Ang Hunahuna sa Bibliya

Ang Pagkalumo Usa ba ka Ilhanan sa Pagkahuyang?

“Ang ulipon sa Ginoo dili kinahanglang makig-away, kondili kinahanglang magmalumo sa tanan.”​—2 TIMOTEO 2:24.

UNA pa kita matawo, ang atong panit makaugmad sa katakos nga mobati. Sukad sa pagkatawo kita mangandoy sa mabinationg paggakos sa atong inahan. Sa pagkabata pa, ang atong kiling nga mopahiyom, atong katakos nga mohamtong sa emosyon, ug bisan ang atong tinguha nga mahanas sa pagpakigkomunikar maapektohan sa pagkamabination nga masinati nato gikan sa atong mga ginikanan.

Ugaling, gitagna sa Bibliya nga sa kataposang mga adlaw, ang mga tawo mahimong “dili-masinugtanon sa mga ginikanan, dili-mapasalamaton, dili-maunongon, walay kinaiyanhong pagbati.” Ang malumong mga hiyas sama sa kalulot ug kahingawa maoy talagsa ra kaayo, sanglit ang mga tawo “magmahigugmaon sa ilang kaugalingon” ug “mabangis, walay gugma sa pagkamaayo.”​—2 Timoteo 3:1-3.

Daghan karon ang mobati nga sila kinahanglang mahimong bagis ug dili mabination.  Sila moingon nga ang pagkalumo maoy usa ka ilhanan sa pagkahuyang. Apan tinuod ba kana?

Malumo Apan Gamhanan

Si Jehova nga Diyos gibatbat ingong “usa ka lalaki sa panggubatan.” (Exodo 15:3) Siya mao ang kinalabwang Tinubdan sa tanang gahom. (Salmo 62:11; Roma 1:20) Bisan pa niana, ang pagkagamhanan ni Jehova wala makapugong nga siya mahimong “malumo kaayo sa pagmahal ug maluluy-on” sa dihang gigantihan niya ang matinumanong tawo nga si Job. (Santiago 5:11) Sa iyang pagpakiglabot sa nasod sa Israel, gipadayag ni Jehova nga siya may malumo kaayong relasyon uban kanila pinaagi sa pagpanig-ingon sa iyang mga pagbati ngadto sa nagpasuso nga inahan nga maluoy sa “anak sa iyang tiyan.”​—Isaias 49:15.

Sa susama si Jesus maoy kusganon ug malumo. Kusganon niyang gisaway ang salingkapaw nga relihiyosong mga pangulo sa iyang panahon. (Mateo 23:1-33) Gipadlas usab niya ang hakog nga mga tig-ilis ug salapi gikan sa templo. (Mateo 21:​12, 13) Apan ang pagdumot ba ni Jesus sa korapsiyon ug kahakog naghimo kaniya nga dili mabination? Wala gayod! Si Jesus ilado sa pagkamalumo ngadto sa uban. Sa pagkatinuod, iya ganing gitandi ang iyang kaugalingon ngadto sa usa ka himungaan nga ‘nagatigom sa iyang panon sa mga piso ilalom sa iyang mga pako.’​—Lucas 13:34.

Bagison nga Panggawi o Sulodnon nga Kusog?

Ang matuod nga mga Kristohanon gidasig nga mosundog kang Kristo pinaagi sa pagsul-ob sa “bag-ong pagkatawo nga gilalang sumala sa kabubut-on sa Diyos.” (Efeso 4:20-24) Kita gisugo nga ‘hukason ang daang pagkatawo uban ang mga buhat niini,’ sama sa usa ka alimango nga mangluno aron kini modako. (Colosas 3:9) Hinunoa, lahi sa alimango kansang kabhang sa dili madugay mogahi na usab human mangluno, gisugo kita nga permanente natong isul-ob ang “malumong mga pagmahal sa pagkamabination, kalulot, . . . ug hataas-nga-pailob.” (Colosas 3:12) Busa, ang pagkalumo angay nga mahimong usa sa atong talagsaong mga hiyas.

Ang pagsul-ob sa atong kaugalingon sa malumong mga hiyas dili timailhan sa kahuyang. Sa kasukwahi, kita kinahanglang mahimong “kusganon diha sa [atong] pagkatawo sa sulod uban sa gahom pinaagi sa espiritu [ni Jehova].” (Efeso 3:16) Pananglitan, usa ka lalaki nga ginganlag Lee nag-ingon: “Dili pa kaayo dugay nga ako maoy mabangis, daotang tawo. Kahadlokan gani ang akong dagway, sanglit ako may mga ariyos nga gitusok sa lainlaing bahin sa akong lawas. Ako nagtinguha gayod nga makasapig daghan ug dili magpanuko sa pagsultig law-ayng mga pulong ug mohimog kapintasan aron matuman ang akong gusto. Ako dili mahingawaon.” Ugaling lang, si Lee misugod pagtuon sa Bibliya uban sa usa ka kauban sa trabaho mao nga siya nakaila ug nahigugma kang Jehova nga Diyos. Gihukas na niya ang iyang daang pagkatawo ug siya nakakat-on sa pagpugong sa kaugalingon. Karon siya nagpahayag sa iyang gugma alang sa mga tawo pinaagi sa pagboluntaryo sa iyang panahon aron tabangan sila sa pagtuon sa Bibliya.

Dihay panahon nga si apostol Pablo usa usab ka “tigpasipala” nga mihimog kapintasan aron makab-ot ang iyang mga tumong. (1 Timoteo 1:13; Buhat 9:​1, 2) Apan sa dihang si Pablo nakasabot sa kaluoy ug gugma nga gipakita kaniya ni Jehova nga Diyos ug ni Jesu-Kristo, siya misanong pinaagi sa pagpaningkamot nga masundog ang maong mga hiyas. (1 Corinto 11:1) Bisan pag si Pablo lig-ong mibarog dapig sa Kristohanong mga prinsipyo, nakakat-on siya nga magmalumo diha sa iyang mga pagpakiglabot sa ubang mga tawo. Sa pagkatinuod, si Pablo wala magpugong nga ipahayag ang malumong pagmahal alang sa iyang mga igsoon.​—Buhat 20:​31, 36-38; Filemon 12.

Kon sa Unsang Paagi Makabaton ug Kusog Aron Mahimong Malumo

Sumala sa gipakita sa mga kasinatian ni Lee ug ni apostol Pablo, ang pagkat-on nga mahimong malumo diha sa pagpakiglabot sa uban wala magpasabot nga ang usa kinahanglang huyang sa kinaiya. Sa pagkatinuod, ang kasukwahi niana mao ang matuod. Gikinahanglan sa usa ka tawo ang tinuod nga kusog aron mabag-o ang panghunahuna ug mga lihok ug mabuntog ang unodnong kiling nga ‘mobalos ug daotan sa daotan.’​—Roma 12:​2, 17.

Makakat-on usab kita nga magmahangawaon ug magmabination pinaagi sa regular nga pagbasa sa Pulong sa Diyos ug sa pagpalandong sa gugma ug kaluoy nga gipadayag na kanato ni Jehova nga Diyos ug sa iyang Anak, si Jesu-Kristo. Pinaagi sa pagbuhat niana, atong matugotan ang gahom sa Pulong sa Diyos nga magpahumok sa atong mga kasingkasing. (2 Cronicas 34:​26, 27; Hebreohanon 4:12) Bisan kon unsay atong pamilyahanong kagikan o kon unsa ka pait ang mga kasinatian sa atong kinabuhi, makakat-on kita nga “magmalumo sa tanan.”​—2 Timoteo 2:24.

[Hulagway sa panid 18]

Ang usa ka maayong amahan malumo ngadto sa iyang mga anak