Gikan sa Among mga Magbabasa

Utang sa Pagkatulog Salamat sa seryeng “Utang sa Pagkatulog​—Nag-antos Ka ba Niana?” (Pebrero 8, 2004) Sama sa naandan, ang mga magbabasa sa Pagmata! nakadawat ug daghang matulon-anong impormasyon ug paghupay. Nag-antos ako sa sakit nga sleep apnea sa mga duha ug tunga ka tuig na. Sa sinugdanan, lain ang gibati sa akong lawas, apan dili nako matumbok kon unsa kadto. Human madayagnos ang akong sakit, nasayran nako kon unsa diay ka seryoso ang kakulang ug tulog! Kini nga magasin makatabang kanako sa pagpatin-aw sa akong situwasyon ngadto sa akong mga higala.

W. M., Tinipong Bansa

Ang akong trabaho naglangkit ug mga kompiyuter ug tungod sa akong eskedyul, ang akong mga batasan sa pagkatulog dili regular. Di pa dugay, nagtrabaho ko ug pila ka gabii nga halos walay kinatulgan aron matapos ang akong buluhaton sa gitagal nga panahon. Wala madugay human niana, samtang naghatag ako ug mga pahibalo panahon sa tigom diha sa akong lokal nga Kingdom Hall, mibati ako ug kalibog. Ang akong gibungat sukwahi gayod sa angay unta nakong isulti! Nakuyawan gayod ako sa dihang akong nabasa kini nga magasin ug nasabtan ang kadaot nga mahimong mahitabo tungod sa kakulang ug tulog. Panahon na gayod kini aron usbon nako ang akong mga batasan sa pagkatulog.

T. I., Japan

Ako nag-antos sa sakit nga restless legs syndrome nga gihisgotan sa serye. Bisan tuod duna koy gihimong mapuslanong mga lakang aron akong maantos ang akong sakit, ako nagasalig sa saad sa Bibliya sa Isaias 33:24 nga sa dili madugay ‘wala nay pumoluyo nga moingon: “Ako masakiton.”’

L.O.G., Espanya

Ang inyong artikulo naundan ug sayop nga impormasyon bahin sa restless legs syndrome. Ako nag-antos sa grabeng matang niining sakita, ug sayop ang mga hinungdan nga inyong giingon. Kini maoy usa ka sakit sa nerbiyos ug kaunoran.

Y. J., Tinipong Bansa

Ang “Pagmata!” nagtubag: Ang among artikulo dili bug-os nga naghisgot bahin sa medikal nga mga hinungdan niining sakita. Hinunoa, kini naghisgot ug pipila ka mga butang nga gituohan sa mga nanukiduki nga lagmit nalangkit niini. Bisan pa niana, sumala sa giingon sa among potnot, ang mas detalyadong paghisgot bahin sa restless legs syndrome mabasa diha sa Nobyembre 22, 2000, nga gula. Kana nga artikulo nag-ingon: “Bisag giila sa mga eksperto ang RLS ingong sakit sa pangutok, ang hinungdan niini lisod nga matumbok.”

Besti sa Mexicano Naikag kaayo ako sa pagbasa sa artikulong “Among Gimahal ang mga Sinina nga Among Gisul-ob.” (Pebrero 8, 2004) Nalipay kaayo ako nga inyong gihisgotan ang mga Chontal sa Oaxaca, bisan pag gamay ra sila kon itandi sa ubang lumadnong mga grupo. Ang akong apohang lalaki ug apohan sa tuhod nga lalaki maoy mga Chontal, ug sa akong hunahuna ang impormasyon gipresentar uban ang dakong pagtahod.

A. L., Mexico

Ang mga artikulo nga sama niini motabang kanato nga mas masinati sa ubang mga kultura ug rasa. Palihog padayona ang pagpatik ug maayo kaayong mga impormasyon sama niini, tungod kay ang pagbasa niini maoy usa ka paagi nga makakat-on kami bahin sa mga tawo ug mga dapit nga dili namo maduaw sa personal.

M.L.E., Mexico

Ihalas nga mga Iring Trese anyos ako, ug ganahan kaayo kong mobasa sa Pagmata! Nagustohan nako ang artikulong “Sa Dihang ang Binuhing Iring Mahimong Ihalas.” (Pebrero 8, 2004) Ganahan ko sa tanang mananap apan labaw na sa mga iring. Naghinamhinam ko sa sunod nga gula!

Z. B., Rusya

Ulan Daghan kaayong salamat sa artikulong “Nag-ulan na Sab!” (Pebrero 8, 2004) Sa daghang tuig nahibulong ko kon sa unsang paagi mapondo ang minilyon ka toneladang tubig diha sa atmospera. Tungod sa Pagmata! natubag sa kataposan ang akong pangutana.

G. D., Pransiya