Suliran ba Gayod ang Sobra nga Pagkatambok?

“Ang pagpanambok pag-ayo sa mga tin-edyer nahisamag usa ka epidemya.”​—S. K. Wangnoo, senyor nga konsultant nga endocrinologist, Indraprastha Apollo Hospital, Delhi, India.

SUMALA sa gipakita sa komento sa ibabaw, daghang arangan nga mga pamilya sa India ang misagop ug bag-ong estilo sa kinabuhi nga nakapatambok pag-ayo sa mga tin-edyer. Kining maong epidemya mikaylap pag-ayo sa daghang kanasoran samtang nagkadaghang mga tawo ang dili na kaayo tig-ehersisyo ug hilig kaayong mokaon ug walay-sustansiya nga mga pagkaon. Usa ka konsultant nga nag-espesyalisar sa pagtambal sa mga batan-on miingon: “Ang sunod nga kaliwatan [sa Britanya] mao na unya . . . ang kinatambokan nga mga tawo sa tibuok kasaysayan.” Ang Guardian Weekly mitaho: “Ang sobra nga pagkatambok maoy suliran lang kaniadto sa hamtong nga mga tawo. Karon ang mga batan-on sa Britanya adunay dili-maayong mga batasan sa pagkaon ug dili-aktibo nga estilo sa kinabuhi nga posibleng magpahinabo ug mga suliran nga unang nahitabo sa Tinipong Bansa. Tungod sa dugay na nga sobra nga pagkatambok, lagmit silang makaagom ug mga sakit nga sama sa diabetes, sakit sa kasingkasing, ug kanser.”

Ang mga magsusulat sa libro nga Food Fight miingon: “Ang paghinobrag kaon ug inom mipuli na sa malnutrisyon ingong ang pangunang suliran sa pagkaon sa kalibotan.” Si Don Peck, nga nagsulat sa The Atlantic Monthly, misaysay: “Mga siyam ka milyong Amerikano ang tambok kaayo, nga mga 45 kilos o kapin pa nga sobrag timbang.” Ang mga sakit nga nalangkit sa sobra nga pagkatambok nagpahinabo ug mga 300,000 ka ahat nga kamatayon matag tuig sa maong nasod, “ikaduha nga labing makamatay sunod sa pagpanabako.” Si Peck mihinapos: “Ang sobra nga pagkatambok molabaw na unya sa kagutom ug sa mananakod nga sakit ingong ang kinadak-ang suliran sa panglawas sa katawhan sa tibuok kalibotan.” Busa, dili angayng ibalewala ang mga kapeligrohan sa sobra nga pagkatambok. Si Dr. Walter C. Willett misulat diha sa librong Eat, Drink, and Be Healthy nga “sunod sa pagpanabako, ang timbang sa imong lawas mao ang labing hinungdanong butang nga makaapektar sa imong umaabot nga kahimsog.” Ang gusto natong ipasiugda dinhi mao ang umaabot nimo nga kahimsog.

Unsaon Nimo Paghubit ang Sobra nga Pagkatambok?

Kanus-a ikaingon nga ang usa ka tawo tambok na kaayo ug dili lang kay medyo sobrag timbang? Ang Mayo Clinic sa Rochester, Minnesota, T.B.A., miingon: “Sa simpleng pagkasulti, ang usa ka tawo tambok na kaayo kon siya sobrag timbang tungod sa kadaghan sa tambok sa iyang lawas.” Apan unsaon nimo pagkasayod nga ang usa ka tawo sobrag timbang? Ang mga tsart bahin sa proporsiyon sa gitas-on ug gibug-aton sa tawo makahatag ug giya kon ang usa sobra lag timbang o tambok na kaayo. (Tan-awa ang tsart sa panid 5.) Apan, wala niini konsideraha ang ubang komposisyon sa lawas sa tawo. Ang Mayo Clinic miingon: “Ang gidaghanon sa tambok sa lawas, inay kay ang timbang, mao gayod ang magtino sa kahimtang sa panglawas sa usa.” Pananglitan, ang usa ka atleta lagmit nga mas bug-at tungod kay bus-ok ang iyang kaunoran o dagko ang iyang kabukogan. Unsa ang pangunang mga hinungdan nga maghimo sa usa ka tawo nga sobrag timbang o sobra ka tambok? Kanang pangutanaha hisgotan sa mosunod nga artikulo.