Hanbok—Ang Tradisyonal nga Sinina sa Korea

Tinampo sa magsusulat sa Pagmata! sa Republika sa Korea

ALANG sa mga Koreano, ang mga sinina dili lang tabon sa lawas. Ang usa ka pananglitan niini mao ang tradisyonal nga sinina sa Korea nga gitawag ug hanbok.

Usa ka Talagsaong Disenyo

Ang hanbok gilangkoban ug estilo bolero nga blusa ug taas nga sayal, nga nindot nga pagkaangay. a Sa pipila ka kahimtang, ang sayal mas taas ug upat ka pilo kay sa blusa. Tungod niini, bisan ang mubo nga babaye morag taas tan-awon kon magsul-ob niini.

Ang hanbok adunay mga kurba nga dili kaayo mailhan ug yanong tabas. Ang mga bukton sa blusa mabukhad nga morag mga pako, samtang ang sayal bukad gikan sa dughan hangtod sa salog nga nindot kaayong tan-awon. Aron mamatikdan ang dapit sa dughan, dunay usa ka talagsaong matang sa laso nga ang masigkatumoy niini magbitay sa atubangan sa blusa nga halos moabot sa kiting. Daghang hanbok ang gibordahan ug matahom nga mga disenyo nga geometriko ug mga bulak palibot sa pilo sa bukton ug sa kuwelyo sa blusa maingon man diha sa sayal. Oo, ang pagkaangay, tabas, ug mga kolor sa hanbok nakapahimo niini nga maanindot kaayo!

Usa ka Mapuslanong Sinina

Ang kanindot sa hanbok gidugangan sa praktikal nga disenyo niini. Sanglit ang hanbok kasagarang hinimo gikan sa kinaiyanhong mga lanot, mahimo kining isul-ob sa tibuok tuig. Pananglitan, ang usa ka hanbok nga hinimo gikan sa mga lanot sa tanom sama sa rami o abaka adunay maayong bentilasyon, nga tungod niana dili alimut-an ang nagsul-ob sa ting-init, bisan pag matabonan sa hanbok halos ang tibuok lawas. Ang ubang matang sa panapton motabang sa pagpreserbar sa kainit sa lawas, nga nagpahimo niining mas angayang isul-ob sa tingtugnaw.

Komportable usab ang hanbok. Kining bahina walay kalabotan sa uso kondili naugmad  kini tungod sa praktikal nga panginahanglan nga mitungha kasiglohan kanhi sa dihang kaylap nga gigamit ang mga kabayo niining dapita. Ang magasing Culture & I nag-ingon: “Ang maong sinina gidisenyo aron mohaom sa bugnaw nga klima ug sa pagpangayam ug sa pagbalhinbalhin ug puyo.” Busa, ang mga mangangabayo nga Koreano dili mosul-ob ug bisan unsang sinina nga makapalisod sa ilang paglihoklihok. Sa pagkatinuod, ang mga Koreano nga ganahang mosul-ob ug hanbok karon dakog utang kabubut-on sa ilang mga katigulangan tungod sa pagkakomportable niini!

Ang laing makapainteres nga bahin sa hanbok mao ang karaang tradisyon sa paggamit ug mga kolor alang sa simbolikong mga katuyoan. Kaniadto, ang nagamandong hut-ong nga mga Koreano kasagarang magsul-ob ug mabulokong mga sinina, samtang ang mga kabos kasagarang magsul-ob lamang ug puti. Dugang pa, ang usa ka dalaga mailhan pinaagi sa pagsul-ob ug sinina nga may kombinasyon sa dalag ug pula. Kon minyo na, ang kolor sa iyang hanbok magpaila sa posisyon sa iyang bana diha sa katilingban. Panahon sa kasal karong mga adlawa, ang inahan sa pangasaw-onon gidahom nga magsul-ob ug bestida nga pughaw ang pagkapula, samtang ang inahan sa pamanhonon sagad magsul-ob ug asul. Dali ra kaayo silang mailhan tungod niini nga batasan.

Ang Hanbok Karon

Pagkahuman sa Gubat sa Korea (1950-53), gipahigayon ang usa ka kampanya bahin sa modernisasyon. Tungod niana, sa katuigan sa 1970 ang hanbok wala na mauso ug gipulihan sa mga sinina nga may estilo nga iya sa Kasadpan. Busa, ang sinina nga adlaw-adlawng gisul-ob kaniadto gihiposan na lang diha sa aparador, nga isul-ob lang kon may mga kasal, kasaulogan, ug uban pang espesyal nga mga okasyon.

Apan, di pa dugay, ang hanbok napopular na usab. Pananglitan, sa 1996 gipaningkamotan nga mapopular pag-usab ang maong estilo sa dihang ang unang Sabado sa bulan gideklarar ingong “adlaw sa pagsul-ob ug hanbok.” Ang mga tiggamag panapton naghimog bag-ong mga hanbok nga espesyal nga gidisenyo aron madani ang mga batan-on. Dayag nga makapahimuot gayod ang pagbalik sa naandan, tungod kay ang modernong hanbok napopular na kaayo. Niining panahon nga kadaghanan sa kinabag-ohang mga estilo nagpasiugda ug pagkamahilayon, ang hanbok maoy usa ka maayong pananglitan sa matahom ug kasarangan nga sinina.​—1 Timoteo 2:9.

[Footnote]