Gikan sa Among mga Magbabasa

Moises Bag-o lang nakong nabasa ang seryeng “Si Moises​—Tinuod nga Persona o Tumotumo Lamang?” (Abril 8, 2004) Sultihan ko kamo nga wala nako damha nga makabasa ug ingon niana ka daghang impormasyon nga nagpanghimakak sa mga pangangkon sa mga eskolar nga si Moises tumotumo lamang! Nakaseguro ako nga alang sa sinserong mga tawo, ang pagbasa ug usa lang ka bahin niini nga serye igo na sa pagpalig-on sa ilang pagtuo kang Jehova.

Y. M., Rusya

Panahon Salamat kaayo sa artikulo nga “Abot sa Untop nga Panahon!” (Abril 8, 2004) Ang pag-alagad diha sa kongregasyon, pagkahimong ulo sa pamilya, ug pagpanginabuhi halos mohurot sa akong panahon. Ang mga sugyot sa nangaging mga gula sa magasin nakatabang na kanako, apan mapuslanon ang pagbasa pag-usab ug artikulo nga sama niini. Ganahan kaayo ko sa pahayag nga “Buot sa atong Maglalalang nga kita magmapanumbalingon sa panahon.” Kana nakatabang gayod kanako sa pagbaton ug hustong panglantaw. Palihog padayona ang pagsulat ug mapuslanong mga artikulo nga sama niini.

J. S., Tinipong Bansa

Kanunay nakong himoon ang mga butang sa kataposang gutlo, ug bisan tuod dili ako langaylangayan, tagdugay ko mobangon. Daghan na akog peligrosong mga kasinatian tungod sa pagdalidali. Kining artikuloha nagdasig kanako nga maningkamot sa pagbutang ug dugang alawans sa akong panahon.

Y. W., Japan

Ako nag-edad ug 18 anyos. Sanglit usa ako ka bug-os-panahon nga magwawali ug nag-eskuyla usab, ako kanunayng puliki. Nagkinahanglan ko ug panahon alang sa pagsangyaw ug maingon man sa paghimo ug homwork ug personal nga pagtuon. Ang artikulo nakatabang kanako sa pagbahinbahin ug maayo sa akong panahon aron dili ako maulahi sa Kristohanong mga tigom ug ubang mga kalihokan, maingon man diha sa eskuylahan. Dili na ko gusto nga maulahi. Daghang salamat!

J. H., Tinipong Bansa

Kanunay ako nga maulahi sa mga tigom kaniadto. Nag-ampo ako bahin niana, ug nalipay ako nga gitubag ni Jehova ang akong pag-ampo. Gipadapat nako ang mga sugyot sa artikulo, ug maayo kaayo ang resulta niana. Karon dili na ako maulahi. Naamgohan nako nga ang gugma maoy motukmod sa usa nga moabot sa untop nga panahon.

J. A., Nigeria

Daotang mga Bisyo Gusto ko kaayong mosulat kaninyo ug ipahayag ang akong apresasyon sa artikulo nga “Ang Hunahuna sa Bibliya: Posible Bang Mabuntog ang Daotang mga Bisyo?” (Abril 8, 2004) Nakigbisog ako sa suliran sa pagkatambok sulod sa dugaydugay nang panahon. Moniwang ako, apan motambok lang gihapon ako pag-usab. Bisan tuod wala hisgoti sa artikulo kining problemaha, ang impormasyon mapadapat gihapon. Nakatabang kini kanako sa pagsusi sa akong dili-maayong mga batasan ug sa pagtan-aw kon sa unsang paagi kini nahimong usa sa mga hinungdan sa akong pagtambok. Daghan kaayong salamat sa pagpahinumdom kanamo nga si Jehova nasayod ug nahingawa sa mga butang nga personal natong gipakigbisogan.

M. S., Tinipong Bansa

Bukidbukid sa Balas sa Kabaybayonan Daghang salamat sa artikulo nga “Ang Katingalahang mga Bukidbukid sa Balas sa Kabaybayonan sa Polandia.” (Marso 22, 2004) Sanglit daghang beses na akong nakaduaw ug nakadayeg sa Słowiński National Park, natandog gayod ako niining artikuloha. Si Jehova takos dayegon tungod sa paglalang niya ug ingon nianang kahibulongang mga butang sa kinaiyahan alang kanato. Nalipay kaayo ako sa pagbasa sa artikulo, tungod kay ang akong inahan natawo sa usa ka lungsod duol sa parke.

I. L., Alemanya

Kining artikuloha nakapaamgo kanako kon unsa ka dako sa akong pangandoy alang sa mga kahimtang sa bag-ong kalibotan sa Diyos. Gihanduraw nako ang pag-adto sa Słowiński National Park ug pagtagamtam sa giingon sa artikulo nga “tambal sa tensiyon diha sa kinaiyahan.” Ubos sa pagmando sa Gingharian sa Diyos, ang tibuok planeta adunay ingon na unya niana ka makapahupay nga epekto kanato! Daghan kaayong salamat niining maayong-pagkasulat nga impormasyon!

J. G., Polandia