Gikan sa Among mga Magbabasa

Pag-antos Salamat kaayo sa artikulong “Mga Batan-on Nangutana . . . Nganong Gitugotan sa Diyos nga Kita Mag-antos?” (Marso 22, 2004) Ako 14 anyos, ug duha ka tawo nga suod nako​—akong lolo ug akong tiya​—bag-o pang namatay. Nahibalo ako nga ang Diyos dili mao ang mabasol sa ilang pagkamatay. Si Satanas mao ang mabasol, ug siya adunay hamubong panahon na lang nga nabilin. Ang maong artikulo nakahupay gayod kanako. Palihog ipadayon ang pagsulat sa ingon nga mga artikulo. Salamat kaninyo pag-usab gikan sa kahiladman sa akong kasingkasing.

B. B., Tinipong Bansa

Dili pa dugay, ang dalaga nga ako untang minyoan namatay gumikan sa aksidente sa kotse. Grabe kaayong trahedya kadto​—alang kanako, sa kongregasyon, ug ilabina sa iyang mga ginikanan. Nagpasalamat ako kang Jehova tungod sa pagtabang kanako nga makabuntog sa akong dakong kasubo. Ug salamat sa artikulong “Nganong Gitugotan sa Diyos nga Kita Mag-antos?” Kadto miabot sa husto kaayong panahon.

I. D., Alemanya

Sa sinugdan, dili ko gustong mobasa sa maong artikulo. Abi kog ang unod niana makapasubo. Duha ka tuig kanhi ang akong magulang nga lalaki namatay gumikan sa usa ka sakit, ug ako maguol gihapon tungod sa iyang pagkamatay. Apan ang artikulo nagpahinumdom kanako nga si Jehova mao ang Tighatag kanato ug maayong mga butang. Gibati ko nga kusog nga nagkaalim ang akong mga kasakit, ug ako nakabatog kaisog sa pagpadayon sa pagkinabuhi niining mabalhinong kalibotan.

S. H., Hapon

Asukar Giingnan ako sa ubay-ubayng tawo nga ang artikulong “Mga Asukar nga Hinungdanon sa Kinabuhi” (Marso 22, 2004) maoy pagduso sa usa ka popular nga produkto alang sa panglawas nga gituohan nga makaayog mga sakit, apil ang kanser. Dili ako motutol sa inyong artikulo apan ako nabalaka bahin sa mga tawo nga nagagamit niana aron makapanapi o moduso sa ilang mga ideya.

P. K., Australia

Ang “Pagmata!” nagtubag: Ang artikulong “Mga Asukar nga Hinungdanon sa Kinabuhi” mitaho lamang sa mga kaplag sa mga biologo bahin sa hinungdanong papel sa asukar diha sa panglawas. Kadto wala gayod tuyoa aron sa pagduso sa usa ka produkto. Sa dihang magtaho bahin sa panglawas, ang “Pagmata!” dili mosugyot ug bisan unsang linaing paagi sa pagtambal sa mga magbabasa niini. Anaa lang sa matag Kristohanon ang pagtino nga ang bisan unsang metodo nga ilang sundon mopabanaag sa maayong panghunahuna ug dili supak sa mga prinsipyo sa Bibliya.

Pagkadili-Makahilis ug Lactose Sulod na sa pipila ka tuig ako nag-antos sa mga simtoma nga gihisgotan diha sa artikulong “Ang Pagsabot Bahin sa Pagkadili-Makahilis ug Lactose.” (Marso 22, 2004) Kana miresulta nga ako nagpasusi pinaagi sa hydrogen breath test, nga nagpadayag nga ako dili makahilis ug lactose. Sa dihang akong gipakita ang artikulo ngadto sa internist, iyang gihunahuna nga kadto maayo kaayong pagkatuki, ug iya kong gidasig sa pagpasalamat kaninyo tungod sa pagsulat nianang maayong artikulo. Wala pa siya sukad makabasa ug Pagmata!.

E. S., Alemanya

Paghuboghubog Salamat sa artikulong “Ang Hunahuna sa Bibliya: Daotan ba Gayod ang Paghuboghubog?” (Marso 8, 2004) Nakaamgo ako karon nga ang akong pag-inom ug alkoholikong ilimnon mao ang hinungdan sa mga panaglalis tali sa akong asawa ug kanako, ug ako nakaamgo nga dakong salapi ang akong nausik sa alkoholikong ilimnon. Karon ako dili na kanunayng moinom.

G. K., Tanzania

Mga Crossword Puzzle Malingaw ako nga magtubag sa mga crossword puzzle nga gipatik diha sa Pagmata! Kini sila maoy matulon-anon. Sa sinugdan, kanunay nakong konsultahon ang Bibliya aron makaplagan ang hustong pulong. Karon talagsa na lang ko nga mokonsulta niana. Kini maoy tungod sa akong programa sa pagtuon sa Bibliya. Ug mga crossword puzzle ang nagdasig kanako sa pagtuon sa Bibliya!

W. K., Polandia

Ang “Pagmata!” nagtubag: Ang crossword puzzle nga makita diha sa “Awake!” gipulihan ug pasulit sa Bibliya nga nag-ulohang “Nahibalo Ka Ba?” diha sa pipila ka edisyon nga lain ug pinulongan.