Gikan sa Among mga Magbabasa
Gikan sa Among mga Magbabasa
Mga Balon Nalingaw ako sa pagbasa sa artikulong “Ang Kinadak-ang Pasundayag sa mga Balon sa Kalibotan!” (Marso 8, 2004) Ang akong mama miingon nga gusto siyang mosakay ug balon, ug ako usab gustong mosakay niini. Sa dihang gibasa nako ang artikulo, nahingangha ako tungod sa daghan kaayong mga balon! Giganahan kaayo ako sa mga hulagway. Ako otso anyos.
J. L., Tinipong Bansa
Katingalahang Tanom Wala pa ako sukad makabasa ug makaiikag ug talagsaon kaayo nga artikulo sama sa “Usa ka Katingalahan, Manggibuhion Kaayo nga Tanom.” (Marso 8, 2004) Katingalahan gayod nga tanom ang welwitschia. Makapahingangha gayod nga mabuhi kini sa taas kaayong panahon diha sa lisod kaayong mga kahimtang! Ang mga artikulo nga sama niini dugang nagpadayag sa kaalam sa atong mamugnaon nga Maglalalang, si Jehova.
A. C., Rusya
Nagdako ako sa Angola ug nakapribilehiyo ako sa pagkakita ug welwitschia sa daghang higayon. Nahingangha ako niining talagsaong tanom matag higayon nga makita nako kini. Apan naglibog ko bahin sa mga ideya nga kasagarang gihunahuna sa mga tawo labot niini. Karon, 27 ka tuig sa ulahi, akong nadawat ang impormasyon nga gusto nakong mahibaloan.
A. O., Switzerland
Kapin na sa 15 ka tuig nga ako nagbasa ug Pagmata! Sanglit wala man koy kahigayonan sa pag-adto sa lainlaing mga lugar, ang maong mga artikulo nakatabang kanako nga makat-onan ang daghang butang maylabot sa mga linalang ni Jehova. Dili gayod unta nako masayran ang bahin sa taas nga kinabuhi sa welwitschia kon dili pa tungod sa Pagmata!
L. Z., Pransiya
Ang Burren sa Irlandia Nakapribilehiyo kami sa akong bana sa pag-adto sa Irlandia sa miaging tuig. Busa nainteres kaayo kami sa artikulong “Ang Makaiikag nga Burren sa Irlandia.” (Marso 8, 2004) Kadaghanang libro alang sa mga turista wala kaayoy impormasyon bahin sa Burren. Ang surbeyor nga si Ludlow naghubit kanhi sa Burren ingong “usa ka umaw nga kamingawan,” apan matahom ang batoon nga palibot niini. Apan, ang labing matahom nga butang nga among nakita mao ang grupo sa mga Saksi ni Jehova nga nagsangyaw sa balay ug balay. Nalipay sila sa dihang giingnan namo sila nga mga Saksi usab kami. Mibiya kami sa Irlandia nga may bag-ong mga higala maingon man mga handomanan sa Burren.
B. E., Tinipong Bansa
Tipo sa Dugo Salamat sa artikulong “Ang Hunahuna sa Bibliya: Matino ba ang Imong Personalidad Pinaagi sa Tipo sa Dugo?” (Pebrero 8, 2004) Medyo naglibog ako mahitungod niining butanga. Gitudlo kanamo sa eskuylahan nga ang personalidad dili matino pinaagi sa tipo sa dugo. Namatikdan usab nako nga diha sa ubang mga libro, ang paggamit ug tipo sa dugo sa pagtino sa personalidad nalangkit sa espiritismo. Apan may nailhan akong mga tawo nga kanunayng maghisgot bahin sa mga tipo sa dugo ug hukman ang uban base niini. Sa dihang naglibog na gayod ako kon unsay husto o sayop, migula kining artikuloha, ug klaro nakong nasabtan ang hunahuna sa Bibliya.
R. K., Japan
Ang maong artikulo nakapaikag kanako. Ang mga tawo sa akong eskuylahan moingon nga estrikto ug sensitibo ang tawong may tipo-A nga dugo ug malumo ang tawong may tipo-B nga dugo. Kanunay akong maghunahuna, ‘Ingon ba ako niana?’ Apan nalipay ako sa pagkahibalo nga ang matag tawo dunay iyang kaugalingong personalidad. Nasayran usab nako nga puwede natong mausab ang atong personalidad pinaagi sa pagpagiya sa balaang espiritu sa Diyos.
N. I., Japan
Mga Busay Buot nakong ipahayag ang akong apresasyon alang sa nindot nga artikulong “Pagsuhid sa Maanindot nga mga Busay.” (Pebrero 22, 2004) Ang Zambia dunay daghang lanaw, suba, lasang, ug kabukiran. Ug ang mga busay nindot kaayo. Ang artikulo nagtukmod kanako sa pagpasalamat kang Jehova, ang atong langitnong Amahan, tungod sa mga butang nga iyang gilalang.
G. M., Zambia