Sobrang Kabalaka Bahin sa Panagway
Sobrang Kabalaka Bahin sa Panagway
SI Maria a maoy usa ka malamposong batan-ong babaye ug membro sa usa ka maayong pamilya. Apan, siya dili malipayon. Ngano man? Ngil-aran siya sa iyang panagway. Bisan tuod gisulayan sa iyang pamilya ang pagdasig kaniya, gibati gihapon ni Maria nga siya dili matahom, ug naguol kaayo siya niana.
Si José naggikan sa usa ka tinahod nga pamilya ug anaa na kaniya ang tanang gikinahanglan aron magmalipayon. Apan gibati niya nga wala gayoy gustong makigminyo kaniya. Ngano man? Gibati ni José nga ordinaryo kaayo siyag panagway ug maot pa gyod. Nakaseguro siya nga walay tilinguhaong babaye nga maibog kaniya.
Ang otso-anyos nga si Luis ganahang moadto sa eskuylahan ug mahigalaon kaayo. Malingaw siya sa pagduladula uban sa iyang mga eskolmet, apan kanunay siyang mohilak tungod kay kataw-an nila ang iyang panagway. Moingon sila nga siya tambokikoy.
Kining mga kahimtanga dili talagsaon. Dili lang kakulang ug pagtamod sa kaugalingon ang problema ni Maria, José, ug Luis. Sa pagkatinuod, walay usa nga gustong isalikway tungod sa iyang panagway.
Apan, daghang tawo ang naghatag ug sobrang importansiya sa panagway. Gani, ang kalamposan sa usa ka tawo daw sagad nagdepende sa iyang panagway. Pananglitan, daw mas dakog purohan nga makakitag trabaho ang labing madanihong mga tawo. Si Pilar Muriedas, usa sa mga direktor sa Latin-American and Caribbean Women’s Health Network, miingon nga alang sa mga babaye, “ang kaanyag maoy usa sa pangunang kinahanglanon alang sa kalamposan.” Ug sumala kang Dra. Laura Martínez, ang mga babaye nasayod pag-ayo nga human tagda ang tanang butang, “ang panagway sa usa makaapektog dako kon kaha siya dawaton sa trabaho o dili.”
Aw, daghang lalaki usab ang nalinga pag-ayo sa pag-ugmad ug “hingpit” nga lawas. Sa pagkatinuod, daghang lalaki ug babaye ang andam nga mohimo sa tanang paagi aron lang motahom, nga usahay hikawan pa gani ang ilang kaugalingon ug pagkaon o magpailalom sa masakit nga mga operasyon aron lang maangkon ang kinanindotang dagway o korte sa lawas nga mahimo nilang mabatonan. Mapuslanon ba ang maong paningkamot? Aduna ba kiniy nagpahipi nga mga kapeligrohan?
[Footnote]
a Ang mga ngalan giusab.
[Hulagway sa panid 3]
Ang pisikal nga panagway mahimong makaapektar sa mga kahigayonan nga ihatag ngadto sa usa