Mga Batan-on Nangutana . . .

Komosta Kon Mobalibad Siya?

GIISIP nimo siya ingong higala. Apan unya naibog ka niya. Tingali nadani ka sa iyang maayong panggawi o sa iyang pahiyom sa dihang siya makigsulti kanimo. Bisan unsa pay rason, milabay ang panahon, ug wala gayod siya mangulitawo nimo. Busa nakahukom ka sa pagpangutana kaniya kon gusto ba niya nga magkatrato mo. Sa imong dakong kahigawad, siya maluloton apan hugot nga mibalibad kanimo. a

Siyempre, nahiubos ka. Apan ayaw pagpalabi sa imong gibati; sulayi ang paglantaw sa mga butang sa hustong paagi. Oo, ang usa ka batan-ong lalaki miingon nga dili niya gustong makigtrato nimo. Hinumdomi nga ang iyang desisyon dili makapausab sa bili sa imong pagkatawo, ni nagpanghimakak kini sa kamatuoran nga ang uban magpadayon sa paghigugma ug pagtahod kanimo. Gani, basin dili ikaw ang hinungdan sa iyang desisyon kondili ang personal nga mga tumong ug prioridad sa maong batan-ong lalaki.

Kon Kristohanon ka, mahinumdoman tingali usab nimo nga “ang Diyos dili kay dili-matarong nga kalimtan ang inyong buhat ug ang gugma nga inyong gipakita alang sa iyang ngalan.” (Hebreohanon 6:10) Si Sonja b nagpahayag niana niining paagiha: “Ikaw bililhon gihapon. Ikaw mapuslanon kang Jehova ingong dalaga.” Tungod kay ang Labing Hataas ug ang ubang mga tawo taas ug pagtamod kanimo, nganong mawad-an ka mag pagtahod sa imong kaugalingon?

Ikaw tingali mobati gihapog kapakyasan o mahadlok ka nga ikaw dili angayan nga mahimong kapikas sa kaminyoon. Apan tungod lang kay dili ka “angay” sa panan-aw niining maong batan-ong lalaki niining tungora wala magpasabot nga ikaw dili “angay” sa panan-aw sa lain. (Maghuhukom 14:3) Busa imbes isipon nimo nga pakyas ka sa imong pagpangitag angayan nga kapikas sa kaminyoon, ilha nga ang imong mga paningkamot nagbunga ug usa ka mapuslanong resulta: Imong nahibaloan nga kining batan-ong lalaki dili para kanimo. Nganong makaingon kita niini?

Angay ba Siya Kanimo?

Ang Bibliya nagsugo sa mga bana nga ‘higugmaon ang ilang mga asawa sama sa ilang kaugalingong  mga lawas.’ (Efeso 5:28) Kini nagsugo usab sa mga bana nga ‘hatagag kadungganan’ ang ilang mga asawa. (1 Pedro 3:7) Niining kahimtanga, ang batan-ong lalaki nag-isip tingali kanimo ingong higala. Apan pinaagi sa pagbalibad, sa pagkatinuod iyang gipakita nga siya dili pa andam niining panahona sa paghigugma ug pagpasidungog kanimo ingong iyang asawa. Siya adunay katungod sa paghimo nianang maong pagpili. Hunahunaa kini: Kon mao kanay iyang gibati, siya ba gayod usa ka angayan nga bana alang kanimo? Handurawa lang kon unsa ka dako sa imong kaguol kon maminyo ka sa usa ka tawo nga wala mahigugma ug magmahal kanimo sumala sa gisugo sa Kasulatan!

Makatabang usab tingali ang pagtagad pag-usab sa mga lihok niining maong batan-ong lalaki, karon nga ang imong paglaom nga mahimo siyang trato dili matuman. Usahay tungod sa kaibog dili na nimo makita ang personal o espirituwal nga mga apan nga dayag tingaling makita sa uban. Pananglitan, wala ba siyay kalibotan sa imong nagtubong pagbati kaniya, o tinuyo ba niyang gidasig nga motubo ang imong pagbati kaniya pinaagi sa padayong pagpakig-uban kanimo? Kon ang naulahi mao ang kahimtang, wala kaha kana magpaila nga siya dili andam nga mahimong mahunahunaon, may empatiya nga Kristohanong bana? Kon mao, maayo nga nahibaloan nimo kana, bisan tingalig sakit kana sa buot.

Ang pagbati ni Marcia napukaw sa dihang ang usa ka batan-ong lalaki nagsugod sa pagpakita kaniyag linaing pagtagad. Sa dihang gipangutana siya ni Marcia bahin sa iyang tuyo, iyang giingnan si Marcia nga siya dili interesadong makigtrato kaniya. Unsay nakatabang kaniya sa pagsagubang sa kahigawad? Siya miingon, “Ang paghunahuna ginamit ang akong utok, dili ang akong kasingkasing, nakatabang kanako sa pagkontrolar sa akong pagbati.” Ang paghinumdom sa mga kinahanglanon sa Bibliya alang sa mga bana nakatabang kaniya sa pagkaamgo nga ang batan-ong lalaki wala gayod makaabot sa sukdanan. Kini nakatabang kaniya sa pagbuntog sa iyang kasubo.

Si Andrea adunay susamang kasinatian uban sa usa ka batan-ong lalaki. Sa ulahi naamgohan ni Andrea nga ang mga lihok nga gipakita sa lalaki kaniya nagpadayag ug pagkadili-hamtong. Nakita niya nga ang lalaki dili pa andam nga magminyo, ug siya mapasalamaton nga gibuka ni Jehova ang iyang mga mata sa maong kamatuoran. Siya miingon, “Ako nagtuo nga si Jehova makapanalipod kanimo batok sa mga sirkumstansiya nga makasakit kanimo, apan kinahanglang mosalig ka Kaniya.” Siyempre, sa daghang kaso ang usa ka batan-ong lalaki maayo rag paggawi ug mobalibad tungod sa dungganon nga mga rason. Sa bisan unsang kahimtang, sa unsang paagi makasagubang ka sa pagbati nga moresulta niana?

Kon Unsay Imong Mahimo Labot sa Imong Pagbati

Ang imong kasingkasing magkinahanglan tingalig panahon sa pagdawat sa kamatuoran nga iya kang gibalibaran. Ang imong pagmahal kaniya naugmad sa paglabay sa panahon, ug ang pagwagtang niana nagkinahanglan usab ug panahon. Panagsa ra nga ang romantikong mga pagbati mapalong samag sugang dagitab. May mga adlaw nga morag dili nimo mabuntog kana! Magmapailobon sa imong kaugalingon. Sa paglabay sa panahon, mawala usab ang maong mga pagbati. Apan kon gusto nimo nga mas daling mawala ang maong pagbati, likayi ang mga butang nga makapasamot niana.

Pananglitan, pakigbisogi ang pagsaway sa imong kaugalingon pinaagi sa pagsubli sa imong matag pulong nga gisulti ug lihok sa dihang imong gipadayag ang imong pagbati ngadto sa batan-ong lalaki. Kon dili nimo pugngan ang maong mga hunahuna, basin magtuo ka nga sa pagkatinuod wala siya mobalibad o ang pagsulay ug lahi nga paagi basin mosaler. Dawata ang kamatuoran nga dili nimo mausab ang iyang gibati. Lagmit kaayo nga bisan unsa pay imong paagi sa pagpahayag sa imong gibati, ang iyang tubag mao ra gihapon.

Ang paghanduraw maoy laing lit-ag. Maghanduraw ka ug mga esena diin kamong duha nagkinabuhi nga malipayon hangtod sa hangtod. Ang maong mga paghanduraw morag makapahupay, apan kini dili tinuod. Inigkatapos niini, ang imong pagbati sa kapildihan mobalik ug ikaw maguol na usab. Kining maong siklo sa kalipay nga sundan sa dili-maantos nga kasakit mahimong magpadayon sa dugayng panahon gawas kon maningkamot ka pag-ayo nga hunongon kana.

Paningkamoti nga dili ka maghanduraw. Kon mosugod kini, tindog ug paglakawlakaw. Paghimog pakusog nga trabaho​—kanang makapatipas sa imong hunahuna sa laing direksiyon. Isentro ang pagtagad sa mga butang nga makapalig-on kanimo, dili sa mga butang nga makapaguol kanimo. (Filipos 4:8) Malisod tingali kini sa sinugdan, apan sa ngadtongadto, madaog nimo ang pagpakigbugno ug magmalinawon ka.

Ang pagdasig gikan sa suod nga mga higala makatabang. (Proverbio 17:17) Apan, si Sonja naghatag niining maong pasidaan: “Dili makatabang kon  ang imong mga higala pulos dili minyo, parehas nimog edad, ug gusto na kaayong magminyo. Nagkinahanglan ka usab ug gulanggulang nga mga higala, kinsa makatabang kanimo sa paglantaw sa mga butang sa hustong paagi.” Ug hinumdomi, adunay usa nga labaw pang makatabang kanimo sa pagbuntog sa imong kasakit.

Si Jehova​—Usa ka Higala ug Tigpaluyo

Sa dihang ang usa ka matinumanong tawo sa karaang panahon mibatig kahigawad, siya miampo kang Jehova alang sa tabang. Unsay resulta? Siya misulat: “Sa dihang ako nahingawa ug nabalaka, ikaw naghupay kanako ug naglipay kanako.” (Salmo 94:​19, Today’s English Version) Si Jehova magahupay ug magapalig-on usab kanimo kon ikaw moampo kaniya ug motuo kaniya. Mao kanay gibuhat ni Andrea. Siya miingon, “Ang pag-ampo hinungdanon kaayo sa pagtabang kanimo sa pagbuntog sa kasakit ug pagsentro sa imong pagtagad sa laing butang.” Si Sonja miingon usab mahitungod sa pag-ampo, “Makatabang kanimo ang pagbatig pagtamod sa kaugalingon nga wala magdepende kon ang uban nakagusto kanimo o nagsalikway kanimo.”

Walay tawo nga bug-os nga makasabot sa imong gibati, apan nasabtan kana ni Jehova. Gilalang niya ang mga tawo uban ang tinguha nga makig-ambit sa gugma diha sa kaminyoon. Siya nahibalo sa gahom sa romantikong kaibog, ug siya nahibalo kon unsaon pagkontrolar kana. Makatabang siya kanimo sa pagbuntog sa hilabihang kaguol, kay ang 1 Juan 3:20 nag-ingon: “Ang Diyos mas labaw kay sa atong mga kasingkasing ug nahibalo sa tanang butang.”

Magpabiling Timbang

Ang kaminyoon mahimong usa ka tuboran sa dakong kalipay, apan kini dili mao ang bugtong tuboran niana. Ang kalipay bation sa tanan nga nag-alagad kang Jehova, ug dili kay ang mga minyo ray mobati niana. Sa pipila ka paagi, ang mga dili minyo adunay pipila ka bentaha kon itandi niadtong mga minyo. Sila wala mag-antos sa “kasakitan sa ilang unod” nga gihisgotan diha sa 1 Corinto 7:28. Kining maong kasakitan nagtumong sa mga kapit-os ug kabug-at nga masinati sa tanang minyo. Dugang pa, ang mga dili minyo adunay labaw nga personal nga kagawasan ug mas daling makagamit sa ilang kinabuhi sa pag-alagad kang Jehova. Busa, ang Bibliya nagtudlo: “Siya . . . nga naghatag sa iyang pagkaulay diha sa kaminyoon nagbuhat ug maayo, apan siya nga dili magahatag niini diha sa kaminyoon magabuhat ug mas maayo.” (1 Corinto 7:38) Bisan pag gusto gayod nimong magminyo, ang pagpamalandong niining maong mga pagtulon-an sa Bibliya makatabang kanimo sa paghupot sa imong panimbang ug sa pagpahimulos sa labing maayo sa imong presenteng kahimtang.

Ang ubang maayog-tuyo nga mga higala moingon tingali nimo, “Ayawg kabalaka, makakita ka ra unya ug buotan nga lalaki.” Ug tinuod nga bisag gisalikway ka niining higayona, wala kana magpasabot nga kanunay ka nang mag-inusara. Bisan pa niana, ang usa ka batan-ong Kristohanong babaye nga ginganlag Candace nangatarongan niining paagiha: “Nagasalig ako kang Jehova. Wala ako magdahom nga hatagan niya ako ug bana aron magmalipayon ako. Apan ako nahibalo nga siya magahatag kanako sa akong gikinahanglan aron mahulipan ang maong kahaw-ang.” Ang paghunahuna sa positibong paagi nakatabang kaniya sa pagbuntog sa kahigawad nga gibalibaran.

Ang mga pagsulay sa pagpanarato subsob nga mapakyas niining kalibotana, apan mao man usab ang daghang kaminyoon. Kon mosalig ka kang Jehova ug motuman sa iyang tambag, siya makatabang kanimo nga mapulihan ug kalipay ang imong kahigawad. Masinati nimo ang sama nianang nasinati ni Haring David, kinsa misulat: “Oh Jehova, ang tanan kong tinguha anaa sa imong atubangan, ug ang akong pagpanghupaw wala matago gikan kanimo. Kay kanimo, Oh Jehova, naghulat ako; ikaw mitubag, Oh Jehova nga Diyos ko.”​—Salmo 38:​9, 15.

[Mga footnote]

[Mga hulagway sa panid 20]

Pahimusli ang tabang nga gitagana sa Diyos