Kanus-a Mahanaw ang AIDS?

Sukad sa linghod nga panuigon, ang mga batan-on kanunayng naladlad sa mga mensahe nga nagdasig sa pagkamahilayon sa sekso. Kaylap usab ang paggamit ug droga nga ipaagi sa kaugatan, nga maoy laing paagi nga mataptan ug HIV. Tungod kay daghang tawo karon ang nagagawi sa iresponsable nga paagi, maghunahuna ka tingali kon mahanaw ba gayod kaha ang AIDS.

ANG mga propesyonal labot sa panglawas tukmang nagpunting sa mga kausaban sa batasan ingong hinungdanong paagi sa pagpakigbugno batok sa AIDS. “Ang tanang batan-on,” matod sa usa ka taho nga gipatik sa Centers for Disease Control and Prevention, “nagkinahanglan ug masangkaron, mapinadayonon nga impormasyon ug mga impluwensiya labot sa panglawas nga makatabang kanila sa pag-ugmad ug mga katakos sa tibuok nilang kinabuhi aron malikayan ang mga batasan nga maoy hinungdan nga mataptan ang usa ug HIV. Ang maong masangkaron nga mga programa angayng maglakip sa mga ginikanan ug sa mga magtutudlo usab.”

Tin-aw nga kinahanglang edukahon sa mga ginikanan ang ilang mga anak mahitungod niining maong mga kapeligrohan sa dili pa sila makadawat ug sayop nga impormasyon gikan sa ilang mga katalirongan o sa ubang tawo. Kini dili gayod sayon. Apan kini makaluwas sa kinabuhi sa inyong anak. Ang paghatag ug kasayoran sa mga bata bahin sa sekso ug droga dili makawagtang sa ilang pagkainosente. Sa pagkatinuod, kini makapanalipod kanila batok sa pagkawala sa ilang kaputli.

Hinungdanon ang Ginikananong Pagbansay

Taliwala sa karaang katawhan sa Diyos, gidahom ang mga ginikanan nga tudloan ang ilang mga anak bahin sa seksuwal nga mga relasyon ug kon unsaon pagpanalipod sa ilang panglawas. Makaiikag nga ang mga balaod sa karaang mga Israelinhon naglakip sa klarong moral nga mga giya ug mga panggawi nga nanalipod kanila batok sa impeksiyon. (Levitico 18:​22, 23; 19:29; Deuteronomio 23:​12, 13) Sa unsang paagi kining mga balaora itudlo ngadto sa katawhan? Giingnan ni Jehova nga Diyos ang mga Israelinhon: “Kining mga pulonga nga akong gisugo  kanimo niining adlawa kinahanglan nga maanaa sa imong kasingkasing.” Kinahanglang masabtan una sa mga ginikanan ang mga kaayohan sa pagsunod niining mga balaora ug ang mga sangpotanan sa pagkapakyas sa pagtuman niana. Dayon sila gisugo: “Isilsil mo kini sa imong anak ug magsulti ka mahitungod niini sa maglingkod ikaw sa imong balay ug sa maglakaw ikaw sa dalan ug sa imong paghigda ug sa imong pagbangon.”​—Deuteronomio 6:​6, 7.

Ang usa ka diksiyonaryo naghubit sa pulong “isilsil” ingong “pagtudlo ug pagtisok pinaagi sa kanunayng pagsublisubli o pagpahinumdom.” Dayag nga nagkinahanglan kinig panahon. Kon gahinag panahon sa mga ginikanan ang pagtudlo sa ilang mga anak maylabot sa mga kapeligrohan sa pag-abuso sa droga ug sa gidiling pagpakigsekso, dakog kalagmitan nga makita nila ang ilang mga anak nga maglikay sa matang sa mga panggawi nga maoy hinungdan nga mataptan ang usa ug HIV ug sa uban pang mga sakit. a

Kahupayan Alang sa mga Nag-antos sa HIV/AIDS

Ang mga panagana gamay ra tingalig ikahatag nga kahupayan ngadto sa milyonmilyong tawo nga nataptan ug HIV/AIDS. Gawas pa sa pag-antos sa pisikal nga mga epekto sa sakit mismo, sila sagad nga tamayon ug isalikway tungod sa ilang kahimtang. Ngano man? Ang kasagaran, apan sayop, nga pagtuo mao nga bisan ang dili-seksuwal nga kontak makapasa sa HIV. Masabot ang kahadlok nga mataptan ug HIV/AIDS, sanglit kini mananakod ug makamatay. Tungod sa ilang kahadlok sa maong sakit, ang ubang tawo mayugot sa mga tawo nga duna nianang sakita. Ang mga nag-antos wala tambali, gipapahawa sa simbahan, ug grabe pa ganing gidagmalan.

Hugot nga gipatuo sa ubang mga tawo nga ang AIDS maoy tunglo gikan sa Diyos para sa mga daotan. Tinuod, ang pagsunod sa mga sukdanan sa Bibliya bahin sa seksuwal nga moralidad, pag-abuso sa droga, ug dugo makapanalipod unta sa daghang nag-antos nga dili mataptan sa maong sakit. (Buhat 15:​28, 29; 2 Corinto 7:1) Bisan pa niana, gipakita sa Kasulatan nga ang maong sakit dili pamatuod nga kini silot sa Diyos alang sa usa ka espesipikong sala. Sa kasukwahi, ang Bibliya nag-ingon: “Ang Diyos dili masulayan sa daotang mga butang ni siya mosulay kang bisan kinsa.” (Santiago 1:13; Juan 9:1-3) Ang usa ka tawo nga nataptan ug HIV o AIDS tungod kay wala magsunod sa mga sukdanan sa Kasulatan apan nagbag-o sa iyang panggawi makasalig nga siya dili talikdan sa Diyos.

Ang empatiya ug gugma sa Diyos para niadtong gilaygay sa sakit nadayag sa dihang ang iyang Anak, si Jesus, mianhi sa yuta. Nakasugat ug sanlahon panahon sa iyang mga panaw, si Jesus “giabot ug kaluoy, ug iyang gituy-od ang iyang kamot ug gihikap siya.” Gigamit ni Jesus ang iyang milagrosong gahom ug giayo ang sanlahon. (Marcos 1:40-42) Wala tamaya ni Jesus ang mga masakiton. Ang gugma nga iyang gipakita kanila maoy usa ka hingpit nga sumbaliksilaw sa gugma sa iyang langitnong Amahan.​—Lucas 10:22.

Ang AIDS Hapit Nang Maayo!

Ang milagrosong pagpang-ayo ni Jesus wala lamang magpasalig kanato sa gugma sa Diyos. Ang Bibliya nagtug-an kanato nga si Jesu-Kristo nagmando na ingong langitnong Hari. (Pinadayag 11:15) Gipakita sa iyang ministeryo dinhi sa yuta nga siya adunay gahom ug andam nga moayo sa tanang balatian nga nagsakit sa mga tawo. Mao gayod kanay iyang pagabuhaton.

Ang tagna sa Bibliya nagpasalig kanato nga sa dili madugay “walay pumoluyo nga moingon: ‘Ako masakiton.’” (Isaias 33:24) Bisan pa sa kapakyasan sa mga tawo sa pagsanta sa pagkaylap sa AIDS o sa pagtaganag epektibong tambal alang sa tanan, kita makasalig nga wagtangon ra ang AIDS. “Dayega si Jehova, Oh kalag ko,” matod pa ni Haring David, “ug ayaw kalimti ang tanan niyang mga buhat, Siya nga nagapasaylo sa tanan mong kasaypanan, nga nagaayo sa tanan mong balatian.”​—Salmo 103:​2, 3.

Kanus-a man kini mahitabo? Unsa ang mga kinahanglanon sa Diyos alang niadtong naglaom nga makasinati sa maong mga panalangin? Kami nag-awhag kaninyo sa pagkontak sa mga Saksi ni Jehova aron makakat-on pag dugang bahin sa kahibulongang saad sa Bibliya.

[Footnote]

[Blurb sa panid 11]

Ang tagna sa Bibliya nagpasalig kanato nga sa dili madugay “walay pumoluyo nga moingon: ‘Ako masakiton’”

[Hulagway sa panid 10]

Ang pagtudlo sa inyong mga anak bahin sa sekso ug pag-abuso sa droga makapanalipod kanila

[Hulagway sa panid 10]

Ang katakos ug pagkaandam ni Jesus nga moayo sa mga masakiton nagpakita kon unsay iyang pagabuhaton sa umaabot