, ang Diyos nahingawa sa matag usa kanato. Kini nagtukmod kanako sa pagtuon ug dugang mahitungod kang Jehova ug sa pagbuhat sa kon unsay iyang gikahimut-an.

M. J., Japan

Nagtuo ko nga kini matulon-anon, malangkobon, ug maayong-pagkapanukiduki nga serye nga gipresentar diha sa makapainteres ug madanihon kaayong paagi. Gawas pa, nagustohan gayod nako ang pagkakita sa 39 ka porma sa ngalan ni Jehova nga naglinya diha sa ibabaw sa mga panid. Kini nga presentasyon makahatag ug pasidungog sa ngalan ni Jehova ug angayng makadani sa matinud-anog-kasingkasing nga mga tawo.

G. D. M., Tinipong Bansa

Ang Pagtuo sa Siyentipiko Nakadayeg gayod ako sa artikulo nga “Kon Nganong Nagtuo Ako ug Bibliya​—Usa ka Nukleyar nga Siyentipiko Nag-asoy sa Iyang Sugilanon.” (Enero 22, 2004) Unom ka tuig kanhi, ako usab nakombinsir sa mga kamatuoran sa Bibliya pinaagi sa lohikal, napamatud-an nga mga kamatuoran. Karon kinasingkasing usab nakong gipabilhan ang akong nakat-onan. Ang mga kasinatian nga sama nianang kang Alton Williams nakapalig-on sa akong pagtuo. Mapasalamaton ako kang Jehova nga siya naghatag sa matag indibiduwal ug pamatuod nga mohaom sa iyang partikular nga mga panginahanglan.

E. L., Hungaria

Kabulakan sa Aprika Nagsulat ako aron ipahayag ang akong pasalamat tungod sa artikulong “Tinuig nga Pasundayag sa Namaqualand.” (Enero 22, 2004) Nindot kaayong tan-awon ang dakong kadaiyahan sa kabulakan nga gihimo ni Jehova alang sa atong kalipay. Sa dihang nagbasa sa artikulo, akong nahinumdoman ang mga pulong sa salmista nga si David: “Ang imong mga buhat katingalahan, ingon sa nasayran pag-ayo sa akong kalag.”​—Salmo 139:14.

A. J., Mexico

Homwork Usa ako ka estudyante sa unang tuig sa hayskul, ug kanunay kong maglisod sa pagdumala sa akong panahon. Nakatabang kanako ang pagbasa sa artikulong “Mga Batan-on Nangutana . . . Sa Unsang Paagi Makakaplag Ako ug Panahon sa Paghimo sa Akong Homwork?” (Enero 22, 2004) Dili kaayo ko tigtan-aw ug telebisyon. Apan kon motan-aw gani ako, dili na ko makahunong sa pagtan-aw. Karon dili na gyod ko motan-aw.

R. O., Japan

Nagkuha ko ug kurso nga anha lang magtuon sa balay, ug ang usa ka tawo kinahanglang disiplinado gayod aron makatuon kada adlaw. Tungod sa mga sugyot diha sa artikulo, gahinan nakog panahon ang paghimo sa akong homwork.

X. R., Tinipong Bansa

Lisod kaayo! Mao gayod kanay akong ikaingon sa akong homwork. Usahay magtuo ang akong mga ginikanan nga ako tapolan sa dihang dugay kong mahuman sa akong homwork. Apan usahay lisod kaayo kini o daghan kaayo. Salamat sa pagpakita kanamo kon unsaon namo sa pagkakaplag ug panahon sa paghimo sa among homwork ug sa paggamit sa among panahon sa epektibong paagi.

J. S., Tinipong Bansa

Nakita nakong mapuslanon gayod ang maong artikulo. Ang mga sugyot ilalom sa ulohang “Paggamit Pag-ayo sa Imong Panahon” nakatabang kanako sa pagpaarang-arang sa akong mga batasan sa pagtuon.

B. L., Italya