“Kon Nahibalo Lang Unta Niini ang mga Tawo!”

HUMAN makagraduwar sa hayskul, daghang batan-on ang mangagpas ug materyalistikong tumong, apan si David dunay lahi nga tumong. Sa Septiyembre 2003, siya ug ang iyang higala mibiya sa Illinois, sa Tinipong Bansa, ug mibalhin sa Dominican Republic. * Si Davey, nga maoy pagtawag kaniya sa iyang mga higala ug pamilya, nagtuon ug Kinatsila ug nakig-uban sa Kongregasyon sa mga Saksi ni Jehova sa Navas sa ilang buluhatong pagtudlo sa Bibliya. Ang kongregasyon mainitong midawat kaniya. “Si Davey mobuhat ug bisan unsa nga ihangyo kaniya,” matod pa ni Juan, ang bugtong ansiyano niana nga kongregasyon. “Siya nagsakripisyo kanunay alang sa uban, ug gihigugma siya sa mga igsoon.”

Ganahan kaayo si Davey sa iyang bag-ong teritoryo. “Malipayon kaayo ako sa akong kinabuhi dinhi,” misulat siya sa iyang higala sa Tinipong Bansa. “Ang ministeryo makapadasig kaayo! Mga 20 minutos kaming makig-estorya sa mga tawo sa matag balay tungod kay gusto nilang maminaw sa bisan unsang imong isulti kanila. Nagdumala na ako ug unom ka pagtuon sa Bibliya, apan nanginahanglan gihapon kami ug tabang. Sa usa ka tigom, dihay 103 nga mitambong sa among kongregasyon nga may 30 ka magmamantala!”

Ikasubo, sa Abril 24, 2004, ang batan-ong si Davey ug ang laing batan-ong lalaki sa mao gihapong kongregasyon naaksidente ug namatay. Hangtod sa iyang kamatayon, si Davey madasigon kaayo sa iyang buluhaton, ug iyang gidasig ang ubang mga batan-on sa lugar nga iyang gigikanan sa pagboluntaryo uban kaniya. “Kini makapausab sa imong panglantaw,” iyang gisultihan ang usa ka batan-ong Saksi.

Ang usa ka kausaban sa panglantaw ni Davey mao ang mahitungod sa materyal nga mga butang. “Nianang usa ka higayon nga mipauli siya,” nahinumdom ang iyang amahan, “si Davey gidapit nga mag-eski sa usa ka lugar. Nangutana siya kon pilay magasto. Sa dihang giingnan siya sa kantidad, si Davey miingon nga dili niya buot nga mogasto ug ingon niana ka dakong kantidad sa salapi sa pag-eski tungod kay ang maong kantidad makasustiner na kaniya ug pipila ka bulan sa Dominican Republic!”

Ang kasibot ni Davey nakaimpluwensiya sa uban. “Sa dihang akong nasayran ang tanang gihimo ni Davey ug kon unsa siya ka malipayon,” matod pa sa usa ka batan-on gikan sa lugar ni Davey, “akong naamgohan nga posible usab nakong mahimo ang maong mga butang. Sa dihang si Davey namatay, namalandong ako kon unsa kahay ikasulti sa mga tawo bahin kanako kon ako mamatay ug kon makahatag ba usab ako ug samang positibong epekto diha sa ilang kinabuhi.”

Ingong mga Saksi ni Jehova, ang mga ginikanan ug mga igsoon ni Davey masaligon gayod nga banhawon sa Diyos si Davey sa umaabot nga matarong nga bag-ong kalibotan. (Juan 5:28, 29; Pinadayag 21:1-4) Kasamtangan, sila nahupay sa pagkasayod nga gigamit ni Davey ang iyang kinabuhi sa labing maayong paagi​—ang pag-alagad sa iyang Maglalalang. (Ecclesiastes 12:1) Bahin sa iyang desisyon sa pag-alagad sa dapit nga mas dako ang panginahanglan, si Davey miingon kaniadto: “Unta himoon usab kini sa tanang batan-on aron masinati usab nila ang akong gibati nga katagbawan. Wala nay mas maayo pa kay sa pag-alagad kang Jehova sa atong bug-os nga maarangan. Kon nahibalo lang unta niini ang mga tawo!”

[Footnote]