Ang Labing Hinungdanon nga Matang sa Katahom

ANG mga tawo ganahan niadtong giisip nila nga madanihon. Apan unsa ba gayoy maghimo kanimo nga madanihon? Kon buot hunahunaon, limitado lang ang makataronganon nimong mahimo aron sa pagretoke sa imong kinaiyanhong dagway. Dugang pa, ang pisikal nga katahom lumalabay, sanglit walay usa kanato karon ang makaikyas sa laksot nga mga epekto sa pagkatigulang ug sakit. Aduna bay laing matang sa katahom nga mas hinungdanon, malungtaron, ug posibleng maangkon?

Ang Kahinungdanon sa Pangsulod nga Katahom

Ang Bibliya nagpasalig kanato nga gipabilhan pag-ayo sa atong Maglalalang, si Jehova nga Diyos, ang pangsulod nga katahom sa usa ka tawo. Tagda ang pipila ka mga pananglitan.

Sa dihang giingnan ni Jehova ang manalagna nga si Samuel sa pagpili ug usa ka hari sa Israel gikan sa mga anak ni Jese, ang unang namatikdan sa propeta mao ang ambongan nga si Eliab. “Tinong ang iyang dinihogan anaa na sa atubangan ni Jehova,” matod ni Samuel. Apan si Jehova miingon kang Samuel: “Ayaw pagtan-aw sa iyang panagway ug sa gitas-on sa iyang barog, kay gisalikway ko siya. Kay ang pagtan-aw sa tawo [dili sama sa pagtan-aw sa Diyos], tungod kay ang tawo nagatan-aw sa makita sa iyang mga mata; apan alang kang Jehova, siya nagatan-aw sa kasingkasing.”​—1 Samuel 16:​6, 7.

Sa ulahi, ang napili nga mahimong hari mao ang kinamanghorang anak nga lalaki, si David. Bisan tuod siya “nindot ug mga mata ug ambongan ang panagway,” si David lagmit nga dili ingon ka madanihon kay sa iyang magulang nga mga igsoon. Apan “ang espiritu ni Jehova milihok diha kang David sukad niadtong adlawa.” Bisan tuod siya dili hingpit ug nakahimog grabeng mga sala, siya nailhan ingong usa ka tawo nga maayog kasingkasing ug usa ka matinumanong alagad sa Diyos hangtod sa iyang kamatayon. (1 Samuel 16:​12, 13) Walay duhaduha nga siya madanihon sa mga mata sa Diyos ilabina tungod sa iyang pangsulod nga katahom.

Kasukwahi niana, tagda si Absalom, usa sa mga anak ni David. Siya nahimong salawayon nga tawo bisan pa sa iyang kaambongan. Ang Bibliya nag-ingon bahin kaniya: “Karon kon itandi kang Absalom walay tawong ingon ka ambongan sa tibuok Israel nga dinayeg kaayo. Gikan sa lapalapa sa iyang tiil hangtod sa alimpulo sa iyang ulo walay-ikasaway diha kaniya.” (2 Samuel 14:25) Apan, tungod sa iyang ambisyon, si Absalom mirebelde batok sa iyang kaugalingong amahan ug misulay pag-ilog sa iyang gahom. Gipanamastamasan pa gani niya ang mga puyopuyo sa iyang amahan. Tungod niana, midangat kaniya ang kasuko sa Diyos ug siya nakaagom ug masakit nga kamatayon.​—2 Samuel 15:10-14; 16:13-22; 17:14; 18:​9, 15.

Ikaw ba nadani kang Absalom? Siyempre  wala. Sa katibuk-an, ngil-ad siya nga tawo. Ang iyang pisikal nga kaambong wala makabawi sa iyang pagkamapahitas-on ug pagkamaluibon, ug wala kini makapugong sa iyang pagkapukan. Sa laing bahin, ang Bibliya walay gisulti bahin sa panagway sa daghang maalamon ug madanihong mga tawo nga gihisgotan niini. Tin-aw nga ang labing hinungdanong butang mao ang ilang pangsulod nga katahom.

Makapadani ang Pangsulod nga Katahom

Makapadani ba sa uban ang pangsulod nga katahom? Si Georgina, nga napulo ka tuig nang minyo, miingon: “Sa dugay nang panahon, nagustohan nako ang akong bana tungod sa iyang pagkamatinud-anon ug pagkasinsero kanako. Ang labing hinungdanong butang sa iyang kinabuhi mao ang pagpahimuot sa Diyos. Usa kana sa mga hinungdan kon nganong siya mahunahunaon ug mahigugmaon kanako. Konsiderahon niya ako sa tanan niyang mga desisyon ug ipabati niya nga ako bililhon. Nasayod ako nga gihigugma gayod niya ako.”

Si Daniel, nga naminyo sa 1987, miingon: “Ang akong asawa matahom para nako. Wala lang ako mabihag sa iyang katahom kondili misamot pa gayod ang gugma ko kaniya tungod sa iyang kinaiya. Manggihunahunaon siya kanunay sa ubang mga tawo ug gusto niyang buhaton ang mga butang nga makapalipay kanila. Siya adunay maayo kaayong Kristohanong mga hiyas. Mao kanay hinungdan nga ganahan akong makig-uban kaniya.”

Dili sama sa kadaghanang tawo sa kalibotan karon, kinahanglan nga dili lang panggawas nga panagway ang hatagan natog pagtagad. Kinahanglang masabtan nato nga lisod kaayo, imposible pa gani, ang pagbaton ug “hingpit” nga panagway​—ug dili kaayo kini hinungdanon. Apan, posible nga maugmad nato ang maayong mga hiyas nga makahatag kanato ug pangsulod nga katahom. Ang Bibliya nag-ingon: “Ang pagkamadanihon mahimong malimbongon, ug ang kaanyag mahimong kawang; apan ang babaye nga nahadlok kang Jehova mao ang makabaton ug pagdayeg alang sa iyang kaugalingon.” Sa kasukwahi, ang Kasulatan nagpasidaan: “Maingon sa bulawang singsing sa ilong diha sa simod sa baboy, mao man usab ang babaye nga maanyag apan nagapahilayo sa pagkamay-salabotan.”​—Proverbio 11:22; 31:30.

Ang Pulong sa Diyos motabang kanato sa pagpabili “sa natago nga pagkatawo sa kasingkasing pinaagi sa dili-madunot nga sapot sa malinawon ug malumong espiritu, nga dakog bili sa mga mata sa Diyos.” (1 Pedro 3:4) Sa pagkatinuod, ang pangsulod nga katahom mas hinungdanon pa kay sa pisikal nga katahom. Ug mahimo kana nga maangkon sa tanan.

[Mga hulagway sa panid 8, 9]

Ang pagbaton ug maayong mga hiyas mas makapatahom kanimo kay sa bisan unsang pagparetoke sa panagway