Ang Hunahuna sa Bibliya

Pagmatuto sa mga Anak sa Disiplina sa Diyos

“Kon Unsaon Paghimog mga Lagda nga Dili Lapason sa Imong mga Anak”

“Lima ka Prinsipyo nga Angay Nimong Itudlo sa Imong Anak Kon Mag-edad na Siya ug Singko Anyos”

“Lima ka Emosyonal nga Katakos nga Angayng Mabatonan sa Matag Bata”

“Lima ka Timailhan nga Ikaw Sobra ka Matugoton”

“Ang Milagro sa Usa-ka-Minuto nga Disiplina”

KON sayon pa unta ang pagdisiplina sa mga anak, wala unta kini hatagig dakong pagtagad diha sa mga artikulo sa magasin sama sa nasulat sa ibabaw. Wala untay mga basahon nga gisulat alang sa pagmatuto ug mga anak. Apan, ang pagmatuto ug mga anak dili gayod tiaw. Bisan sa libolibong katuigan kanhi, giingon nga “ang anak nga hungog maoy kaguol sa iyang amahan ug kapaitan alang sa nanganak kaniya.”​—Proverbio 17:25.

Karon, bisan pa sa daghang tambag bahin sa pagmatuto sa mga anak, daghang ginikanan ang wala makaseguro kon unsaon pagdisiplina ang ilang mga anak. Unsang tabang ang gitanyag sa Bibliya?

Ang Tinuod nga Kahulogan sa Disiplina

Ang Bibliya tin-awng naghubit sa papel sa mga ginikanan mahitungod sa disiplina. Pananglitan, ang Efeso 6:4 nag-ingon: “Kamong mga amahan, ayaw palagota ang inyong mga anak, kondili magpadayon sa pagmatuto kanila sa disiplina ug sa pagdumala-sa-kaisipan ni Jehova.” Kining tekstoha naghisgot ilabina sa amahan nga mao ang angayng manguna sa pag-atiman sa iyang mga anak. Siyempre, ang inahan angayng makigtambayayong usab sa iyang bana.

Maylabot niining ulohana, ang The Interpreter’s Dictionary of the Bible nag-ingon: “Diha sa Bibliya ang disiplina suod nga nalangkit sa pagbansay, pagtudlo, ug kahibalo sa usa ka bahin, ug sa pagbadlong, pagtul-id, ug pagkastigo sa laing bahin. Ang kinaiyanhong kapadapatan niini maoy diha sa pagbansay sa bata.” Busa, ang disiplina maoy labaw pa kay sa pagsaway; kini naglakip sa tanang pagbansay nga gikinahanglan sa mga anak aron mouswag. Apan sa unsang paagi malikayan sa mga ginikanan nga mahimong makapalagot?

 Magmabination

Unsay makapalagot sa usa ka bata? Hunahunaa kining maong kahimtang. Aduna kay kauban sa trabaho nga sapoton ug walay pailob. Wala gayod siya makagusto kanimo. Morag mangita lang siyag apan sa tanan nimong isulti ug himoon. Kanunay niyang isalikway ang imong trabaho ug pabation ka nga walay pulos. Dili ba kana makapalagot ug makapahigawad kanimo?

Sama usab niana ang mahimong bation sa usa ka bata kon ang iyang mga ginikanan kanunay lang magyawyaw o magbadlong kaniya sa masuk-anong paagi. Tinuod nga ang mga bata nagkinahanglan ug pagtul-id matag karon ug unya ug ang Bibliya naghatag ug katungod sa mga ginikanan sa paghatag niana. Apan, ang pagpalagot sa usa ka bata pinaagig maharason, dili-mahigugmaon nga pagtratar makahatag ug emosyonal, espirituwal, ug bisan pisikal nga kadaot.

Ang Inyong mga Anak Takos sa Inyong Pagtagad

Ang mga ginikanan kinahanglang mogahin ug panahon alang sa ilang mga anak. Mahitungod sa mga sugo sa Diyos, ang Deuteronomio 6:7 nagsulti sa mga amahan: “Isilsil mo kini sa imong anak ug magsulti ka mahitungod niini sa maglingkod ikaw sa imong balay ug sa maglakaw ikaw sa dalan ug sa imong paghigda ug sa imong pagbangon.” Ang mga bata gipakatawo nga dunay panginahanglan nga mobating sila giatiman pag-ayo sa ilang mga ginikanan. Ang pagpakig-estorya sa inyong mga anak sa kalmadong paagi kada adlaw makatabang kaninyo sa pagsabot sa ilang mga pagbati. Tungod niini mas masayon ang pagtugkad sa ilang kasingkasing pinaagi sa mga prinsipyo nga pinasukad sa Bibliya, nga magtukmod kanila sa ‘pagkahadlok sa matuod nga Diyos ug sa pagtuman sa iyang mga sugo.’ (Ecclesiastes 12:13) Bahin kini sa disiplina nga iya sa Diyos.

Kon ang pagmatuto sa mga anak mahimong itandi sa pagtukod ug balay, nan ang disiplina maoy usa sa mga himan sa pagtukod. Kon gamiton kini sa mga ginikanan sa hustong paagi, sila makatukod ug tilinguhaong mga hiyas nganha sa mga kinaiya sa ilang mga anak ug makasangkap kanila sa pag-atubang sa mga pagsulay sa kinabuhi. Ang Proverbio 23:​24, 25 naghubit sa resulta: “Ang amahan sa matarong magmalipayon gayod; ang amahan nga nanganak sa usa nga maalamon magmaya usab tungod kaniya. Ang imong amahan ug ang imong inahan magamaya, ug siya nga nanganak kanimo magmalipayon.”

[Kahon/Hulagway sa panid 27]

ANG “PAGDUMALA-SA-KAISIPAN NI JEHOVA”

Ang Efeso 6:4 naghisgot sa “pagdumala-sa-kaisipan ni Jehova.” Ang orihinal nga Gregong termino alang sa ekspresyon nga “pagdumala-sa-kaisipan” gihubad diha sa ubang mga Bibliya ingong “pagkamahunahunaon,” “tambag,” ug “pahimangno.” Kining mga terminoha nagpasabot nga ang mga pamilya kinahanglang mohimog labaw pa kay sa pagbasa lamang sa Bibliya o sa naandang pagkobre sa materyal diha sa tabang sa pagtuon sa Bibliya. Kinahanglang paneguroon sa mga ginikanan nga masabtan sa ilang mga anak ang kahulogan sa Pulong sa Diyos, ang kahinungdanon sa pagkamasinugtanon, ang gugma ni Jehova alang kanila, ug ang panalipod nga iyang gitanyag kanila.

Sa unsang paagi kini mapalampos? Si Judy, usa ka inahan sa tulo ka anak, nakasabot sa panginahanglan nga mohimog labaw pa kay sa kanunayng pagpahinumdom sa iyang mga anak sa mga prinsipyo sa Diyos. “Nakita nako nga dili nila magustohan kon balikbalikon nako pagsulti ang mao ra gihapong mga butang. Misugod ko sa pagpangita ug laing mga paagi sa pagtudlo kanila. Ang usa ka paagi mao ang pagtan-aw sa mga artikulo sa magasing Pagmata! nga nagpresentar sa maong mga punto sa lahi nga paagi. Busa nakat-onan nako kon unsaon paghatag sa akong mga anak sa pahinumdom nga ilang gikinahanglan nga dili makapapikal kanila.”

Si Angelo, kansang pamilya nakasinatig kalisod, nag-ingon kon giunsa niya pagtudlo ang iyang mga anak nga babaye sa pagpamalandong sa Pulong sa Diyos: “Dungan namong basahon ang mga bersikulo sa Bibliya, ug dayon akong pilion ang usa ka prase ug ipatin-aw kon sa unsang paagi kini mapadapat sa mga kahimtang sa akong mga anak. Sa ulahi, sa dihang sila na mismo ang nagbasa sa Bibliya, akong mamatikdan nga sila mamalandong pag-ayo sa kahulogan niini alang kanila.”