Pagsagubang sa Mapait nga Kasinatian Gumikan sa Pag-atake sa mga Terorista

TINAMPO SA MAGSUSULAT SA PAGMATA! SA ESPANYA

SA Marso 11, 2004, ang siyudad sa Madrid, Espanya, natay-og tungod sa pagbuto sa napulo ka bomba diha sa tulo ka lainlaing mga estasyon sa tren. Ang dungang pagpabuto sa bomba diha sa upat ka depasahero nga tren miresulta sa kamatayon sa mga 190 ka tawo ug pagkaangol sa 1,800.

 Tungod kay ang mga bomba mibuto panahon sa takna sa buntag diin nagdali ang mga tawo, puno ang tanang tren ug makalilisang ang kadaot nga nahitabo. “Nakita nako ang tibuok bagon nga naisa ug usa ka metros, ingon niana ka kusog ang pagbuto,” miingon si Aroa, usa ka nakasaksi. “Sa pagbiya nako sa akong bagon, ang tibuok dapit morag natad panggubatan. Makalilisang ang aktuwal nga pagkakita ug ingon niana ka daghang nangamatay.” Nahitabo usab ang susamang ngilngig nga mga hitabo diha sa upat ka lainlaing mga tren ug sa napulo ka lainlaing mga bagon. Ang mga terorista nagbilin ug mga backpack nga puno sa mga eksplosibo diha sa mga tren ug dayon gipabuto kana pinaagig mga cell phone.

Maayo na lang kay ang ubang mga pasahero wala mahinumdom sa makalilisang nga mga hitabo nga ilang naagoman. Apan gatosan kanila, sama kang Aroa, kinahanglang magsagubang sa pisikal ug emosyonal nga mga kadaot. “Ang pagbuto nakadaot gayod sa akong pandungog,” miingon si Aroa, “apan ang makahahadlok nga mga hulagway nga kanunayng mosantop sa akong hunahuna mas dakog epekto kanako.”

“Mapasalamaton ako nga ingong usa sa mga Saksi ni Jehova, ako nakadawat ug daghang emosyonal nga pagpaluyo,” midugang si Aroa. “Ang mga tawag sa telepono ug mga mensahe gikan sa tibuok kalibotan nagpahinumdom kanako nga kita sa pagkatinuod maoy usa ka tibuok kalibotan nga kapunongan sa mga igsoon. Dugang pa, ang Bibliya nagtabang kanato sa pagsabot kon nganong nagakahitabo kining maong mga kapintasan. Akong gipatin-aw sa pipila nako ka kauban sa trabaho nga ang Kasulatan nagtagna nga sa ‘kataposang mga adlaw,’ ang mga tawo mahimong bangis ug walay kinaiyanhong pagmahal. Nakaplagan usab nako nga ang akong bug-os-panahong ministeryo hinungdanon sa paghupay sa kasakit.”​—2 Timoteo 3:1-3.

Si Pedro usa sa daghang pasahero nga nag-antos ug grabeng mga samad. Nagtindog siya mga upat ka metros gikan sa bomba nga mibuto sa iyang bagon. Ang pagbuto nakapalamba kaniya sa salog, nga nagpahinabo ug mga samad sa ulo ug grabeng kalisod sa pagginhawa. Human sa lima ka adlaw diha sa intensive care, inanay siyang naulian. Ang daghan kaayong isigka-Saksi nga miduaw kaniya nakapadasig kaniya, ug sila usab nakapatingala sa mga nars. “Sulod sa 26 ka tuig wala pa ko makakita ug pasyente nga hilabihan ka daghag bisita ug mga regalo!” miingon ang usa ka nars. Sa laing bahin, si Pedro madasigong naghisgot bahin sa kawani sa ospital. “Maayo kaayo sila,” matod niya. “Sila dakog gikatabang sa akong pagkaayo.”

Daghan sa mga biktima maoy mga lalin nga di pa dugayng namalhin sa Espanya. Si Manuel, nga usa ka Cubano, nasamdan sa unang pagbuto didto sa estasyon sa Atocha ug dayon nakuyapan sa ikaduhang pagbuto. “Nayatakyatakan ako sa natarantar nga mga tawo samtang ako nagbuy-od diha sa estasyon,” siya miingon. “Sa dihang naulian ko sa panimuot, duha ka gusok nako ang nabali ug nasamdan ang akong bitiis, ug nabungol usab sa bug-os ang akong usa ka dunggan.”

“Ang mga trabahante panahon sa emerhensiya​—mga polis, mga serbisyo sa ambulansiya, ug mga bombero​—nangabot dayon sulod sa pipila ka minuto, ug gitabangan nila kami kutob sa mahimo,” miingon si Manuel. “Nahibalo gayod sila kon unsay buhaton, ug ang pagkaepisyente ug propesyonalismo nila nakatabang sa pagpamenos sa kahadlok. Gawas nga gitino nila nga mahatagan ako ug medikal nga pag-atiman, sila nagtratar kanako sa maluloton ug mabination nga paagi.”

Emosyonal nga Kadaot Human sa Mapait nga Kasinatian

Sama kang Aroa, si Manuel nakaagom sa emosyonal nga kadaot. “Ginerbiyos ko sa dihang misakay akog tren di pa dugay,” matod niya. “Kinahanglan kong manaog dayon. Ug magduda gihapon ko kon duna akoy makitang tawo diha sa publikong transportasyon nga magdala ug backpack o susama niana. Apan mas dakong tabang ang akong nadawat kay sa uban, bisan tuod walay membro sa akong pamilya nga nagpuyo sa Espanya. Sa literal gatosan ka Saksi ang mitelepono kanako, ug usa ka Saksi nga pamilya nagpaestar nako sa ilang balay sulod sa pipila ka adlaw aron dili ako mobatig kamingaw. Kining bililhong tabang gikan sa atong tibuok-kalibotang kapunongan sa mga igsoon nakapakalma kanako.”

Si Sergio, usa ka pasahero nga wala masamdi, nag-antos gihapon kada adlaw gumikan sa iyang nakita sa iyang palibot. Usa ka bomba ang mibuto sa bagon sa iyang atubangan, ug ang lain, diha sa bagon sa iyang luyo. Sama kang Manuel, mapasalamaton siya sa mahigugmaong pagpaluyo sa iyang pamilya ug sa iyang mga isigka-Saksi. “Sila wala lamang mopabati kanako nga gihigugma  kondili sila nagpahinumdom kanako nga ako nahisakop sa usa ka nahiusa nga kapunongan sa mga igsoon nga may kahingawa sa matag usa sa mga membro niini,” miingon siya. “Nadawat nako kini nga pagpaluyo kada adlaw, ug ang daghang tawag sa telepono nakapaarang kanako sa pagpahayag sa akong gibati, usa ka butang nga subsob malisdan ako sa pagbuhat.”

Ang ubang mga pasahero sa maong mga tren nakasinati ug laing matang sa kabalaka. Naatol nga si Diego naglingkod tupad sa usa sa upat ka bomba nga wala mobuto. Nakagawas siya sa tren nga wala maunsa. “Apan karon gihasol ko sa akong tanlag nga wala motabang niadtong mga tawo nga nasamdan,” misugid siya. “Sa katarantar, nagdalidali ako paggawas sa estasyon duyog sa ubang mga tawo.”

Ang pagbuto diha sa iyang tren nakapakurat pag-ayo kang Ramón, usa ka batan-on nga taga-Brazil, nga halos dili siya makalihok. Bisan pa niana, duha ka adlaw human sa pagbuto sa mga bomba, nakahukom siya nga makigbahin sa pagsangyaw sa mensahe sa Gingharian ngadto sa uban. Nakahimamat siya ug Portuges nga lalaki nga miingon kang Ramón nga nangita siya sa matuod nga relihiyon. Si Ramón nakasugod ug pagtuon sa Bibliya uban sa maong tawo, kinsa mitambong dayon sa Kristohanong mga tigom. “Sa dihang makatabang ka sa uban sa espirituwal, moarang-arang usab ang imong paminaw,” miingon si Ramón.

Ang tanang biktima sa walay duhaduha nagkinahanglan ug panahon sa pagbuntog sa pisikal ug emosyonal nga kasakit nga ilang giantos. Makapasubo nga kita nagkinabuhi sa usa ka yugto diin ang binuang nga kapintasan mahimong kalit nga mahitabo bisag asa. Ug bisan tuod ang espirituwal nga mga prinsipyo makatabang sa mga biktima sa pagsagubang sa mapait nga kasinatian, ang Gingharian lamang sa Diyos ang magwagtang sa dayon niining maong mga trahedya.​—Pinadayag 21:​3, 4.

[Kahon/Mga hulagway sa panid 15]

ESPIRITUWAL NGA KALIG-ON ARON MAKASAGUBANG SA MAPAIT NGA KASINATIAN

Manuel Suárez

“Samtang gibati ko pa ang kalisang, nga nagpaabot nga madala sa ospital, sige nakong gihinumdoman ang mga pulong sa Proverbio 18:10: ‘Ang ngalan ni Jehova usa ka malig-ong torre. Nganha niana ang matarong modagan ug mahatagan sa panalipod.’ Kanang mga pulonga nagpalig-on kanako.”

Aroa San Juan

“Kon maagoman mo ang sama niini, mas maamgohan nimo nga kini mao na ang kataposang mga adlaw ug kinahanglan kitang maghatag ug dakong pagtagad sa espirituwal nga mga prinsipyo. Sa tabang sa akong bug-os-panahong ministeryo, anam-anam nakong nakalimtan ang mapait nga kasinatian.”

Fermín Jesús Mozas

“Bisan pa sa mga samad sa akong ulo, nakaarang ko sa pagtabang ug pagdasig sa pipila ka kaubang mga pasahero. Sa akong hunahuna nagpabilin kong kalmado tungod sa paglaom sa pagkabanhaw nga gihatag sa Diyos kanato, usa ka paglaom nga nagpalig-on kanato sa mga yugto nga sama niana.”

Pedro Carrasquilla

“Sa dihang naghigda ko sa intensive care unit, nga nag-antos sa grabeng kasakit sa dughan, sa makadaghan misantop sa akong hunahuna ang giingon sa 1 Timoteo 6:19. Nadasig ako niini sa pagtipig ug usa ka maayong patukoranan alang sa umalabot aron makapangupot pag-ayo sa tinuod nga kinabuhi. Kining bersikuloha nagpahinumdom kanako sa atong paglaom sa Paraiso, nga gisaad sa Diyos niadtong nahigugma kaniya. Mao kanay atong gipaningkamotang matagamtam.”

[Hulagway sa panid 13]

Ibabaw: Ang mga tigluwas nag-atiman sa mga samaran ug himalatyon diha sa riles sa gawas sa estasyon sa Atocha

[Credit Line]

Top: CORDON PRESS

[Hulagway sa panid 13]

Tuo: Usa ka inayom-ayom nga handomanan