“Kinahanglang Mabasa sa Tanan Kining Libroha”

TINAMPO SA MAGSUSULAT SA PAGMATA! SA POLANDIA

Sugod sa ting-init sa 2003, ang librong Pagkakat-on Gikan sa Dakong Magtutudlo giluwatan sa daghang pinulongan diha sa mga kombensiyon sa tibuok kalibotan. Sama sa ubang mga dapit, talagsaon usab ang reaksiyon sa Polandia sa pagkadawat niining maanindot nga pagkailustrar nga libro. Bisan tuod gidisenyo kini ilabina alang sa mga kabataan, gipakita sa mga sulat gikan sa mga tin-edyer ug mga hamtong nga ang maong libro nagustohan sa mga tawo nga lainlain ug pangedaron. Ania ang pipila ka kinutlo.

“Ang akong ngalan mao si Agata, ug ako nag-edad ug otso anyos. Sa dihang akong nadawat kining libroha, gibati dayon nako ang kadako sa pagmahal ni Jehova kanako. Ang kapitulo 7 mao ang nagustohan nako pag-ayo, ‘Ang Pagkamasinugtanon Manalipod Kanimo.’ Wala nako sugta kanunay ang akong mga ginikanan, apan karon nasayod ako nga kinahanglan kong magbag-o tungod kay si Jehova gusto ug masinugtanong mga bata.”

Si Marlena, usa ka 13-anyos nga dalagita, misulat nga may kahimuot: “Nahibalo ako nga kining basahona gituyo para sa mga kabataan, apan nagtuo ako nga magustohan kini sa tanan. Napalig-on ang akong pagtuo kang Jehova ug kang Jesus pinaagi sa pagbasa niini. Bisan ang lisod sabton nga mga butang gipatin-aw sa yanong paagi. Dili nako kini maundangan pagbasa. Ug pagkanindot sa mga hulagway! Ang mga pangutana nga nag-uban niini makapukaw sa pagkamausisahon sa mga kabataan! Nindot kaayo kining libroha, busa gibasa nako kinig maayo. Daghan kaayong salamat.”

Si Justyna, usa ka 15-anyos nga dalaga, nag-ingon kon nganong giganahan gayod siya sa maong libro: “Nalingaw gayod ako sa mga kapitulo nga akong nabasa nga gusto nakong ipahayag ang akong kinasingkasing nga pasalamat tungod niining maanindot ug matulon-anon nga gasa. Sa akong hunahuna kinahanglang mabasa sa tanan kining libroha​—bisan sa mga tigulang. Para nako, yano ug dali rang masabtan ang mga pananglitan nga gihatag niini nga bisan ang bata nga usa pa ka tuig ang edad makasabot. Ug ang mga hulagway matulon-anon kaayo. Hinuon, dili gayod nako mapahayag sa bug-os kon unsay akong bation sa dihang magbasa ko sa maong libro.”

Si Eunika nagpasalamat usab tungod ning maong publikasyon. Bisan tuod siya 19 anyos, maikagon niyang gibasa ang bag-ong libro ug miingon nga nakita niya kining “mapuslanon para sa mga tin-edyer.” Misulat usab siya: “Kini naundan ug bililhong tambag alang sa matag adlaw nga pagkinabuhi​—sa panimalay, sa eskuylahan, ug diha sa kongregasyon. Salamat niining gasaha.”

Si Maria, usa ka malipayong inahan sa usa-ka-tuig nga si Oliwia, nga nakamatikod sa reaksiyon sa iyang anak nga babaye sa mabulokon nga mga hulagway, nag-ingon: “Kinasingkasing ko kamong pasalamatan tungod niining talagsaong tabang sa pagtudlo sa mga kabataan. Nalingaw pag-ayo si Oliwia sa maong libro. Magpasabak siya namo ug gusto nga amo siyang suginlan kon unsay anaa niini o niana nga kapitulo. Giganahan kaayo siya sa hulagway diha sa panid 83, nga nagpakita sa duha ka batang babaye nga magkalahi ug kolor sa panit nga naghalogay. Ang ubang mga hulagway morag tinuod gayod nga iya kining hikapon, halogon, ug pahiyoman.”

Gipasiugda usab ni Maria ang edukasyonal nga bili sa maong libro: “Gihisgotan niini ang seryosong mga isyu maylabot sa sekso (mga panid 58-60) ug pag-abuso sa bata (mga panid 170-1). Kini maoy maayong tabang alang sa mga ginikanan nga gustong magmatuto sa ilang mga anak sa maalamong paagi niining daotang kalibotan karon nga puno sa nagpahiping kapeligrohan.”

Gilaoman sa mga magpapatik sa Pagkakat-on Gikan sa Dakong Magtutudlo nga kining libroha makatabang usab kaninyo ug sa inyong mga anak nga makabenepisyo sa mga pagtulon-an nga gihatag sa Dakong Magtutudlo, si Jesu-Kristo, ngadto sa katawhan duolan sa 2,000 ka tuig na kanhi.

[Hulagway sa panid 31]

Agata

[Hulagway sa panid 31]

Marlena

[Hulagway sa panid 31]

Eunika

[Hulagway sa panid 31]

Maria ug Oliwia

[Hulagway sa panid 31]

Justyna