Nahibalo Ka Ba?

(Ang mga tubag niining maong pasulit makita diha sa mga teksto sa Bibliya nga gisitar, ug ang kompletong lista sa mga tubag gipatik diha sa panid 27. Alang sa dugang impormasyon, susiha ang publikasyong “Insight on the Scriptures,” nga gipatik sa mga Saksi ni Jehova.)

1. Bisan tuod gustong sulatan ni Judas ang iyang Kristohanong mga igsoon bahin sa kaluwasan nga gihuptan nilang tanan, unsa na hinuoy nakita niya nga angayng isulat kanila? (Judas 3)

2. Si Cleopas ug ang iyang mga kauban nagpadulong sa unsang balangay sa dihang miduyog kanila ang nagmateryalisar nga si Jesu-Kristo? (Lucas 24:13-32)

3. Sumala sa asoy sa Bibliya, pinaagi sa unsa nga ang Napulo ka Sugo nasulat diha sa duha ka papan nga bato? (Exodo 31:18)

4. Unsa ang nasyonalidad sa “daghang langyawng asawa” nga gikuha ni Solomon, nga maoy “nagpakiling sa iyang kasingkasing sa pagsunod sa ubang mga diyos”? (1 Hari 11:​1, 4)

5. Bisan pa sa daghang milagro nga gihimo ni Jesus, unsa ang wala buhata sa iyang mga igsoon maylabot kaniya? (Juan 7:5)

6. Bisan tuod duha sa mga anak nga lalaki ni Haring David, si Absalom ug Adonias, ang nakigkunsabo sa pag-ilog sa iyang trono sa lainlaing mga higayon, kinsa ang hapit untang milampos? (2 Samuel 16:15-22; 1 Hari 1:9-11, 38-53)

7. Unsa ang gibug-aton sa simbolikong ulan nga yelo nga nangahulog gikan sa langit sa dihang giyabo sa ikapitong manulonda ang iyang panaksan sa kasuko sa Diyos? (Pinadayag 16:21)

8. Unsay gisugo sa Kasulatan nga himoon niadtong anaa sa Kristohanong kongregasyon bahin sa usa ka membro nga gipalagpot? (1 Corinto 5:11)

9. Diha sa usa ka panan-awon, kinsang bakak nga diyosdiyos ang nakita ni Ezequiel nga gihilakan sa apostatang Hebreohanong mga babaye? (Ezequiel 8:14)

10. Nganong si Agur, ang magsusulat sa Proverbio kapitulo 30, mihangyo nga dili unta siya hatagan ug “kakabos ni mga bahandi”? (Proverbio 30:​8, 9)

11. Unsang ilhanan ang gihatag kang Ezequias ingong pasalig nga ayohon siya ni Jehova ug panalipdan ang Jerusalem gikan sa mga Asiryanhon? (Isaias 38:5-8)

12. Unsay gihimo sa matinabangong Samarianhon alang sa gibun-og ug himalatyon nga tawo nga iyang nakita sa dalan paingon sa Jerico? (Lucas 10:34)

13. Unsang matang sa turong ang gilagda nga sul-obon sa hataas nga mga saserdote sa Israel? (Exodo 28:37)

14. Nganong miingon man si Abraham nga si Sara maoy iyang igsoon sa duha ka lainlaing higayon? (Genesis 12:19; 20:2)

15. Unsa ang ngalan sa mga bukid diin didto ipahayag ang mga panalangin gumikan sa pagsunod sa Balaod sa Diyos ug ang mga maldisyon gumikan sa paglapas niana? (Deuteronomio 11:29)

16. Unsa ang siyudad nga gipuy-an sa unang hari sa Israel, si Saul? (1 Samuel 10:24-26)

17. Kinsa ang hari nga nagtambog kang Daniel ngadto sa langob sa mga leyon? (Daniel 6:​9, 16)

 Mga Tubag sa Pasulit

1. Gitambagan niya sila nga “kusganong makigbugno alang sa pagtuo”

2. Sa Emmaus

3. Pinaagi sa “tudlo sa Diyos”

4. “Moabihanon, Ammonhanon, Edomhanon, taga-Sidon ug Hitihanon”

5. “Magpasundayag ug pagtuo”

6. Si Absalom

7. Usa ka talanton (mga 20 kilos)

8. Mohunong na sa pagpakig-uban sa maong tawo

9. Si Tamuz

10. Aron dili siya mobating tagbaw sa kaugalingon ug isalikway si Jehova o mangawat ug magpasipala sa ngalan sa Diyos

11. Ang adlaw mibalik ug napulo ka ang-ang diha sa hagdanan ni Ahaz

12. Iyang gihinloan ug gibugkosan ang iyang mga samad, gidala siya sa balay-abotanan, ug giatiman siya

13. Usa ka purong

14. Tungod kay nahadlok si Abraham nga patyon siya ni Paraon ug ni Haring Abimelek aron mahimo nilang asawa ang matahom nga si Sara

15. Bukid Gerizim (mga panalangin); Bukid Ebal (mga maldisyon)

16. Gibea

17. Dario