Mga Kapeligrohan sa Pagpaningkamot nga Motahom

UNSA ang mga sukdanan sa tinuod nga katahom? “Ang katahom nagdepende sa tumatan-aw,” matod sa iladong panultihon. Sa pagkatinuod, ang katahom nagdepende sa panglantaw sa matag tawo. Dugang pa, ang gihunahuna sa kadaghanan nga matahom nagkalainlain sa matag kultura ug panahon.

Si Jeffery Sobal, associate professor nga nagtudlo ug nutrisyon sa Cornell University, T.B.A., miingon: “Sa mga tuig sa 1800, gilangkit sa halos tanang tawo ang katambok uban sa maayong kahimtang sa kinabuhi. Gihunahuna sa mga tawo nga ang dako nga lawas maoy timailhan sa pagkaadunahan ug maayong panglawas, samtang ang niwang nga lawas nagpasabot nga ang usa kabos kaayo nga dili arang makapalit ug igong pagkaon.” Kanang maong panglantaw mabanaag sa mga dibuho sa daghang dibuhista niadtong panahona, sanglit ang ilang mga modelo​—kasagaran mga babaye​—adunay linginon nga mga braso, bitiis, bukobuko, ug bat-ang. Ug ang kadaghanan niini maoy mga hulagway sa tinuod nga mga tawo nga giisip nga matahom kaayo.

Ingon gihapon niana ang panglantaw sa uban karon, bisan tuod ang katahom naglangkit ug labaw pa kay sa pagkahimong tambok o niwang. Bisan karon, diha sa ubang katilingban sa Habagatang Pasipiko, ang pagkatambok tilinguhaon kaayo. Sa ubang mga lugar sa Aprika, ang mga pangasaw-onon dalhon sa usa ka lugar diin ang mga tig-atiman magpakaon kanilag daghang makapatambok nga pagkaon aron sila mahimong mas madanihon. Ang tag-iya sa usa ka naytklab sa Nigeria miingon: “Ang kasagarang Aprikana maoy tambok . . . Kana ang iyang kinaiyanhong katahom. Kanay giisip nga matahom sa

 among kultura.” Sa daghang tradisyonal nga Katsilang mga kultura, tilinguhaon usab ang pagkatambok, ingong timailhan sa pagkaadunahan ug kalamposan.

Apan, sa daghang ubang mga dapit, ang pagkatambok wala isipa nga matahom. Ngano man? Ang uban miingon nga sa dihang ang internasyonal nga pamatigayon milambo ug ang industriya sa produksiyon ug pag-apod-apod ug pagkaon miuswag, ang kabos nga mga tawo makakaon na sa mga pagkaon nga matagamtam lang kaniadto sa mga dato. Sa ingon, ang pagkatambok anam-anam na nga wala isipa sa mga tawo nga matahom. Lain pa, ang sobrang pagkatambok gilangkit sa ubang relihiyosong tinuohan uban sa pagkaulitan, busa ang pagkatambok wala na isipa nga madanihon. Dugang pa, ang mga tawo naimpluwensiyahan pag-ayo sa siyentipikanhong mga kaplag bahin sa mga kadaot sa lawas nga ipahinabo sa sobrang pagkatambok. Kini ug ang uban pang mga hinungdan maoy nakaingon nga nabag-o ang panglantaw sa mga tawo bahin sa katahom, ug sulod sa daghan nang katuigan, gipasiugda sa daghang tawo sa kalibotan ang ideya nga ang yagpis nga lawas mas matahom.

Ang media dakog nahimo sa pagpakaylap niini nga panglantaw. Ang mga modelo nga kasagarang makita diha sa mga karatula sa panganunsiyo ug sa telebisyon kasagarang niwang ug maskulado. Gustong ibanaag sa ilang panagway ang kasegurohan ug kalamposan. Mao usab kana ang mensaheng gibanaag sa mga artista sa TV ug pelikula.

Sa unsang paagi kini nakaimpluwensiya sa ordinaryong mga tawo, lakip na sa mga batan-on? Usa ka di pa dugayng artikulo nga naghisgot kon giunsa paglantaw sa mga tawo ang ilang lawas nag-ingon nga “sa dihang ang kasagarang Amerikana mograduwar sa hayskul, nakagugol na siya ug 22,000 ka oras sa pagtan-awg telebisyon.” Nianang panahona, makadaghan na siyang nakakita ug mga larawan sa madanihong mga babaye nga adunay “hingpit” nga mga lawas. Ang artikulo midugang: “Tungod kay balikbalik nilang nakita kining maong mga hulagway, gilangkit sa mga babaye ang nindot nga lawas uban sa kadungganan, kalipay, gugma ug kalamposan.” Busa, dili gayod ikatingala nga human makakita sa mga larawan sa mga modelo diha sa magasin, 47 porsiyento sa mga babayeng gisurbi ang gustong moniwang, bisan tuod 29 porsiyento lang kanila ang tinuod gayod nga tambok.

Ang industriya sa uso nakaimpluwensiya usab sa panghunahuna sa mga tawo bahin sa katahom. Si Jennifer, usa ka modelo nga taga-Venezuela nga nagtrabaho sa Mexico City, miingon: “Ingong modelo, kinahanglan nga matahom akong tan-awon, ug karong panahona kana nagpasabot nga kinahanglan niwang ko.” Usa ka Pranses nga modelo nga ginganlag Vanessa miingon: “Dili man sila moingon nga ang usa ka modelo kinahanglang niwang, apan ikaw mismo ang gusto nga moniwang. Tilinguhaon kana sa tibuok kalibotan.” Sa usa ka surbi sa batan-ong mga babaye, 69 porsiyento ang misugid nga ang mga modelo diha sa mga magasin nakaimpluwensiya sa gihunahuna nila nga nindot nga lawas.

Apan dili lang mga babaye ang daling maimpluwensiyahan sa gitawag nga “hingpit nga lawas.” Ang mantalaan sa Mexico nga El Universal mipahayag: “Wala pa gayoy ingon ka daghang produkto sa pagpatahom sa mga lalaki ang gibaligya sukad.”

 Mapuslanon ba ang Pagpangagpas ug “Hingpit nga Panagway”?

Aron maangkon ang “hingpit nga panagway” o aron lang mahimong mas madanihon, daghang tawo ang nagpailalom sa cosmetic surgery. Nagkadaiya ug dili na kaayo mahal ang mga paagi sa operasyon nga gitanyag niining maong natad sa medisina. Sa unsang paagi nagsugod ang cosmetic surgery?

Sumala sa Encyclopædia Britannica, ang modernong mga pamaagi sa plastic surgery nagsugod sa mga tuig human sa Gubat sa Kalibotan I, sa dihang gisulayan pagretoke ang nadaot nga mga dagway sa mga tawong nasamdan sa gubat. Sukad niadto kining maong mga pamaagi nakatabang pag-ayo sa pagretoke sa grabeng pisikal nga kadaot nga gipahinabo sa pagkasunog, grabe nga mga samad, ug dala-sa-pagkatawo nga mga abnormalidad. Apan, sumala sa giingon sa Britannica, ang plastic surgery kasagarang “gihimo aron lang sa pagretoke sa dagway sa himsog gayod nga mga tawo.” Pananglitan, ang ilong mahimong usbon, ang nagyatyat nga panit sa nawong ug liog mahimong pahugtan, ang dalunggan mahimong pagamyan, ang sobrang tambok sa pus-on ug bat-ang mahimong wagtangon, ang pipila ka parte sa lawas mahimong padak-an, ug bisan ang pusod mahimo ganing “panindoton.”

Apan, komosta na man ang himsog nga mga tawo nga andam magpameligro sa ilang kaugalingon sa tinguha nga panindoton pa ang ilang panagway? Unsang mga kapeligrohan ang lagmit nilang maagoman? Si Angel Papadopulos, sekretaryo sa Mexican Association of Plastic, Aesthetic, and Reconstructive Surgery, misaysay nga usahay ang ingon niini nga mga operasyon himoon sa wala-kaayo mabansay nga mga tawo, nga miresulta sa dakong kadaot. Adunay mga klinika nga modapat ug peligroso nga mga substansiya diha sa ilang mga pasyente aron monindot ang ilang korte sa lawas. Sa sayong bahin sa 2003, usa ka mantalaan nagtaho nga ang dili-maayong mga kahimtang sa mga beauty shop nagpahinabo ug eskandalo sa Canary Islands, diin daghang babaye ang nabiktima sa peligrosong mga operasyon. a

Ang mga lalaki lagmit maningkamot usab pag-ayo nga makabaton ug “hingpit nga panagway.” Ang uban mogugol ug daghang panahon diha sa gym, nga naghurot sa halos tanan nilang libreng panahon sa pagpadako ug pagpaporma sa ilang mga lawas. “Sa kadugayan,” nag-ingon ang magasin nga Milenio, “wala na silay panahon sa pagpakighugoyhugoy ug pagpakigsuod sa ubang mga tawo  tungod sa panginahanglan nga mag-ehersisyo.” Tungod kay nangandoy ug maskuladong lawas, daghan ang motomar ug mga substansiya nga lagmit makadaot sa lawas, lakip sa mga steroid.

Tungod sa sobrang kabalaka bahin sa ilang panagway, ang ubang batan-ong mga babaye nakaagom ug mga abnormalidad sa pagkaon, sama sa bulimia ug anorexia nervosa. Ang uban mogamit ug mga produkto sa pagpaniwang nga nagsaad ug talagsaong mga resulta sa labing madaling panahon apan walay pagtugot gikan sa kasaligang mga institusyon sa panglawas. Ang paggamit nianang maong mga produkto lagmit moresulta ug seryosong kadaot.

Dili lang kay pisikal nga kadaot ang moresulta sa sobrang pagkabalaka sa panagway. Si Dr. Katherine Phillips sa Brown University, T.B.A., miingon nga ang mga tawo nga sobrang nabalaka sa ilang pisikal nga panagway lagmit makaugmad ug sakit nga gitawag ug body dysmorphic disorder, diin ang mga nag-antos mabalaka pag-ayo sa gihanduraw nila nga mga depekto sa ilang panagway. Ingon ka daghan sa 1 sa 50 ka tawo ang lagmit makaagom niining sakita. Kadtong nag-antos niini “nagtuo gayod nga sila maot ug dagway mao nga sila magpalayo sa ilang mga higala ug mga hinigugma,” matod niya. “Sila lagmit nga magmagul-anon pag-ayo ug gustong maghikog.” Gihisgotan ni Phillips ang kahimtang sa usa ka maanyag nga batan-ong babaye kansang nawong gitugkan ug panalagsang bugasbugas kaniadto apan naghanduraw nga ang iyang nawong nalukop sa mga ulat. Tungod kay maulaw siyang magpakita sa mga tawo, ang babaye mihunong sa pagtungha sa ikawalo nga grado.

Hinungdanon ba gayod kaayo ang panagway sa usa nga kinahanglan niyang ipameligro ang iyang mental ug pisikal nga kahimsog aron lang maangkon ang “hingpit nga panagway”? Aduna bay mas hinungdanong matang sa katahom nga angayng paningkamotan sa usa nga maangkon?

[Footnote]

[Blurb sa panid 5]

Sa mga babayeng gisurbi, 69 porsiyento ang misugid nga ang mga modelo diha sa mga magasin nakaimpluwensiya sa gihunahuna nila nga nindot nga lawas

[Hulagway sa panid 4]

Ang panganunsiyo nakaimpluwensiyag dako sa gihunahuna sa mga tawo nga pisikal nga katahom

[Hulagway sa panid 6]

Gidaot sa uban ang ilang kaugalingon pinaagig hinobrang pagpa-plastic surgery

[Mga hulagway sa panid 7]

Maningkamot pag-ayo ang uban nga makabaton sa gitinguha nilang panagway