Ang Pagpuyopuyo ba Maayo nga Pundasyon sa Kaminyoon?

ANG pag-ipon sa lalaki ug babaye nga wala makasal “naandan na diha sa modernong mga katilingban sa tibuok kalibotan,” matod pa sa Journal of Marriage and Family. Ug “mga katunga sa nag-ipon nga mga indibiduwal naghunahuna nga ang pagpuyopuyo maoy paagi aron masayran kon magkabagay ba sila sa dili pa magpakasal.” Kon mao, nan, “wala na untay dili-magkabagay nga paris ug mas lig-on na unta ang moresulta nga kaminyoon,” nag-ingon ang Journal.

“Apan, ang ebidensiya mihatag ug sukwahi nga konklusyon,” ang Journal nagpadayon sa pag-ingon. “Ang mga magtiayon nga nagpuyopuyo una pa magpakasal kasagarang dili kaayo matagbawon sa ilang kaminyoon, mas menos ug panahon nga mag-uban sa naandang mga kalihokan, mas grabe ang paglalis, menos ug pagpaluyo sa ilang kapikas, menos ug katakos sa pagsulbad ug mga problema, [ug] mas daghag isumbong nga mga problema sa kaminyoon . . . Dugang pa, kon itandi sa mga magtiayon nga direktang nagminyo, ang mga magtiayon nga nag-ipon una pa magpakasal mas dakog risgo nga magbulag.”

Sumala sa gipakita niini nga pagtuon, ang butang nga daw maalamon sa panglantaw sa tawo basin dili diay gayod maalamon. Kini nagpasiugda sa pagkatinuod sa mga pulong sa Jeremias 10:23: “Dili iya sa tawo . . . bisan ang pagtultol sa iyang lakang.” Mas maalamon gayod ang pagdangop sa Pulong sa Diyos, ang Bibliya, nga naghatag ug daghang maayong tambag bahin sa kaminyoon! (2 Timoteo 3:16) Pananglitan, mahitungod sa relasyon sa magtiayon, ang Bibliya nag-ingon: “Ang lalaki mobiya sa iyang amahan ug sa iyang inahan ug siya kinahanglang moipon sa iyang asawa ug sila mahimong usa ka unod.”​—Genesis 2:24; Mateo 19:5.

Kon sundon nimo ang pagtultol sa Diyos, imbes mamati sa depektoso ug sagad nag-usab-usab nga panghunahuna sa tawo, dako ang purohan nga mabatonan nimo ang tinuod nga malipayon ug malungtaron nga kaminyoon.​—Proverbio 3:​5, 6.