Gikan sa Among mga Magbabasa

Mga Binuhi Daghang salamat sa serye nga “Mga Binuhi​—Unsay Imong Paglantaw Kanila?” (Pebrero 22, 2004) Giganahan gayod ako sa pagkasulat sa mga artikulo, nga nagpakitag gugma ug konsiderasyon sa mga mananap. Hatagan nakog kopya sa maong magasin ang akong beterinaryo. Ang mga artikulong sama niini basin makatukmod sa mga tawong mahiligon sa mga mananap sa pagpakigsuod kang Jehova.

O. M., Italya

Bag-o lang kong nagsugod sa pagpuyo nga nag-inusara, ug busa nagbuhi kog duha ka miming. Nalingaw gayod ako kanila, apan nasabtan usab nako nga kinahanglang sila dili lantawon nga samag mga tawo. Kining artikuloha nakatabang kanako sa pagsabot sa panginahanglan sa pagbaton ug balanseng panglantaw maylabot sa mga binuhi.

K. O., Japan

Daghan kaayong salamat. Tulo ka semana kanhi akong gipakatulog sa dayon ang akong 13-anyos nga binuhi nga iro. Kadto maoy usa sa labing malisod nga desisyon nga akong nahimo sukad. Niadtong buntaga gibalikbalik nakog basa ang serye bahin sa mga binuhi. Kini mahangawaon, masinaboton, ug mapuslanon.

S. G., Tinipong Bansa

Ako nagtrabaho alang sa usa ka tawo nga nailhan tungod sa iyang dakong nahimo sa modernong industriya sa pagkaon para sa mga binuhi. Gibilin nako ang magasin bahin sa mga binuhi diha sa akong typing stand. Sa dihang migawas ako aron maniudto, nakita sa akong amo ang magasin, gibasa kini, ug nagustohan kini pag-ayo nga gusto na niyang makadawat kanunay ug Pagmata!

L. W., Tinipong Bansa

Nindot kaayo ang mga artikulo ug nakatabang kini kanako sa pagbaton ug hustong tinamdan bahin sa akong mga binuhi. Gusto lang nakong hisgotan nga kon ang usa ka tawo magdalag iring o iro sa iyang balay, angay niyang hunahunaon ang pagpakapon niini. Ang usa ka hinungdan kon nganong daghang iro ug iring ang gipamatay kada tuig maoy tungod kay dili ingon niana ka daghan ang mga panimalay nga gustong mobuhi kanila.

C. B., Tinipong Bansa

Ang “Pagmata!” nagtubag: Salamat sa paghisgot niining puntoha alang sa among mga magbabasa.

Nag-ingon ang inyong artikulo nga sa bag-ong kalibotan sa Diyos, “ang tanang mananap, gipaaghop ug ihalas, aduna unyay pakigdait sa usag usa.” Makataronganon ba ang pagtuo nga wala na unyay manunukob nga mga mananap?

D. B., Canada

Ang “Pagmata!” nagtubag: Sukad nakasala ang tawo, daghang butang sa atong planeta ang dili na balanse. Mahibaloan ra sa umaabot kon sa unsang paagi eksaktong matuman ang mga tagna sa Bibliya mahitungod sa panaghiusa taliwala sa mga mananap didto sa Paraiso. Apan kita bug-os makasalig nga hanawon sa atong Maglalalang ang tanang makadaot nga mga butang gikan sa atong planeta.​—Salmo 37:​10, 11.

Paglakawlakaw Salamat sa artikulong “Kinahanglan Bang Molakaw Agig Ehersisyo?” (Pebrero 22, 2004) Nakatabang kanako ang pagkahibalo nga makunhoran sa usa ka tawo ang risgo nga makaagom sa sakit sa kasingkasing ug maestrok pinaagi lang sa paglakawlakaw! Tungod sa maong artikulo, naamgohan ko nga dili-aktibo ang akong estilo sa kinabuhi sulod sa dugay nang panahon. Sundon nako ang tambag nga maglakawlakaw nga regular.

L. B., Sweden

Telephone Sex Gusto kong magpasalamat sa artikulong “Mga Batan-on Nangutana . . . Unsay Daotan sa Telephone Sex?” (Pebrero 22, 2004) Naagoman nako ang kapait sa pagpakigbugno niining seryosong suliran. Tungod niadto nadaot ang akong espirituwalidad, nga mitultol ngadto sa mas grabeng mga sala ug pagkawala sa mga pribilehiyo sa Kristohanong kongregasyon. Hinaot ang kaalam ni Jehova magauban kaninyo samtang magpatik kamo ug mga artikulo nga makatabang kanamo sa pagpabiling lig-on sa espirituwal.

J. H., Espanya