Kitang Tanan Nagkinahanglag mga Higala

“Ang usa ka higala maoy usa ka tawo nga matinud-anon ug prangka nimong ikaestorya bahin sa tanang butang, kinsa mahimo nimong tawagan bisan unsang orasa.”​—Yaël, Pransiya

“Ang usa ka higala makasabot sa dihang ikaw nasakitan ug masakitan usab sama sa imong gibati.”​—Gaëlle, Pransiya

“ADUNAY higala nga mounong labaw pa kay sa usa ka igsoon.” (Proverbio 18:24) Sukad nga gisulat kanang mga pulonga diha sa Bibliya mga 3,000 ka tuig kanhi, ang tawhanong kinaiya wala gihapon mausab. Ang panaghigala hinungdanon gihapon alang sa atong panghunahuna maingon nga ang pagkaon ug tubig hinungdanon alang sa atong lawas. Bisan pa niana, alang sa daghan, dili sayon ang pagtagbaw niining paninugdang panginahanglan alang sa panaghigalaay. Kaylap ang pagbati sa kamingaw. “Dili lisod sabton kon unsa ang pipila ka mga hinungdan,” nag-ingon si Carin Rubenstein ug Phillip Shaver diha sa ilang libro nga In Search of Intimacy. Ilang gipunting ang mga hinungdan sama sa “subsob nga pagbalhinbalhin”​—ang mga tawo kanunayng mobalhin ug pinuy-anan​—“dili matinagdanon, punog-krimen nga mga siyudad,” ug “pagpuli sa telebisyon ug pagtan-aw ug video diha sa balay ilis sa personal nga pagpakig-estorya sa mga tawo diha sa katilingban.”

Ang modernong pagkinabuhi usab makahurot sa atong panahon ug kusog. “Ang mga molupyo karon sa siyudad lagmit makahibalag ug daghang tawo kada semana kay sa mahibalag sa usa ka baryohanon sa ika-17ng siglo sa usa ka tuig o sa tibuok niyang kinabuhi,” misulat si Letty Pogrebin diha sa iyang librong Among Friends. Sanglit mahimong makaila kita ug gatosan ka tawo, lisod natong masentro ang atong pagtagad nganha sa pipila ka indibiduwal aron maugmad ug mapalig-on ang suod nga panaghigalaay.

Bisan diha sa mga dapit nga kaniadto ang pagkinabuhi dili kaayo puliki ang kahimtang sa katilingban kusog kaayong nagakausab. “Gibati nato kanhi nga suod kaayo kita sa atong mga higala,” nag-ingon si Ulla, kinsa nagpuyo sa Sidlakang Uropa. “Apan karon daghan ang napuliki pag-ayo sa ilang mga trabaho o sa personal nga mga pangagpas. Ang tanan puliki kanunay, ug atong masabtan kon nganong ang dugay nang panaghigalaay anam-anam nga nabungkag.” Tungod sa paspas nga dagan sa modernong panahon, ang mga panaghigalaay wala na kaayo hatagig importansiya.

Apan gusto gihapon natong makabaton ug mga higala. Ang mga batan-on ilabina maoy mobati ning maong panginahanglan. Sama sa giingon ni Yaël, nga gikutlo sa ibabaw, “sa dihang batan-on ka pa, kinahanglang mobati ka nga dinawat ug giabiabi, nga mobating suod sa usa ka tawo.” Batan-on man o tigulang, kitang tanan nagkinahanglan ug malipayon ug makahuloganong mga panaghigalaay. Ug bisan pa sa mga suliran, daghan kitag mahimo aron makabaton ug makahupot ug tinuod nga mga higala. Ang mosunod nga mga artikulo maghisgot niini.